ހުޅުމާލެ އަތިރި މައްޗާ ކައިރިން (ބީޗް ސައިޑުން) ވިއްކާ 34 ބިމަށް ބިޑް ހުށަހެޅުމުގެ ފުރުސަތު އަންނަ ބުދަ ދުވަހު އޮންނާނެ ކަމަށް ހައުސިން ޑިވްލޮޕްމަންޓް ކޯޕަރޭޝަން (އެޗްޑީސީ)އިން ބުނެފިއެވެ.
އެޗްޑީސީން ބުނީ އަންނަ ބުދަ ދުވަހުގެ ހެނދުނު 9:00 އިން 12:00 ގެ ނިޔަލަށް މި ބިންތަކަށް ހުށަހަޅާ ބީލަންތައް ބަލައިގަތުން އޮންނާނެ ކަމަށެވެ. ބީލަން ބަލައި ގަތުން އޮންނާނީ ހ. މީރުމާ، 2 ވަނަ ފްލޯގައި ކަމަށް އެޗްޑީސީން ބުނެއެވެ. އަދި ބީލަމް ފޯމު ހުށަހެޅުން ދުވަހުގެ 1 ޖަހާއިރު އޮންނާނެ ކަމަށް ވެސް އެޗްޑީސީން ބުނެއެވެ.
ފޯމު ހުށަހަޅަން ހާޒިރުވާ ފަރާތްތަކުން ސަމާލުކަންދޭންވީ ކަންތައްތައް:
- ކޮންމެ ބީލަން ފޯމަކާއި އެކު ބީލަން ހުށަހެޅުމުގައި ބައިވެރިވެވޭނީ 1 ފަރާތަށް
- ހުރިހާ ވަގުތެއްގައި ވެސް މާސްކް އެޅުން.
- އެކަކު އަނެކަކާއި ދެމެދު 3 ފޫޓުގެ ގައިދުރުކަން ބެހެއްޓުން
- އެޗްޕީއޭއިން އާންމުކޮށްފައިވާ އުސޫލުތަކާއި ގަވާއިދުތަކަށް ހުރުމަތްތެރިކޮށް ހިތުން
އެޗްޑީސީން ބުނީ ބިޑް ހުށަހަޅާ މީހާގެ ބަދަލުގައި އެހެން މީހެއް ބީލަން ފޯމު ހުށަހަޅަން ހާޒިރުވާނަމަ، ޕަވާ އޮފް އެޓާނީ ގެންނަން ޖެހޭނެ ކަމަށެވެ. އަދި، ބީލަން ފޯމު ހުށަހަޅަން ހަމަޖެހިފައިވާ ވަގުތުގެ ފަހުން ހާޒިރުވާ ފަރާތްތަކަށް ފޯމު ހުށަހެޅުމުގެ ފުރުސަތެއް ނުދެވޭނެ ކަމަށް ވެސް އެޗްޑީސީން ބުނެއެވެ.
ހުޅުމާލޭގެ ދެވަނަ ފިޔަވަހީގެ މަސްޓާ ޕްލޭން އެކުލަވާލުމުގައި ކަނޑުއަޅާފައިވާ ގޮތުގެ މަތީން ވިއްކުމަށް ހަމަޖެހިފައިވާ ގޯތި ތަކުގެ ތެރެއިން 60 ގޯތި ވިއްކަން ހުޅުވާލީ ޑިސެމްބަރު މަހުގެ 27 ވަނަ ދުވަހުއެވެ.
ބީޗު ފްރޮންޓުން ވިއްކާ 26 ބިމަށް 3،900ރ ގެ ރޭޓުން ބީލަށް ހުޅުވާލުމާއެކު ބޮޑެތި އަގުތަކުގައި އެ ބިންތައް ގަންނަށް 211 ފަރާތަކުން ވަނީ ބިޑް ކޮށްފައެވެ. ބައެއް ފަރާތްތަކުން އަކަފޫޓަކަށް 10،000ރ ވެސް ހުށަހަޅާފައި ވެއެވެ. އެންމެ ބޮޑު އަގަކަށް ހުށަހަޅާފައި އޮތީ އަކަފޫޓަކަށް 10،200ރ އެވެ. އެ ބީލަމުގައި 1 ފަރާތަކުން އަކަފޫޓަކަށް 10 މިލިއަން ރުފިޔާ ހުށަހެޅިނަމަވެސް އެއީ އޮޅިގެން ހުށަހެޅުނު އަގެއް ކަމަށް އޭނާ ވަނީ ބުނެފައެވެ.
ބީޗު ސައިޑުން ވިއްކާ 34 ބިމުގެ އަގު ފެށެނީ އަކަފޫޓެއް 3،500 ރުފިޔާ އިންނެވެ. އެ ތަނުން ބިމެއްގެ އެންމެ ކުޑަ އަގުވެސް 5.6 މިލިއަން ރުފިޔާ ޖެހޭނެއެވެ.
އެޗްޑީސީން ބުނީ، ބިން ވިއްކުމުގެ ބޭނުމަކީ، ޒަމާނާ އެއްގޮތަށް ތަރައްގީ ކުރެވޭ ގެދޮރުވެރިކަމުގެ އެކި އެކި މަޝްރޫއުގެ ތެރެއިން އެކި އެކި ފަންތީގައި ހިމެނޭ ފަރާތްތަކަށް އެ ފުރުސަތު ފަހިކޮށްދިނުން ކަމަށެވެ.
މީގެ އިތުރުން އެޗްޑީސީގެ ބިޒްނަސް ޕްލޭންގެ ތެރެއިން، ބިން ވިއްކުމުގެ މައިގަނޑު މަގުސަދަކީ މި ފަދަ މަޝްރޫއުން ލިބޭ ފައިސާއިން ސޯޝަލް ހައުސިން ކެޓަގަރީގެ ބިންތަކުގެ އަގު ހަމަޖައްސައި އެ މަޝްރޫއުތަކުގެ އަގު ކުޑަކުރުން ކަމަށް އެ ކޯޕަރޭޝަނުން ބުނެއެވެ. މިގޮތުން މިފަހަރު ހުޅުވާލި ފުރުސަތުގައި އިސްކަމެއް ދީފައި ވަނީ އަލަށް ބިން ގަންނަ ފަރާތްތަކަށް ކަމަށް އެޗްޑީސީން ބުނެއެވެ.
އަދި މާލެ ސަރަހައްދުން ދިރިއުޅުމުގެ ބޭނުމަށް 600 އަކަފޫޓަށް ވުރެ ބޮޑު ބިމެއް ގޯއްޗެއް ރަޖިސްޓްރީ ކޮށްފައި ނުވާ ފަރާތްތަކުން ކުރެ ކޮންމެ ފަރާތަކަށްވެސް ގެނެވޭނީ އެއް ބިން ކަމަށް އެޗްޑީސީން ބުނެއެވެ.
