ރަމަޟާން މަހަކީ މުސްލިމުންނަށް އަންނަ ބަރަކާތުން ފުރިގެންވާ އުފާވެރި މައްސަރެކެވެ. ރޯދަ މަހުގެ ހާއްސަކަމާއެކު، އެ މަހަށް ދުރާލާ ތައްޔާރުވުމަކީ އަބަދުވެސް މުސްލިމުން ވަރަށް ބޮޑު އިސްކަމެއް ދޭކަމެކެވެ. ރޯދަ ހިފުމުގެ ސަބަބުން ސިއްހީ ގިނަ ގުނަ ފައިދާތައް ލިބިގެން ދެއެވެ. ހަށިގަނޑު ރީބޫޓުކޮށް ވިހަ މާއްދާތައް ނައްތާލަން އެހީވެދެ އެވެ. ސިއްހަތަށް ގެއްލުން ހުރި ފެޓް އަދި ކެންސަރަށް މަގުފަހިވާ ކެމިކަލްތައް ހަށިގަނޑުން ދުއްވާލަން އެހީވެދެއެވެ. އެކަމަކު ރޯދައިގެ ސަބަބުން ލިބޭ ސިއްހީ ފަައިދާ އެންމެ ރަނގަޅު ގޮތުގައި ހޯދުމަށްވެސް ދުރާލާ ތައްޔާރުވާން ޖެހެއެވެ.
ކެއުން ބުއިމުގެ އާދައަށް އަންނަ ކުއްލި ބަދަލާ އެކު ރޯދަ މަހުގައި ސިއްހީ ގޮތުން ގިން ގޮންޖެހުންތައް ބައެއް މީހުންނަށް ދިމާވެއެވެ. ގިނަ ފަހަރު މިފަދަ ސިއްހީ މައްސަލަތަކަކީ ކެއިންބުއިމާ، އާންމު ދިރިއުޅުމުގެ ވައްޓަފާޅީގައި ހުންނަ ނޭދެވޭ އާދަކާދަތަކުން ދިމާވާ މައްސަލަތަކެވެ.
މަތިން އެރުމާއި މޭއެންދުން:
މަތިން އެރުމާއި މޭއެންދުމަކީ ރޯދަމަހު ގިނަ ބަޔަކަށް ދިމާވާ ވަރަށް އާންމު މައްސަލައެކެވެ. މިކަމުގެ ވޭން ބައެއް ފަހަރު އިންތިހާއަށް ގަދަވެގެންދެއެވެ. ބައެއް ފަހަރު މިއީ، ކެއުން މަދުވެ، ކެއުމުގެ ދޭތެރެ ދުރުވެ، ހަށިގަނޑުގެ މެޓަބޮލިޒަމް ދަށްވެ، ބަނޑުގައި މާގިނައިން ގޭސް އުފެދުމުގެ ސަބަބުން ދިމާވާ ކަމެކެވެ. އަދި މާ ކުޅިކޮށް ކެއުމާ، ހަވާދުލީ ތަކެތި ބޭނުންކުރުމާ، ތެލާއި ސަރުބީ އެކުލެވޭ ތަކެތި ބޭނުންކުރުމާ، މާގިނައިން ކޮފީ ބުއިމާ، އެނާޖީ ޑްރިންކްސް އަދި ދުންފަތުގެ އިސްތިއުމާލު ކުރުމަކީވެސް މޭ އެންދުމަށް ދިމާވާ ސަބަބުތަކެވެ.
ރޯދަމަހުގެ މެނޫގައި ވީހާވެސް ބޮޑަށް ފިހެފައި ހުންނަ، ކާނާ ހިމެނުމަކީ މި މައްސަލައަށް ލިބިގެން ދާނެ ހައްލެކެވެ. ރޯދަމަހު ކުޅިކޮށް ކެއުމާއި، ހަވާދުގެ ބާވަތްތައް މާގިނައިން ބޭނުން ކުރުމުން ދުރުވާންޖެހެއެވެ. މީގެ އިތުރުން ޕޯޝަން ކޮންޓްރޯލްކޮށް، މަދުން ކެއުމަކީވެސް ކުރެވިދާނެ ކަމެކެވެ. ޕްލައިން ޔޯގަޓަކީވެސް މޭއެންދުމަށް ލިބިގެންދާނެ ފަރުވާއެކެވެ. އަދި ކެއުމަށްފަހު ވަގުތުން އޮށޯތުމުގެ ބަދަލުގައި 30 މިނިޓް ވަންދެން ހިނގާލުމަކީވެސް މުހިއްމު ކަމެކެވެ.
މާ ގިނައިން ކެއުމާއި ހަޖަމު ކުރުމަށް ދިމާވާ މައްސަލަ:
ރޯދަ މަހު ކެއުމަށްފަހު ބަނޑު ފުއްޕާފައި ހުރުން، ވަރުބަލިވެ އަވަހަށް އޮށޯންނަން ބޭނުންވުން ނުވަތަ ނިދަން ބޭނުންވާ ކަމަށް ވާނަމަ، އެއީ މާގިނައިން ކެއުމާއި ހަޖަމު ނުކުރެވުމުގެ ސަބަބުން ދިމާވާ މައްސަލައެއް ކަމުގައި ބެލެވެއެވެ. މި މައްސަލަ ހައްލުކުރުމަށް ކާއެއްޗެއްސާ އެކު ފެން ބުއިން ހުއްޓާލަން ޖެހެއެވެ. އޭގެ ބަދަލުގައި ކެއުމުގެ ކުރިން ފެން ނުވަތަ ސޫޕް ބޯނަމަ ކާން ފެށުމުގެ ކުރިން ކުޑައިރުކޮޅެއް ވަންދެން މަޑުކޮށްލާށެވެ.
ހަޖަމުކުރަން އުދަގޫވެ، ބަނޑަށް އުދަގޫވާ ނަމަ ކެއުމުގައި ބިސް، ކޮލިފްލާވާ، އަދި ކެބެޖް ފަދަ ކާނާ ކެއުމުން ދުރުހެލިވުން މުހިއްމެވެ. އަދި ގިނަ އިރުވަންދެން ހުސްބަނޑާ ހުރުމަށް ފަހު ތަރުކާރީ ކާއިރު ކައްކާފައި ހުންނަ ތަރުކާރީ ކެއުމަކީ ފަސޭހައިން ހަޖަމުކުރުމަށް ލިބޭ ބޮޑު އެހީއަކަށް ވެގެންދާނެވެ. މީގެ އިތުރުން ރޯދަވީއްލުމަށް ފަހު މިންޓް ސައި ނުވަތަ ގްރީން ޓީއެއް ބޯލުމަކީވެސް ކުރެވިދާނެ ކަމެކެވެ.
ކޮންސްޓިޕޭޝަން ނުވަތަ ބަނޑު ހަރުވުން:
ރޯދަމަހު ކޮންސްޓިޕޭޝަން ނުވަތަ ބަނޑު ހަރުވުމަކީވެސް ގިނަ ބަޔަކަށް ދިމާވާ މައްސަލައެކެވެ. ރަމަޟާން މަހު ބަނޑަށް އުދަގޫވެ ބަނޑުހަރުވާނަމަ ގިނައިން ދިޔާ ތަކެތި ބުއިމާއެކު، ކޮންމެ ދުވަހެއްގެ ކެއުމުގައި 30 ގްރާމް ފައިބާ ހިމެނުން މުހިއްމެވެ. ކަނދުރަކީ 1.6 ގްރާމް ފައިބާ ހިމެނޭ އެއްޗަކަށްވާއިރު ކޮންމެ ދުވަހަކުވެސް ކަނދުރު ކެއުމަށް އިސްކަންދޭށެވެ.
ރޯދަ ވީއްލުމަށްފަހު 1 ނުވަތަ 2 ގަޑިއިރު ފަހުން، މަދުވެގެން 5 ނުވަތަ 6 ތަށި ފެން ނުވަތަ ހާބަލް ޓީ އެއް ބޯލުމަށް އިސްކަން ދޭށެވެ. މީގެ އިތުރުން ފައިބާ އިތުރުކުރުމަށް މޭވާ އާއި ޑްރައިފުރުޓް ކެއުމަކީވެސް ކުރެވިދާނެ ކަމަށެވެ.
