މިއަހަރުގެ ސްޓޫޑެންޓް ލޯނަށް ހުޅުވާލުމަށް ކުރަން ޖެހޭ މަސައްކަތްތަކުގެ ތެރެއިން ލޯނަށް ހުށައެޅުމަށް ޕޯޓަލް ތައްޔާރުކުރުމާއި، އުސޫލުތައް ހެދުމުގެ މަސައްކަތް މިހާރު ކުރަމުންދާކަމަށް މިނިސްޓާ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓް ޑރ. އަލީ ހައިދަރު ވިދާޅުވެއްޖެއެވެ.
މިނިސްޓަރު މިހެން ވިދާޅުވެފައިވަނީ މިއަދު ހެނދުނު ނޫސްވެރިންނާ ބައްދަލު ކުރައްވައެވެ.
އެގޮތުން މިނިސްޓަރު ވިދާޅުވީ މިއަހަރު ސްޓޫޑަންޓް ލޯނަށް ހުޅުވާލުމުގެ ކުރުމުގެ ކުރިން ބޮޑެތި ބަދަލު ތަކެއް ގެނައުމުގެ މަސައްކަތް ސަރުކާރުން ކުރަމުންދާކަމަށެވެ. އެގޮތުން ސްޓޫޑެންޓް ލޯނަށް ހުޅުވާލަނީ މިއަހަރު އެޕްލިކޭޝަން ޑެޑްލައިނަކާ ނުލާ ކަމަށް މިނިސްޓަރު ހާމަކުރެއްވިއެވެ. މީގެ ސަބަބުން ކުރިން ދަރިވަރުންނަށް ވަކި މުއްދަތެއް ދިނުމުން ލޯނަށް ހުށައެޅުމަށް ދަރިވަރުންނަށް ކުރިމަތިވާ އުނދަގޫތަކާއި، ވަކި މުއްދަތެއްގެ ތެރޭގައި އެޕްލައި ނުކުރެވުން ފަދަ ކަންކަމަށް ލުޔެއް ލިބިގެންދާނެކަމަށް އުއްމީދު ކުރާކަމަށް މިނިސްޓަރު ވިދާޅުވިއެވެ.
މިބަދަލާއެކު ދަރިވަރުން ލޯނަށް އެޕްލައި ކުރަންވާނީ ކިޔަވަން ތައްޔާރުވެގެން ކަމަށް މިނިސްޓަރު ވިދާޅުވިއެވެ. އެގޮތުން ޕްލޭސްމަންޓް ލެޓާ، އެމްކިއުއޭއިން ދޫކުރާ އިންޓެންޑެޑް ޕްރޮގްރާމް ރެކޮގްނިޝަން ލިޔެކިޔުންތަކާއި، މަސައްކަތް ކުރުމަށް ރެގިއުލޭޓަރީ އޮތޯރިޓީއަކުން ހުއްދަ ދޭ ދާއިރާއަކުން ކިޔަވާނަމަ އެ ފުރިހަމަ ކުރާ ޕްރޮގްރާމަކީ އެ އޮތޯރިޓީއަކުން ހުއްދޭ ޕްރޮގްރާމެއްކަން އަންގައިދޭ ލިޔެ ކިޔުން ހުށައަޅަން ޖެހޭނެކަމަށް މިނިސްޓަރު ވިދާޅުވިއެވެ. މީގެއިތުރުން ފީ ސްޓްރަކްޗާއެއް ހުށައެޅުމުން ލޯނުގެ ކަންކަން ހަމަޖެއްސުމަށް އަވަސްވެގެން ދާނެކަމަށްވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ލޯނު ފައިސާ އަނބުރާ ދައްކާއިރު އިތުރު ސާވިސް ޗާޖެއް ނުނަގާ ގޮތަށް މިދިޔަ އަހަރު ސަރުކާރުން ނިންމާފަ އޮތްކަމަށާއި، ހަމަ މިއަހަރު ލޯނު ދޫކުރާނީ ވެސް މި އުސޫލުގެ ދަށުންކަމަށެވެ.
މިނިސްޓަރު ވިދާޅުވީ މިފެށޭ ބަންދުތަކަށް ފަހު ފެށޭ ހަފްތާގައި ސްޓޫޑަންޓް ލޯނަށް ހުޅުވާލާނެކަމަށާއި، ލޯނަށް އެދޭ ދަރިވަރުންގެ ލިޔެކިޔުންތައް ހަމަކޮށް ތައްޔާރުވެ ތިބުމުން، އެލިޔެކިޔުންތަކާއެކު ފުރިހަމަ އެޕްލިކޭޝަނެއް ހުށައެޅުމުން ލޯނަށް އެދޭ ދަރިވަރުންނަށް ލޯނު ހަމަޖައްސައިދިނުމަށް އަވަސްވެގެން ދާނެކަމަށެވެ.
