ރަސްމާލޭގައި ހިންގަން ނިންމާފައިވާ މޯލްޑިވަސް ވޯޓާފްރަންޓް އެންޑް މެރީނާ މަޝްރޫއު ރޭވިފައިވާ ގޮތުން، މުސްތަގުބަލުގައި ރާއްޖެއަށް އެތައް ގޮންޖެހުންތަކާ ކުރިމަތިލާންޖެހޭނެ ކަމަށް ކުރީގެ ރައީސް އިބްރާހީމް މުހައްމަދު ސޯލިހް ވިދާޅުވެއްޖެއެވެ.
ސޯލިހް ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ފާހަގަކުރެއްވި ގޮތުގައި، ރަނގަޅު ވިޔަފާރި މުއާމަލާތެއްގައި މުދާ ވިއްކާ ފަރާތާއި ގަންނަ ފަރާތަށް ނުވަތަ ކުއްޔަށް ދޭ ފަރާތާއި ހިފާ ފަރާތަށް ވެސް އެއްފަދައަކުން ފައިދާވާން ޖެހޭނެއެވެ. ނަމަވެސް، ރަސްމާލޭން 500 ހެކްޓަރުގެ ބިން އީގަލް ހިލްސްއަށް ހިލޭ، ދާއިމަށް ދިނުމުގައި އެ އުސޫލު ފެންނަން ނެތް ކަމަށާއި، މި މުއާމަލާތުން އިންތިހާއަށް ބޮޑު ފައިދާއެއް ލިބެމުންދަނީ އީގަލް ހިލްސްއަށް ކަމަށް އެމަނިކުފާނު ވިދާޅުވިއެވެ.
ދިވެހި ރައްޔިތުންގެ ފައިސާއިން 700 މިލިއަނަށް ވުރެ ގިނަ ޑޮލަރު ހަރަދުކޮށްގެން ބިން ހިއްކާއިރު، އޭގެ ތެރެއިން 500 ހެކްޓަރުގެ ބިން އީގަލް ހިލްސްއަށް ދޫކުރަނީ މުޅިން ހިލޭކަން ފާހަގަކޮށް ސޯލިހް ވިދާޅުވީ މި މަޝްރޫއުގެ ސަބަބުން ދައުލަތަށް ލިބެންޖެހޭ އެކަށީގެންވާ މާލީ ފައިދާއެއް ފެންނަން ނެތް ކަމަށެވެ.
އީގަލް ހިލްސްއިން އަޅާނެ ކަމަށް ބުނާ 5,000 ހައުސިން ޔުނިޓް އަލުން ދިވެހި ސަރުކާރުން ގަންނަންޖެހޭގޮތަށް ރޭވިފައިވުމަކީ އިތުރު ބުރައެއް ކަމަށް ސޯލިހް ވިދާޅުވިއެވެ. މި ސަބަބުތަކާހުރެ، މި ޕްރޮޖެކްޓް މިހާރު ރޭވިފައިވާ ގޮތަށް ކުރިއަށް ގެންދިއުމުގެ ސަބަބުން މުސްތަގުބަލުގައި މުޅި ގައުމަށް ބޮޑެތި ގޮންޖެހުންތަކާ ކުރިމަތިވެދާނެ ކަމަށް ވިދާޅުވެ، އެމަނިކުފާނު ވަނީ މި މަޝްރޫއު މިހާރު ހުއްޓާލުމަށް ސަރުކާރަށް އިލްތިމާސްކުރައްވާފައެވެ.
ސޯލިހް މިހެން ވިދާޅުވެފައިވާއިރު، އެމްޑީޕީގެ ރައީސް މުހައްމަދު ނަޝީދު ވިދާޅުވީ އެމްޑީޕީގެ ފަރާތުން ރަސްމާލެ މަޝްރޫއު މުޅިން ކުށްވެރި ނުކުރާ ކަމަށާއި، ނަމަވެސް އެ މަޝްރޫއު ހިންގާފައިވާގޮތާއި މާލީ އަދި ތިމާވެށީގެ ގޮތުން ހުރި ކަންބޮޑުވުންތަކާ މެދު ސަމާލުވާންޖެހޭނެ ކަމަށެވެ.
