ޖެނުއަރީ މަހު ކުޑަކުދިންނަށް އަނިޔާކުރުމުގެ 64 މައްސަލަ ސޯޝަލް އެންޑް ފެމިލީ ޑެވެލޮޕްމެންޓު މިނިސްޓްރީ އަށް ހުށަހަޅާފައިވާކަން އެ އިދާރާއިން އާންމުކުރި ތަފާސްހިސާބުން ދައްކައިފިއެވެ.
މިނިސްޓްރީގެ ތަފާސްހިސާބުން ދައްކާގޮތުގައި ނިމިިދޔަ ޖެނުއަރީ މަހު ކުޑަކުދިންނަށް އަނިޔާކުރުމުގެ 64 މައްސަލަ ހުށަހަޅާފައިވާއިރު އޭގެތެރެއިން އެންމެ ގިނައީ އިހުމާލުވުމުގެ މައްސަލަތަކެވެ. އެގޮތުން އިހުމާލުވުމުގެ ޖުމްލަ 30 މައްސަލައެއް ރިޕޯޓުކޮށްފައިވާއިރު، އެއީ ފިރިހެން ކުދިންނާއި ގުޅޭ 19 މައްސަލައަކާއި އަންހެން ކުދިންނާއި ގުޅޭ 11 މައްސަލަކަމަށް ސޯޝަލް އެންޑް ފެމިލީ ޑެވޮލޮޕްމެންޓު މިނިސްޓްރީން ވަނީ ބުނެފައެވެ.
ދެން އެންމެ ގިނައިން ރިޕޯޓުކޮށްފައިވަނީ ޖިންސީ ހާނިއްކައިގެ މައްސަލަތައްކަމަށް ތަފާސްހިސާބުން ދައްކައެވެ. އެ ގޮތުން ޖިންސީ ހާނިއްކައިގެ 13 މައްސަލައެއް ވަނީ ރިޕޯޓުކޮށްފައެވެ.
ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުނަށް އަޅައިލުމާއި އެހީތެރިވުމާއި ގުޅޭ 08 މައްސަލައެއް ހުށަހާފައިވާއިރު، އެއީ ފިރިހެނުންނާ ގުޅޭ 2 މައްސަލައާއި އަންހެނުންނާ ގުޅޭ 6 މައްސަލަކަމަށެވެ.
އިތުރަށް އެ މިނިސްޓްރީން ބުނީ ޖެނުއަރީ މަހު އެ މިނިސްޓްރީގެ ހެލްޕްލައިނަށް 1964 ކޯލު ލިބިފައިވާކަމަށާއި، އޭގެތެރެއިން 97 ކޯލަކީ ކުޑަކުދިންގެ ފަރާތުން ލިބިފައިވާ ކޯލުތައްކަމަށެވެ.
މިވަގުތުވެސް ސަރުކާރުގެ ބެލުމުގެ ދަށުގައި 151 ކުދިން ތިބިކަން ފާހަގަކޮށް އެ މިނިސްޓްރީން ބުނީ އޭގެތެރޭގައި ހިމެނެނީ 83 ފިރިހެން ކުދިންނާއި 68 އަންހެން ކުދިން ކަމަށެވެ.
