ހިޔާ ސަރަހައްދުގެ މަގުތަކުގައި ތާރު އެޅުމުގެ މަސައްކަތް ކުރަމުންދާތީ 15 ދުވަހުގެ މުއްދަތަށް، މި މަގުތައް ބަންދުކުރަން ނިންމައިފިއެވެ.
މި މަގުތަކުގައި ތާރުއެޅުމުގެ މަސައްކަތް ކުރެވެމުންދާއިރު ދުވަސްވީ މީހުންނާއި، ކުޑަކުދިން އަދި ނޭވާހިއްލާ މީހުން މި ދުވަސްވަރު މި މަގުތަކާއި ކައިރި ނުވުމަށް އެޗްޑީސީން ވަނީ އިލްތިމާސްކޮށްފައެވެ.
މީގެ އިތުރުން ތާރު އެޅުމުގެ މަސައްކަތުގައި ބޭނުން ކުރެވޭ ތަކެތީގެ ވަހުގެ އަސަރު މި ސަރަހައްދުގައި ދިރިއުޅެމުންދާ ރައްޔިތުންނަށް ކޮށްފާނެތީ އެކަމަށް ރައްކާތެރިވުމަށް ވެސް އެޗްޑީސީން ވަނީ އެދިފައެވެ.
އެޗްޑީސީން މިހެން އަންގާފައިވާއިރު ކުރިއަށް އޮތް 15 ދުވަހުގެ ތެރޭގައި ހިޔާ ސަރަހައްދުގެ ހުރިހާ މަގެއްގައި ތާރުއަޅައި، އާންމުންނަށް ބޭނުން ކުރެވޭގޮތަށް މަގު ހުޅުވާލާނެ ކަމަށް އެޗްޑީސީން މިމަހު 21 ވަނަ ދުވަހު ވަނީ ބުނެފައެވެ.
ހިޔާ ފްލެޓްތަކުގައި ގިނަ އަދަދެއްގެ ބަޔަކު ދިރިއުޅެމުން ދާއިރު، އެސަރަހައްދުގެ މަގުތައް އެންމެ ޒަމާނީ ފެންވަރަށް ހެދުމުގެ މަސައްކަތް އެޗްޑީސީން ދަނީ ކުރަމުންނެވެ.
މިގޮތުން ހިޔާ ފްލެޓް ސަރަހައްދުގައި ކޮންވީނިއަންޓް ސްޓޯރުތަކާއި ބޭސްފިހާރަތައް، ކްލިނިކްތައް އަދި ޑޭކެއާ އާއި ޓިއުޝަން ސެންޓަރު އަދި ގުރުއާން ކްލާސްތަކާއި ސެލޫން ހިންގަން ވަނީ ހުޅުވާލައިފައެވެ.
