ހުޅުމާލެ ދެވަނަ ފިޔަވަހީގެ ބްރިޖު ހިމެނޭ ސަރަހައްދުގެ ޓްރެފިކަށް ބަދަލުތަކެއް ގެނެސްފިއެވެ.
އެޗްޑީސީން ބުނީ، ނިރޮޅުމަގު ދާލަން އަދި ހިތިގަސްމަގު ދާލަން ސަރަހައްދުގެ ޓްރެފިކަށް ގެނެސްފައިވާ ބަދަލުތަކަކީ އެ ސަރަހައްދުގެ މަގުތައް ބޭނުންކުރާ ފަރާތްތަކުގެ ސަަލާމަތާއި ރައްކާތެރިކަމަށްޓަކައި ގެނެސްފައިވާ ބަދަލުތަކެއް ކަމަށެވެ.
މިބަދަލުތައް ގެނެސްފައިވަނީ އިއްޔެއިން ފެށިގެންނެވެ.
ގެނެސްފައިވާ ބަދަލުތައް:
ނިރޮޅުމަގު އުތުރުން ދެކުނަށް (ފޭސް ދެއަކުން އެކަކަށް) ދަތުކުރާ ފަރާތްތަކަށް ދަތުރުކުރެވޭނީ ހަމައެކަނި ކުރިއަށެވެ. ބްރިޖުން ފައިބައިގެން، ހުރަހަށް އޮންނަ ކުރެދިމާ ހިނގުމަށް ގޯޅި އެޅުމަކީ މަނާ ކަމެކެވެ.
އެޗްޑީސީން ބުނީ މި ބަދަލާއެކު، ނިރޮޅުމަގު ގޯޅި 1 އިން ދަތުރު ކުރެވޭނީ ހަމައެކަނި ހުޅަނގުން އިރަށް ކަމަށެވެ.
މީގެ އިތުރުން ނިރޮޅުމަގު ބްރިޖުން ދެވަނަ ފިޔަވައްސަށް ދަތުރު ކުރާ ފަރާތްތަކަށް ވެސް ދަތުރުކުރެވޭނީ ކުރިއަށެވެ. މިމަގުން ދަތުރުކުރާ ފަރާތްތަކުން ކުރެދިމާ ހިނގުމުން ވާތަށް ގޯޅި އެޅުމުގެ އިހްތިޔާރު ލިބިގެން ވެއެވެ.
އެ ބަދަލާއެކު ނިރޮޅުމަގު ބްރިޖުން، ހިތިގަސްމަގު ބްރިޖާ ހަމައަށް ކުރެދިމާ ހިނގުމުން ދަތުރު ކުރެވެނި ހަމައެކަނި އިރުން ހުޅަނގަށް ކަމަށް އެޗްޑީސީން ބުނެއެވެ.
ހަމައެހެންމެ ހިތިގަސްމަގު ފޭސް ދެއަކުން އެކަކަށް ދަތުރުކުރާ ފަރާތްތަކަށް ދަތުރުކުރެވޭނީ ހަމައެކަނި ކުރިއަށެވެ. އަދި ކުރެދިމާހިނގުމަށް ވާއަތަށް ލަނބާލެވޭނެއެވެ. މިމަގުން ދަތުރުކުރާ ފަރާތްތަކަށް ކުރެދިމާހިނގުމަށް ކަނާއަތަށް ލަނބައެއް ނުލެވޭނެއެވެ.
ކުރެދިމާހިނގުމުން ހުޅަނގުން އިރަށް ދަތުރުކުރާ ފަރާތްތަކަށް ލަނބާލެވޭނީ ހިތިގަސްމަގު ބްރިޖުން ވާއަތަށެވެ. ހިތިގަސްމަގުން ކަނާއަތަކަށް ލަނބައެއް ނުލެވޭނެއެވެ.
ހުޅުމާލެ ފޭސް 1 އިން ފޭސް 2 އަށް އަރާ ފައިބާ ބްރިޖް ސަރަހައްދުގެ ޓްރެފިކަށް މި ބަދަލު ގެނައީ އެ ސަރަހައްދަކީ، ފަސޭހައިން އެކްސިޑެންޓްތައް ހިނގާ ސަރަހައްދަކަށް ވާތީއާއި، ޓްރެފިކް ބަލަހައްޓަން ފަސޭހައަކަށެވެ.
