ހުޅުމާލޭގެ ބެލެނިވެރި ކުންފުނި އެޗްޑީސީގެ ސްމާޓް ޓީވީ ބްރޭންޑް ކަމަށްވާ "ސްމާޓްކޮމް" އިއްޔެ އިފްތިތާހު ކޮށްފިއެވެ.
އެ ބްރޭންޑް އިފްތިތާ ހުކޮށްފައި ވަނީ، އިއްޔެ ހޮޓެލް ޖެންގައި ބޭއްވި ރަސްމިއްޔާތެއްގައެވެ.
އެޗްޑީސީން ބުނީ، އެ ކޯޕަރޭޝަނުގެ އަމާޒަކީ އެ ކޯޕަރޭޝަނުން ތައާރަފް ކުރި ސްމާޓްކޮމް މެދުވެރިކޮށް ހުޅުމާލެއަކީ ރާއްޖޭގެ އެންމެ ފުރަތަމަ ސްމާޓް ސިޓީއަށް ހެދުން ކަމަށާއި، ހުޅުމާލޭގެ އިތުރުން އެހެނިހެން ރަށްރަށަށްވެސް އެ ހިދުމަތް ފޯރުކޮށްދިނުން ކަމަށެވެ.
އެގޮތުން ސްމާޓްކޮމްގެ ދަށުން ތައާރަފްކުރާ ސްމާޓް ސޮލިއުޝަންތަކުގެ ސަަބަބުން ތައުލީމާއި ސިއްހަތާއި ދަތުރުފަތުރުގެ ކަންކަން ފަސޭހައިން ހަމަޖެހުމާއި، ވަޒީފާގެ ފުރުސަތުތައް ފަހިވުން ފަދަ، އާންމުންނަށް ގިނަގުނަ ފަސޭހަތަކެއް ލިބިގެން ދާނެ ކަމަށް އެޗްޑީސީން ބުންޏެވެ.
މީގެ އިތުރުން ޕާޓްނާޝިޕްތަކާއި، އިންކިއުބޭޝަން ފެސިލިޓީތައް ފަދަ ޕްރޮގްރާމްތަކުގެ ސަބަބުން، ޓެކްނޮލޮޖީގެ ދާއިރާއަށް ޝައުގު ހުންނަ ޒުވާނުންނަށާއި، މިދާއިރާގައި ހަރަކާތްތެރިވާ، އަދި އަލަށް ނުކުންނަން ބޭނުންވާ ވިޔަފާރިތަކަށްވެސް އެ ފުރުސަތު އެބައޮތް ކަމަށްވެސް އެޗްޑީސީން ބުންޏެވެ.
އެޗްޑީސީން ބުނީ، މިކަމަށްޓަކައި އިންޓަނެޓާއި ޓީވީގެ ހިދުމަތްދޭ ފަރާތްތަކުން އެއް ވިއުގައެއް މެދުވެރިކޮށް ހިދުމަތްތައް ދެވޭގޮތަށް އޯޕަން އެކްސެސް ނެޓްވޯކެއް ގާއިމްކުރެވި، އޭގެ ހިދުމަތްތައް ތައާރަފް ކުރުމުގެ މަސައްކަތްތައް ކުރިއަށްދާ ކަމަށެވެ. އަދި ދެވަނަ ފިޔަވަހީގައި ފޯނުގެ ހިދުމަތްތައް ރަނގަޅު ކުރުމުގެ ގޮތުން ޓެލެކޮމް ހުރިހާ ކުންފުންޏަކުންވެސް އެއްޓަވަރުތަކެއް ބޭނުންކޮށްގެން ޚިދުމަތް ދެވޭފަދަ މުއާސަލާތީ ޓަވަރު ތަކަކާއި، ސްޓްރީޓް އަދި ރޫފްޓޮޕް ޕޯލް ތަކެއް ޖެހުމުގެ މަސައްކަތްތައްވެސް ކުރިއަށްދާކަމަށް ބުންޏެވެ.
އެ ކޯޕަރޭޝަނުން ބުނީ، ޑިޖިޓަލް ޓެކްނޮލޮޖީގެ ބޭނުންކޮށްގެން ހުޅުމާލެ ސްމާޓް ސިޓީއަކަށް ހެދުމަށްޓަކައި ގިނަގުނަ މަސައްކަތްތަކެއް ކުރަމުންދާ ކަމަށެވެ
