ހުޅުމާލެ ބީޗް ފްރަންޓުން ވިއްކާ ބިންތަކަށް ބިޑް ހުށަހެޅުމުގެ ފުރުސަތު މާދަމާ އޮންނާނެ ކަމަށް ހައުސިން ޑިވްލޮޕްމަންޓް ކޯޕަރޭޝަން (އެޗްޑީސީ)އިން ބުނެފިއެވެ.
އެޗްޑީސީން ބުނީ މާދަމާ ހެނދުނު 9:00 އިން 12:00 ގެ ނިޔަލަށް މި ބިންތަކަށް ހުށަހަޅާ ބީލަންތައް ބަލައިގަތުން އޮންނާނެ ކަމަށެވެ. ބީލަން ބަލައި ގަތުން އޮންނާނީ ހ. މީރުމާ، ފަސް ވަނަ ފްލޯގައި ކަމަށް އެޗްޑީސީން ބުނެއެވެ. އަދި ބީލަމް ފޯމު ހުށަހެޅުން މާދަމާ 1 ޖަހާއިރު އޮންނާނެ ކަމަށް ވެސް އެޗްޑީސީން ބުނެއެވެ.
ފޯމު ހުށަހަޅަން ހާޒިރުވާ ފަރާތްތަކުން ސަމާލުކަންދޭންވީ ކަންތައްތައް:
- ކޮންމެ ބީލަން ފޯމަކާއި އެކު ބީލަން ހުށަހެޅުމުގައި ބައިވެރިވެވޭނީ 1 ފަރާތަށް
- ހުރިހާ ވަގުތެއްގައިވެސް މާސްކް އެޅުން.
- އެކަކު އަނެކަކާ ދެމެދު 3 ފޫޓުގެ ގައިދުރުކަން ބެހެއްޓުން
- އެޗްޕީއޭއިން އާންމުކޮށްފައިވާ އުސޫލުތަކާއި ގަވާއިދުތަކަށް ހުރުމަތްތެރިކޮށްހިތުން.
އެޗްޑީސީން ބުނީ ބިޑް ހުށަހަޅާ މީހާގެ ބަދަލުގައި އެހެން މީހެއް ބީލަން ފޯމު ހުށަހަޅަން ހާޒިރުވާނަމަ، ޕަވާ އޮފް އެޓާނީ ގެންނަން ޖެހޭނެ ކަމަށެވެ. އަދި، ބީލަން ފޯމު ހުށަހަޅަން ހަމަޖެހިފައިވާ ވަގުތުގެ ފަހުން ހާޒިރުވާ ފަރާތްތަކަށް ފޯމު ހުށަހެޅުމުގެ ފުރުސަތެއް ނުދެވޭނެ ކަމަށް ވެސް އެޗްޑީސީން ބުނެއެވެ.
ހުޅުމާލޭގެ ދެވަނަ ފިޔަވަހީގެ މަސްޓާ ޕްލޭން އެކުލަވާލުމުގައި ކަނޑުއަޅާފައިވާ ގޮތުގެ މަތީން ވިއްކުމަށް ހަމަޖެހިފައިވާ ގޯތި ތަކުގެ ތެރެއިން 60 ގޯތި ވިއްކަން ހުޅުވާލީ ޑިސެމްބަރު މަހުގެ 27 ވަނަ ދުވަހުއެވެ.
ބީޗު ފްރޮންޓުން ވިއްކާ 26 ބިމުގެ އަގު ފެށެނީ އަކަފޫޓެއް 3،900 ރުފިޔާ އިންނެވެ. އެ ތަނުން ބިމެއްގެ އެންމެ ކުޑަ އަގުވެސް 6.2 މިލިއަން ރުފިޔާ ޖެހެއެވެ. ބީޗު ސައިޑުން ވިއްކާ 34 ބިމުގެ އަގު ފެށެނީ އަކަފޫޓެއް 3،500 ރުފިޔާ އިންނެވެ. އެ ތަނުން ބިމެއްގެ އެންމެ ކުޑަ އަގުވެސް 5.6 މިލިއަން ރުފިޔާ ޖެހެއެވެ.
އެޗްޑީސީން ބުނީ، ބިން ވިއްކުމުގެ ބޭނުމަކީ، ޒަމާނާ އެއްގޮތަށް ތަރައްގީ ކުރެވޭ ގެދޮރުވެރިކަމުގެ އެކި އެކި މަޝްރޫއުގެ ތެރެއިން އެކި އެކި ފަންތީގައި ހިމެނޭ ފަރާތްތަކަށް އެ ފުރުސަތު ފަހިކޮށްދިނުން ކަމަށެވެ.
މީގެ އިތުރުން އެޗްޑީސީގެ ބިޒްނަސް ޕްލޭންގެ ތެރެއިން، ބިން ވިއްކުމުގެ މައިގަނޑު މަގުސަދަކީ މި ފަދަ މަޝްރޫއުން ލިބޭ ފައިސާއިން ސޯޝަލް ހައުސިން ކެޓަގަރީގެ ބިންތަކުގެ އަގު ހަމަޖައްސައި އެ މަޝްރޫއުތަކުގެ އަގު ކުޑަކުރުން ކަމަށް އެ ކޯޕަރޭޝަނުން ބުނެއެވެ. މިގޮތުން މިފަހަރު ހުޅުވާލި ފުރުސަތުގައި އިސްކަމެއް ދީފައި ވަނީ އަލަށް ބިން ގަންނަ ފަރާތްތަކަށް ކަމަށް އެޗްޑީސީން ބުނެއެވެ.
އަދި މާލެ ސަރަހައްދުން ދިރިއުޅުމުގެ ބޭނުމަށް 600 އަކަފޫޓަށް ވުރެ ބޮޑު ބިމެއް ގޯއްޗެއް ރަޖިސްޓްރީ ކޮށްފައި ނުވާ ފަރާތްތަކުން ކުރެ ކޮންމެ ފަރާތަކަށްވެސް ގެނެވޭނީ އެއް ބިން ކަމަށް އެޗްޑީސީން ބުނެއެވެ.
