އަންހެން ކުދިންނަށް އަމާޒުކޮށްގެން ކުރިއަށް ގެންދާ "ކޮމްޕިއުޓާ ކޯޑިން ފޯ ބިގިނާސް 2021" ގައި ބައިވެރިވުމުގެ ފުރުސަތު ހުޅުވާލައިފިއެވެ.
އެޗްޑީސީން ބުނީ، މި ޕްރޮގުރާމަކީ ކޮމްޕިއުޓަރު ކޯޑިން ދަސްކުރަން ބޭނުންވާ އަންހެން ކުދިންނަށް އަމާޒުކޮށް "ގާލް.ޕަވާޑް" ގެ ނަމުގައި އެޗްޑީސީއާއި ވިމެން އިން ޓެކް މޯލްޑިވްސްއާ ގުޅިގެން ކުރިޔަށް ގެންދިޔުމަށް ހަމަޖެހިފައިވާ ޕްރޮގްރާމެއް ކަމަށެވެ.
މި ޕްރޮގްރާމްގެ މަގުސަދަކީ އަންހެން ކުދިން ބާރުވެރިކުރުމަށާއި ހުޅުމާލެއަކީ ސްމާޓް ސިޓީއަކަށް ހެދުމަށްޓަކައި ޓެކްނޮލޮޖީގެ ޒަރީއާ އިން އެފަދަ ބަދަލުތައް ސިޓީއަށް ގެނެވޭނެގޮތް ކުދިނަށް ދަސްކޮށްދިނުމާއެކު މި ދާއިރާއަށް އަންހެން ކުދިންގެ ޝައުގުވެރިކަން އިތުރުކުރުން ކަމަށް އެޗްޑީސީން ބުނެއެވެ.
އެޗްޑީސީން ބުނީ މި ޕްރޮގްރާމް ކުރިއަށް ގެންދިއުމަށް ހަމަޖެހިފައި ވަނީ ގްރޭޑް 6 އަދި ގްރޭޑް 7 ގައި ކިޔަވަމުންދާ ދަރިވަރުންގެ ތެރެއިން ފުރަތަމަ ފޯމް ހުށަހަޅާ 20 ކުދިން ހިމަނައިގެން ކަމަށެވެ.
މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ މިމަހު 8 ވަނަ ދުވަހުން ފެށިގެން އަންނަ މަހު 6 ވަނަ ދުވަހާ ހަމަޔަށް އޮންލައިންކޮށް ކަމަށް އެޗްޑީސީން ވަނީ ބުނެފައެވެ.
.އެޗްޑީސީން ބުނީ "ކޮމްޕިއުޓަ ކޯޑިން ފޯ ބިގިނާސް 2021" ގައި ބައިވެރިވުމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައި ވަނީ އޮންލައިންކޮށް ގޫގްލް ލިންކް މެދުވެރިކޮށް ކަމަށެވެ. މި ޕްރޮގްރާމްގައި ބައިވެރިވުމަށް ޝައުގުވެރިވާ ކުދިން މިމަހު 7 ވަނަ ދުވަހުގެ 15:00 ގެ ކުރިން އޮންލައިންކޮށް ފޯމު ހުށައެޅުމަށް އެޗްޑީސީން ވަނީ އެދިފައެވެ.
