ހުޅުމާލެ ފޭސް 2ގައި ހުރި ހިޔާ ފްލެޓް ޓަވަރެއްގެ ތިރީގައި ފުރަތަމަ ފިހާރަ ހުޅުވައިފިއެވެ.
އެޗްޑީސީން ބުނީ އެ ފިހާރަ ހުލުވާފައި ވަނީ ހިޔާގެ 12 ވަނަ ޓަވަރުގެ ތިރީ ބުރީގައި ކަމަށާ އެ ފިހާރައަށް ކިޔަނީ "އެޗްސީޔޫ މާޓު" ކަމަށެވެ.
މިއަދުން ފެށިގެން އެ ފިހާރައިން ހިދުމަތް ލިބެމުން ދާއިރު އެ ފިހާރައިން ކާބޯތަކެތީގެ ބާވަތްތައް ލިބެން ހުންނާނެ ކަމަށް އެޗްޑީސީން ވަނީ ބުނެފައެވެ.
ހިޔާ ފްލެޓް ސަރަހައްދުގައި ހުޅުވި ފުރަތަމަ ފިހާރައިގެ ސަބަބުން ފްލެޓްތަކުގައި ދިރިއުޅޭ މީހުންނަށް ލުއި ފަސޭހަ ވެގެންދާނެއެވެ.
ހިޔާ ފްލެޓް ލިބުނު ގިނަ އާއިލާތަކެއް ދަނީ ފްލެޓްތަކަށް ދިރިއުޅުން ބަދަލު ކުރަމުންވެ. އެގޮތުން 200 ޔުނިޓެއްގައި މިހާރު މީހުން ދިރިއުޅޭ އިރު 4000 ޔުނިޓެއްގައި ފިނިޝިން މަސައްކަތް ކުރަމުން އެބަދެއެވެ.
ފްލެޓުތަކަށް މީހުން ބަދަލު ވަމުން ދާ އިރު ފޭސް 2 ގައި އަސާސީ ގިނަ ހިދުމަތްތައް ލިބެން ނެތުމުން އާންމުން އަންނަނީ ކަންބޮޑުވުން ފާޅު ކުރަމުންނެވެ.
އެޗްޑީސީން ބުނެފައި ވަނީ މީހުން ބަދަލުވެ ދިރިއުޅެން ފަށަން ވާއިރަށް ކަރަަންޓާއި ފެނާއި އިންޓަނެޓްގެ ހިދުމަތް ފަސޭހައިން ލިބޭނެ އިންތިޒާމްތައް ހަމަޖައްސަން މަސައްކަތް ކުރާ ކަމަށެވެ. އަދި މިހާރު އާންމު ދަތުރުފަތުރަށް ފަސޭހައަށް 2 ބަސް ސްޓޮޕެއް ހަދާ ދަނީ ބޭނުން ކުރަމުންނެވެ. އޭގެ އިތުރުން ފުލެޓްތަކަށް ދާން އޮންނަ މަގުތައް ހެދުމުގެ މަސައްކަތްވެސް ބާރަށް ކުރަމުން އެދެއެވެ.
އޭގެ އިތުރުން 3 ސްޕަމާޓަކާއި، ކެފޭއާއި ބޭސްފިހާރައާއި އެހެނިހެން އަސާސީ ހިދުމަތްތައް ގާއިމު ކުރުމުގެ މަސައްކަތްތައް ކުރިއަށް ދާ ކަމަށް އެޗްޑީސީން ބުނެއެވެ.
އަދި ފްލެޓް ސަރަހައްދުގެ ސެކިޔުރިޓީ ހަރުދަނާ ކުރުމަށް ފްލެޓްތަކުގެ ތިރީގައި 2 ޕޮލިސް ޕޯސްޓް ހެދުމާ، ފޭސް 2 ގައި ޕޮލިސް ސްޓޭޝަނެއް ހެދުމުގެ މަސައްކަތްވެސް ކުރިއަށް ދާނެ ކަމަށް އެ ކުންފުނިން ވަނީ ބުނެފައެވެ.
