އޮންލައިންކޮށް ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީ ބައްދަލުވުންތައް ބާއްވާތީ ކޮންމެ ކޮމިޓީ ބައްދަލުވުމެއްގައި ބައިވެރިވެވަޑައިގަންނަވާ މެންބަރުންނަށް އެލަވަންސް ދިނުމުގެ އުސޫލާ ފުށޫއަރާ ކަމަށާއި، އެހެންކަމުން އެ ކޮމިޓީގެ ބައްދަލުވުންތައް އޮންލައިންކޮށް ނުބޭއްވޭނެ ކަމަށް، މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.
މިއަދުގެ ޖަލްސާ ފެށުމުގެ ކުރިން ނަޝީދު ވިދާޅުވީ، ކޮމިޓީ ބައްދަލުވުންތަކުގައި އޮންލައިންކޮށް ބައިވެރިވެވޭ ގޮތަށް، މިނިވަން މުއައްސަސާތަކާ ބެހެ ކޮމިޓީގެ ހިންގުމުގެ ގަވައިދަށް އިސްލާހު ގެނައުމަށް އެ ކޮމިޓީން އެދިފައިވާ ކަން މަޖިލީހުގެ އިދާރާ އިން އެމަނިކުފާނުގެ ސަމާލުކަމަށް ގެނެސްފައިވާ ކަމަށެވެ.
ނަމަވެސް، މި އިސްލާހުގެ ސަބަބުން ކޮމިޓީ ބައްދަލުވުންތަކުގައި ބައިވެރިވެވަޑައިގަންނަވާ މެންބަރުންނަށް އެލަވަންސް ދިނުމުގެ އުސޫލާ ފުށޫ އަރާ ކަމަށް ނަޝީދު ވިދާޅުވިއެވެ.
ކޮވިޑް-19 ގެ ހާލަތުގައި އޮންލައިންކޮށް ޖަލްސާތައް ކުރިއަށް ގެންދިޔަކަން ފާހަގަކުރައްވާ ނަޝީދު ވިދާޅުވި ގޮތުގައި، ކޮވިޑުގެ ހާލަތަށް ފަހު ތަޅުމަށް ހާޒިރުވެ ޖަލްސާތައް ކުރިއަށް ގެންދިއުމަށް މެންބަރުން ވަނީ ނިންމަވާފައެވެ.
"އެހެންވީމާ އަޅުގަނޑަށް ފެންނަ ގޮތުގައި މިނިވަން މުއައްސަސާތަކުގެ ކޮމިޓީ އޮންލައިންކޮށް ހިންގަވަން ނިންމަވާފައިވާ ނިންމެވުން އެއީ އޮތް ގޮތެއް ނޫން،" ނަޝީދު ވިދާޅުވިއެވެ.
