ކުރީގެ ރައީސް އިބްރާހިމް މުހައްމަދު ސޯލިހާއި އެމްޑީޕީގެ ރައީސް އަބްދުﷲ ޝާހިދު އަމަލު ކުރެއްވި ގޮތުންނާއި ޕާޓީ ތެރޭގެ އެއްބައިވަންތަ ކަން ގާއިމްކުރުމަށް ވަގުތީ ޗެއާޕާސަން މަގާމަށް ވާދަކުރެއްވި ކުރުން އަނބުރާ ގެންނަން ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު ނިންމަވައިފިއެވެ.
ވަހީދުގެ މި ނިންމެވުން ހަމަކުރައްވާފައި ވަނީ، އެމްޑީޕީގެ ރައީސް އަށް ފޮނުއްވި ސިޓީއެއްގައެވެ. ވަހީދު ވިދާޅުވީ، ވަގުތީ ޗެއާޕާސަންގެ މަގާމަށް ކުރިމަތިލައްވަން އޭނާ އަށް ހުށަހެޅުއްވީ ޕާލަމެންޓްރީ ގުރޫޕުގެ މެންބަރެއް ކަމަށާއި ޕާޓީގެ އެޑްވައިޒަރު ކުރީގެ ރައީސް ސޯލިހާއި ޝާހިދަށް މެސެޖު ކުރައްވައި އެ ބޭފުޅުންގެ ހިޔާލު ވެސް ހޯއްދެވި ކަމަށެވެ. އެގޮތުން އެ ދެބޭފުޅުންގެ ތާއީދު ލިބިވަޑައިގެން ކަމަށް ވެސް އޭނާ ފާހަގަކުރެއްވިއެވެ.
ނަމަވެސް އެ ވޯޓާ ހަމައަށް ދިޔަ ވަގުތުއެ ދެބޭފުޅުން އަމަލު ކުރެއްވި ގޮތާއި އަދި އޭގެ ފަހުން ކަންކަން ކުރައްވަމުން ގެންދެވި ގޮތުން ވަގުތީ ޗެއާޕާސަންގެ މަގާމު ފުރުމުގައި ބޮޑެތި ހުރަސްތަކެއް ކުރިމަތިވާނެ ކަމަށް ފެނިވަޑައިގެން ކަމަށް ވަހީދު ވިދާޅުވިއެވެ. ވަގުތީ ޗެއާާޕާސަންގެ މަގާމު އޭނާ ކާމިޔާބު ކުރައްވާފައިވީ ނަމަވެސް އެ ސަބަބުތައް އެހެން އޮތުމުން އެ ވޯޓުގައި ވާދަކުރި ކުރުން އަނބުރާ ގެންނަން ނިންމެވީ ކަމަށް ވެސް އޭނާ ވިދާޅުވިއެވެ. މި ނިންމުމަކީ އެމްޑީޕީގެ އެއްބައިވަންތަކަން ގާއިމް ކުރުމަށް ނިންމެވި ނިންމުމެއް ކަމަށް ވެސް އޭނާ ވިދާޅުވިއެވެ.
މީގެ އިތުރުން ޕާޓީގެ އެޑްވައިޒަރާއި ޕާޓީގެ ރައީސް މި ގޮތަށް އަމަލު ނުކުރެއްވުމަށް ވަހީދު ވަނީ އެދިވަޑައިގެންފައެވެ. އަދި އެމްޑީޕީ ތެރޭގައި އެއްބައިވަންތަކަން ދެމެހެއްޓުމަށް މަސައްކަތް ކުރުމަށް ވެސް އެދިވަޑައިގެންފައި ވެއެވެ.
ވަގުތީ ޗެއާޕާސަންގެ މަގާމަށް ދެ ބޭފުޅަކު ހޮވުމަށް މި މަހުގެ 28 ވަނަ ދުވަހު އެމްޑީޕީން ބޭއްވި ގައުމީ މަޖިލީހުގެ ޖަލްސާގައި ވަނީ އެމްޑީޕީ ތެރޭގައި ހިޔާލުތަފާތުވުންތަކާއެކު ދެބަސްވުމާއެކު ޒުބާބުކޮށް މަސްލަހަތު ގޯސްވެފައެވެ. އެގތުން އެމަގާމަށް ކުރިމަތިލާފައިވާ ވަހީދާއި އައްޑޫ ހިތަދޫ އުތުރު ދާއިރާގެ ކުރީގެ މެންބަރު މުހައްމަދު އަސްލަމްގެ ތެރެއިން ވޯތަށް އަހާފައި ވަނީ ވަހީދުގެ ނަމަށް އެކަންޏެވެ. ވަހީދުގެ ނަން އައިސްފައި ވަނީ ކުރީގެ ރައީސް މުހައްމަދު ނަޝީދުގެ ފެކްޝަނުން ކަމަށް ވާއިރު އަސްލަމްގެ ނަން އައިސްފައި ވަނީ ކުރީގެ ރައީސް އިބްރާހިމް މުހައްމަދު ސޯލިހްގެ ފެކްޝަނުންނެވެ.
އެމްޑީޕީގެ ތެރޭގައި 2022ގައި ދެބަސްވުންތަކާއި ހިޔާލުތަފާތުވުން އައިސް އެމްޑީޕީ ދެބަޔަކަށް ބެހިފައި އޮތް އޮތުން އަދި ވެސް އޮތް ކަން ރޭގެ އެ ޖަލްސާއިން ފެނިގެން ވަނީ ގޮސްފައެވެ. އެގޮތުން ވަހީދަށް ވަނީ 47 މެންބަރުން ވޯޓު ލިބިފައެވެ. އެ ޖަލްސާއަށް 95 މެންބަރަކު ހާޒިރުވެފައިވާ އިރު، ނަން ފާސްވާން 48 ވޯޓު ބޭނުން ވެއެވެ. އެއް ވޯޓު މަދުވުމުން ދެން އަސްލަމްގެ ނަން ހުށަހަޅަން އުޅުމުން މަސްލަހަތު ގޯސްވެ މެންބަރުން އަޑުގަދަ ކުރަން ފެށިއެވެ.
އެއްބައި މެންބަރުން ބުނާ ގޮތުގައި އަސްލަމަކީ ގައުމީ މަޖިލިހުގެ މެމްބަރަކަށް ނުވާތީ އޭނާ އަށް ޗެއާޕާސަންގެ މަސްއޫލިއްޔަތު އަދާ ނުކުރެވޭނެއެވެ. އެހެންކަމުން ވަގުތީ ޗެއާޕާސަންގެ މަގާމު ދިނުމަށް ނަގާ ވޯޓުގައި އަސްލަމްގެ ނަން ނުހިމެނޭނެ ކަމަށް ބުނެ މެންބަރުންގެ މެދުގައި ދެބަސްވުމަކަށް ވަނީ ގޮސްފައެވެ.އަސްލަމްގެ ނަމަށް ވޯޓަށް ނަހައި އެ ބައްދަަލުވުން ނިްނމާލި ފަހުން ވެސް މެންބަރުނގެ މެދުައި ހޫނު ޒުވާބުތަކެއް ވަނީ ހިނގާފައެވެ.
އެމްޑީޕީއަށް ވަގުތީ ޗެއާޕާސަންއެއް އައްޔަން ކުރަން ނިންމާފައި ވަނީ މެއި 14، 2022 ގައި އެމްޑީޕީގެ ޗެއާޕާސަންގެ މަގާމު ފުރުއްވަމުން ވަޑައިގެން ފައްޔާޒް އިސްމާއިލް މި މަހުގެ 24 ވަނަ ދުވަހު އެ މަގާމުން އިސްތިއުފާ ދެއްވުމުންނެވެ. ފައްޔާޒް އިސްތިއުފާ ދެއްވާފައި ވަނީ 2028 ވަނަ އަހަރުގެ ރިޔާސީ އިންތިހާބުގައި ވާދަކުރުމުގެ ޝައުގުވެރިކަން ފާޅުކޮށްފައި ވާތީ، އިސް ސަފުގައި ޕާޓީގެ މަސައްކަތްތައް ކުރިއަށް ގެންދިއުމަށް ބޮޑެތި ގޮންޖެހުންތައް ހުރުމުން ކަމަށް އޭނާ ވަނީ ވިދާޅުވެފައެވެ.
