ފޭސް 2 ގެ ހިޔާ ޕްލެޓް ސަރަހައްދުގައި 2 ފާމަސީ، ކެފޭ އަދި ގާމެންޓްގެ ހިދުމަތްތައް ދޭން އެޗްޑީސީން ބަޔަކާ ހަވާލުކޮށްފިއެވެ.
އެޗްޑީސީން ބުނީ ރައްޔިތުންނަށް އިޖުތިމާއީ ކަންތައްތައް ފަސޭހަކޮށްދިނުމަށްޓަކައި 4 ފަރާތަކާއިއެކު ހިޔާ ކޮމާޝަލް ޔުނިޓުތަކުގެ އެއްބަސްވުމުގައި ސޮއިކޮށްފައިވާ ކަމަށެވެ.
ހިޔާ ކޮމާޝަލް ޔުނިޓުތަކުގެ އެއްބަސްވުމުގައި ސޮއިކުރި ފަރާތްތައް:
- ވައިޓް ވުޑް އިންވެސްމެންޓް - ކެފޭ
- އ.ޑ ފާމަސޫޓިކަލްސް - ފާމަސީ
- ގްރީން ފްލައި - ކެފޭ
- އޮސްޓްރާވާ ޕްރައިވެޓް ލިމިޓެޑް - ގާމެންޓް
ފޭސް 2 ގެ ހިޔާ ޕްލެޓް ސަރަހައްދުގައި ދިރިއުޅޭ މީހުންނަށް ލިބޭ ހިދުމަތްތައް ފުޅާކުރުމަށް އެޗްޑީސީއިން މިމަހު 3 ވަނަ ދުވަހު ވެސް ވަނީ 5 ފަރާތަކާއެކު ސޮއިކޮށްފައެވެ.
އެއީ ޑައިންމޯ ރެސްޓޯރަންޓް، މޭނާ ކޭޓަރިން (ރެސްޓޯރަންޓެއް ހިންގަން)، މާލަސް ކެފޭ، އައިޖީއެސް އަދި މީޑިއާނެޓެވެ.
ހިޔާ ފްލެޓް ސަރަހައްދުގައި ގިނަ ބަޔަކު ދިރިއުޅެމުން އަންނައިރު އެ ސަރަހައްދުން އާއްމު ހިދުމަތް ނުލިބޭ ޝަކުވާތައް ގިނަބަޔަކު އަންނަނީ ކުރަމުންނެވެ. އެ ސަރަހައްދުގައި 3 ވަނަ ފިހާރައެއް މިދިޔަ މަހުގެ ތެރޭގައި ވަނީ ހުޅުވާފައެވެ.
ހިޔާ މަޝްރޫއުގައި 6720 ހައުސިން ޔުނިޓް ހިމެނޭ ގޮތަށް 16 ޓަވަރު ވަނީ އަޅާފައެވެ. އެ ޓަވަރުތަކުގައި 40،000 މީހުންނަށް ދިރިއުޅެވޭ އިރު، ހުރިހާ ޓަވަރުތަކެއްގެ ގްރައުންޑް ފްލޯ ހާއްސަކޮށްފައި ވަނީ ކުއްޔަށް އުޅޭ މީހުންގެ ބޭނުންތައް ފުއްދުމަށް ކޮމާޝަލް އަދި އިންސްޓިޓިއުޝަނަލް ބޭނުންތަކަށެވެ.
ހިޔާ މަޝްރޫއުގެ ދަށުން އަޅާފައިވާ 25 ބުރީގެ 16 ޓަވަރުގެ އެންމެ ތިރި ހާއްސަ ކޮށްފައިވަނީ ކޮމާޝަލް ބޭނުންތަކަށެވެ. އެގޮތުން އެ ތަންތަނުގައި ކޮންވީނިއަންޓް ސްޓޯރުތަކާއި ބޭސްފިހާރަތައް، ކްލިނިކްތައް އަދި ޑޭކެއާ އާއި ޓިއުޝަން ސެންޓަރު އަދި ގުރުއާން ކްލާސްތަކާއި ސެލޫން ހިންގަން ވަނީ ހުޅުވާލައިފައެވެ. މިދިޔަ ހަފްތާގައި ހިޔާ ފްލެޓުގެ 15 ވަނަ ޓަވަރުގައި ވަނީ ސެލޫނެއް ވެސް ހުޅުވައިފައެވެ.
