Anna aharah 36.9 billion rufiyaage budget eh hushahalhaifi

ތަރައްގީގެ މަޝްރޫއުތަކަށް ހަ ބިލިއަން ރުފިޔާ ހިމަނާ އަންނަ އަހަރުގެ ބަޖެޓުގެ ގޮތުގައި ދައުލަތުން 36.9 ބިލިއަން ރުފިޔާގެ ބަޖެޓެއް ހުށަހަޅައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ބަޖެޓް ބަޔާން ހުށަހަޅުއްވަމުން، ފިނޭންސް މިނިސްޓަރު އިބްރާހީމް އަމީރު ވިދާޅުވީ، އަންނަ އަހަރަށް ދައުލަތުން ހުށަހަޅާ ބަޖެޓަކީ ފުދުންތެރި ދައުލަތެއް ބިނާކޮށް، ރާއްޖޭގެ އިގްތިސޯދު ފުޅާކޮށް، ރައްޔިތުންނަށް ފާގަތި ދިރިއުޅުމެއް ހޯދައިދޭނެ ބަޖެޓެއް ކަމަށެވެ.

އެގޮތުން، އަންނަ އަހަރުގެ ބަޖެޓުގައި ސަރުކާރުގެ ވައުދުތައް ފުއްދުމަށް ބޭނުންވާ މަޝްރޫއުތަކުގެ 90 ޕަސެންޓަށް ވުރެ ބޮޑުބައެއް ހިމެނޭނެ ކަމަށާއި، އޭގެ ތެރެއިންވެސް 650 އަށް ވުރެ ގިނަ މަޝްރޫއު ނިމިފައިވާއިރު، 500 އާއި ގާތްކުރާ އަދަދަކަށް މަޝްރޫއުތަކުގެ މަސައްކަތް ކުރެވެމުންދާ ކަމަށްވެސް، މިނިސްޓަރު އަމީރު ވިދާޅުވިއެވެ.

އާމްދަނީ އާއި ހިލޭ އެހީގެ ގޮތުގައި އަންނަ އަހަރު 24.2 ބިލިއަން ރުފިޔާ ލިބޭނެ ކަމަށް ވަނީ ލަފާކޮށްފައެވެ. އެހެންކަމުން މިއީ 9.7 ބިލިއަން ރުފިޔާގެ ޑެފިސިޓް ބަޖެޓަކަށްވާއިރު، އުފެއްދުންތެރިކަމުގެ ނިސްބަތުން މިއީ 11.1 ޕަސެންޓުގެ ޑެފިސިޓެކެވެ.

އެއާއެކު، އަންނަ އަހަރުގެ ބަޖެޓު ފައިނޭންސް ކުރުމަށް ޖުމްލަ 13.4 ބިލިއަން ރުފިޔާ ދައުލަތުން ހޯދަން ޖެހެއެވެ. އޭގެ ތެރޭގައި ބަޖެޓް ޑެފިސިޓްގެ ގޮތުގައި ހިމެނޭ 9.7 ބިލިއަން ރުފިޔާ އާއި، ލޯނު އަނބުރާ ދެއްކުމަށް ބޭނުންވާ 2.9 ބިލިއަން ރުފިޔާ އާއި އެހެނިހެން ގޮތްގޮތުން ބޭނުންވާ 805 މިލިއަން ރުފިޔާ ހިމެނެއެވެ.