ރޭ އިންގްލިޝް ޕްރިމިއާ ލީގުގައި އެވަޓަންއާއި މެންޗެސްޓާ ސިޓީ ވާދަކުރި މެޗުން 1-3 އަކުން ސިޓީ ކާމިޔާބުކޮށް ލީގު ތާވަލުގެ އެއްވަނައިގައި އޮވެ 10 ޕޮއިންޓްގެ ލީޑެއް ނަގައިފިއެވެ.
އެވަޓަންގެ ދަނޑުގައި ރޭ ކުޅުނު މެޗުގައި ފުރަތަމަ ލަނޑު ޖެހި ސިޓީންނެވެ. މެޗުގެ 32 ވަނަ މިނެޓްގައި މި ލަނޑު އެޓީމަށް ކާމިޔާބުކޮށް ދިނީ ހުނަރުވެރި ޒުވާން ކުޅުންތެރިޔާ ފިލް ފޯޑަންއެވެ.
އެހެން ނަމަވެސް މެޗުގައި ވަރުގަދަ ކުޅުމެއް ދައްކަމުން އައި އެވަޓަންއިން 37 ވަނަ މިނެޓްގައި ލަނޑެއް ޖަހާ ސްކޯ ހަމަހަމަ ކުރިއެވެ. މިލަނޑު އެޓީމަށް ކާމިޔާބުކޮށް ދިނީ ރިކާލްސަންއެވެ.
މެޗުގެ ފުރަތަމަ ހާފް ނިމުނީ 1-1 އަކުން ސްކޯ އެއްވަރުވެގެން އޮވެއެވެ.
ދެވަނަ ހާފް ފަށައިގެން އައި އިރު ސިޓީން ވަރުގަދަ ކުޅުމެއް ދެއްކިއެވެ. މެޗުގެ 63 ވަނަ މިނެޓްގައި އެޓީމުގެ ރިޔާޒް މަހްރޭޒް ޖެހި ލަނޑާއެކު ސިޓީއަށް މެޗުގައި އަނެއްކާވެސް ކުރި ލިބުނެވެ. އަދި 77 ވަނަ މިނެޓްގައި ބާނާޑޯ ސިލްވާ ޖެހި ލަނޑާއެކު ނަތީޖާ ކަށަވަރުވިއެވެ.
މި މޮޅާއި އެކު ސިޓީ މިވަނީ އެންމެ ފަހުން ކުޅުނު 12 މެޗުން ވެސް ޖެހިޖެހިގެން މޮޅުވެ ލީގު ތާވަލުގައި އެޓީމާއި އެންމެ ގާތުގައި އޮތް ޔުނައިޓެޑަށް ވުރެ 10 ޕޮއިންޓް ކުރިއަށް ޖެހިލާފައެވެ. އެއީ ކުޅުނު 24 މެޗުން 56 ޕޮއިންޓް ހޯދައިގެންނެވެ. ލީގުގައި ބާކީ 14 މެޗު ދެން އޮތް އިރު އެހެން ޓީމަކަށް ސިޓީއާ އަރާ ހަމަކުރެވޭނެ ކަމަށް ގިނަ ޕަންޑިޓުން ގަބޫލެއް ނުކުރެއެވެ.
ރޭ ސިޓީ އަތުން ބަލިވި އެވަޓަން އޮތީ 37 ޕޮއިންޓާއި އެކު ތާވަލުގެ 7 ވަނައިގައެވެ.
