ކ. ތިލަފުށިން ދޫކުރާ ބިންތަކުގެ 90 ޕަސެންޓް ހާއްސަކުރާނީ ދިވެހި ވިޔަފާރިތަކަށް ކަމަށް އެޗްޑީސީން ބުނެފިއެވެ.
އެޗްޑީސީން މިއަދު ނެރުނު ނޫސްބަޔާނެއްގައި ބުނީ، ރާއްޖޭގެ ސިނާއީ މަސައްކަތްތަކަށް ހުރި ދަތިތައް ދެނެގަނެ، ހައްލުތައް ހޯދައިދިނުމަށް ކުރަމުންދާ މަސައްކަތްތަކުގެ ތެރެއިން ތިލަފުށީގެ ބިން އިތުރުކޮށް ޒަމާނީ ފެންވަރެއްގައި ތަރައްގީ ކުރުމުގެ މަސއްކަތް ސަރުކާރާއި ގުޅިން އެ ކޯޕަރޭންގެ ފަރާތުން ކުރަމުންދާ ކަމަށެވެ.
މިގޮތުން، މިފަދަ މަސައްކަތްތައް ކުރަން ހުރި ބިމުގެ ދަތި ކަމާއި، ބިން މަދުވުމުގެ ސަބަބުން ކުލި ބޮޑުވެ ބިމުގެ އަގުއުފުލުމަށް ހައްލެއް ހޯދައި ދިނުމަށް ޖުމަލް 150 ހެކްޓަރުގެ ބިން ތިލަފުށިން ހިއްކުމަށް ހަމަޖެހިފައިވާ ކަމަށް އެޗްޑީސީން ބުނެއެވެ. މި މަޝްރޫއާ ގުޅިގެން 50 ބިމެއް ބީލަމުގެ އުސޫލުން ވިއްކުމަށް މިމަހު 7 ވަނަ ދުވަހު އިއުލާންކޮށްފައިވާ ކަމަށް ވެސް އެޗްދީސީން ބުނެއެވެ.
އެޗްޑީސީން ބުނީ، މި 50 ބިމަށް ކުރިމަތިލުމުގެ ފުރުސަތު ހުޅުމާލާފައިވާއިރު ތިލަފުށިން އަލަށް ހިއްކަމުންދާ 90 ޕަސެންޓު ބިން ދިވެހި ވިޔަފާރިވެރިންނަށް ހާއްސަކޮށް ކުލި ކޮންޓްރޯލު ކުރެވޭ އުސޫލުތަކުގެ ތެރެއިން ދިނުމަށް ކަނޑައަޅާފައިވާ ކަމަށެވެ.
އަދި މިކަމާއި ގުޅިގެން އެކި މަންސަތަކުގައި ދެކެވޭ ވާހަކަތަކާއި ގުޅިގެން އެޗްޑީސީން ބުނީ، ތިލަފުއްޓަކީ ސްޕެޝަލް އެކޮނޮމިކް ޒޯންއެއް ނޫންކަމުގައި ވާއިރު، ބޭރުގެ ވިޔަފާރިތަކަށް ތިލަފުށީގެ މަދު ބިންތަކަށް އެދި ހުހެޅުމުގެ ފުރުސަތު ހުޅުވާލި ނަމަވެސް މި ވިޔަފާރިތައް ވެސް އަމަލު ކުރަން ޖެހެނީ ރާއްޖޭގައި މިހާރު ހެދިފައިވާ ގާނޫނުތަކާއި ކަމާބެހޭ އިދާރާތަކުން ކަނޑައަޅާފައިވާ އުސޫލުތަކުގެ ތެރެއިން ކަމަށެވެ.
މިގޮތުން، ދިވެހި ވިޔަފާރިތަކަށް ހާއްސަ ކުރެވިފައިވާ ވިޔަފާރިތައް، މަސްވެރިކަން ދަނޑުވެރިކަން ފަދަ ވިޔަފާރިތަކަށް މިވިޔަފާރިތަކުގެ ސަބަބުން އެއްވެސް އަސަރެއް ނުކުރާނެ ކަން އަރުވާނެ ކަމަށް އެޗްޑީސީން ބުނެއެވެ. އަދި މިއީ ދިވެރިންނަށް ވަޒިފާގެ ގިނަގުނަ ފުރުސަތު ލިބިގެންދާނެ މަޝްރޫއެއްކަމަށް އެޗްޑީސން ފާހަގަކުރެއެވެ.
އެޗްޑީސީން އިތުރަށް ބުނީ، މި މަޝްރޫއުގެ މަގުސަދަކީ ސިނާއީ މަސައްކަތްތަކަށް ހުރި ދަތިތަކަށް ބޮޑު ލުއެއް ހޯދައި ދިނުމާއި ދިވެހި ވިޔަފާރިތަށް ހުރި ފުރުސަތުތައް އިތުރު ކުރުން ކަމަށާއި އަދި ދިވެހިންނަށް ލިިބޭ ހިދުމަތުގެ ފެންވަރު ރަނގަޅުވެގެންދިއުން ކަމަށެވެ.
އެޗްޑީސީން މަސައްކަތްތައް ބައްޓަން ކޮށްފައިވަނީ ރާއްޖޭގައި ހުރި ވިޔަފާރިތަކަށް އެންމެ ލުއި ފަސޭހަ ގޮތްތައް ހޯދައިދިނުން ކަމަށެވެ. ވިޔަފާރިތަކަށް އަންނަ މިފަދަ ކޮންމެ ހެޔޮބަދަލަކީ ރައްޔިތުންނަށް ލިބޭ ހިދުމަތުގެ ފެންވަރު ރަނގަޅުވުމާއި ހެޔޮ އަގުގައި މުދަލާއި ހިދުމަތް ލިބިގެން ދާނެ ކަމެއް ކަމަށް ގަބޫލު ކުރާ ކަމަށް ވެސް އެޗްޑީސީން ބުނެއެވެ.
ބިދޭސީންނަށް ތިލަފުށިން ސިނާއީ ބޭނުމަށް 99 އަހަރަށް ބިން ގަނެވޭ ގޮތަށް ހުޅުވާލުމާ ގިނަ ބަޔަކު ދެކޮޅު ހަދަނިކޮށް، 57 ބިމެއް ކުއްޔަށް ދޭން އެޗްޑީސީން އިއްޔެ ހުޅުވާއިރު އެ އިއުލާނުގައި ވަނީ ހަ ބާވަތެއްގެ ޕްލޮޓް ދޫކުރަން އިއުލާނުކޮށްފައެވެ. އޭގެ ތެރޭގައި ހިމެނެނީ 2،500 އަކަފޫޓާއި 35،000 އަކަފޫޓާ ދެމެދުގެ ބިންތަކެވެ. އެންމެ ކުޑަ އަގެއްގެ ގޮތުގައި އަކަފޫޓަކަށް 1،700 ރުފިޔާ ދައްކަން ޖެހޭނެ އެވެ.
ބިދޭސީންނަށް 99 އަހަރަށް ބިން ދޫކުރާ އިރު ތިލަފުށިން ބިން ގަންނަ ދިވެހިންނަށް ބިން މިލްކު ކުރެވޭނެ އެވެ.
- ޓައިޕް 1: 2،500-4،999 އަކަފޫޓް
- ޓައިޕް 2: 5،000- 9،999 އަކަފޫޓް
- ޓައިޕް 3: 10،000- 14،999 އަކަފޫޓް
- ޓައިޕް 4: 15،000- 19،999 އަކަފޫޓް
- ޓައިޕް 5: 20،000-29،999 އަކަފޫޓް
- ޓައިޕް 6: 30،000-35،000 އަކަފޫޓް
އޭގެ ތެރެއިން އެންމެ ގިނަ އަދަދެއްްގެ ޕްލޮޓް ދޫކުރަނީ ޓައިޕް ދެއަކުންނެވެ. އެ ސައިޒުގެ 20 ބިމާއި ޓައިޕް 1 ގެ 14 ބިމާއި ޓައިޕް 3 އަދި 4 ގެ ހަތް ބިމާއި ޓައިޕް 5 އާއި ޓައިޕް 6 ގެ އެއް ބިން ދޫކުރާނެ ކަމަށް އެޗްޑީސީން ބުންޏެވެ.
އެޗްޑީސީން ބުނި ގޮތުގައި، ބީލަމުގެ އުސޫލުން ބިން ވިއްކާނީ ދެ މަރުހަލާއަކަށް ބަހާލައިގެންނެވެ. ފުރަތަމަ މަރުހަލާގައި ޖެހޭނީ ޝައުގުވެރިވާ ބިމަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހަޅާށެވެ. ދެވަނަ މަރުހަލާއަކީ އީއޯއައި ހުށަހަޅާފައިވާ ބިމަށް ބީލަން ހުށަހެޅުމެވެ.
ބިމަށް ޝައުގުވެރިވާ ފަރާތްތަކުން ބީލަމުގެ އުސޫލުން ބިން ގަތުމަށް ކުރިމަތިލެވޭނީ އެޗްޑީސީގެ އޮންލައިން ޕޯޓަލްއެއް މެދުވެރިކޮށެވެ. އެ ޕޯޓަލް އާންމުންނަށް ހުޅުވާލާނީ އަންނަ ހަފުތާގެ އަންގާރަ ދުވަހު ކަމަށް އިއުލާނުގައި ބުނެފައިވެއެވެ.
ތިލަފުށީގެ ދެވަނަ ފިޔަވަހިން ދޫކުރާ މި ބިންތަކަށް ބިޑް ހުށަހަޅަން ޖެހެނީ މިމަހުގެ 13 ވަނަ ދުވަހުއެވެ.
