މިއަހަރު، ސައުދީއިން ހަދިޔާ ކުރި ކަދުރު ބެހުމުގައި މިސްކިތްތަކުގައި ރޯދަ ވީއްލުމުގެ ޕްރޮގްރާމްތައް ހިންގަން ބޭނުންވާ ޖަމިއްޔާތަކަށް ވެސް ކަދުރުން ބައެއް ދޭނިމަށް ހަމަޖެހިފައިވާކަމަށް އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ކޮންމެ ރަމަޟާން މަހަކަށް ސައުދީ ސަރުކާރުން ހަދިޔާކުރާ 50 ޓަނު ކަދުރުގެ ޝިޕްމަންޓް މިދިޔަ ޑިސެމްބަރުމަހު ރާއްޖެއަށް ވަނި ގެނެސްފައެވެ. އަދި އެ ކަދުރު މިހާރު މިނިސްޓްރީއަށް ލިބިފައިވާއިރު މިނިސްޓަރު ވިދާޅުވީ ރޯދަމަހުގެ ކުރީން އެ ކަދުރު ބަހައި ނިންމާނެ ކަމަށެވެ.
މިފަހަރު މުޅިން އަލަށް، ކަދުރު ބެހުމުގައި މިސްކިތްތަކުގައި ރޯދަ ވީއްލުމުގެ ޕްރޮގްރާމްތައް ހިންގަން ބޭނުންވާ ޖަމިއްޔާތަކަށް ވެސް ކަދުރުން ބައެއް ދިނުމަށް ހަމަޖެހިފައިވާއިރު، މިއަހަރު ކަދުރު ބަހާނެ އުސޫލެއް އަދި އާންމުކޮށްފައެއް ނުވެއެވެ.
ސައުދީ އަރަބިއްޔާ ސަރުކާރުން ކޮންމެ އަހަރެއްގެ ރަމަޟާންމަހަށް ވެސް ރާއްޖެއަށް ކަދުރު ހަދިޔާކުރެއެވެ. އެހެންނަމަވެސް ބައެއް އަހަރުތަކުގައި ރޯދަ މަސް ފެށޭ ފަހުން ކަދުރު ބަހާއިރު، އަތޮޅުތެރޭގެ ރަށްތަކުގައި ރޯދަ މަސް ނިމޭފަހުންވެސް ކަދުރު ބަހަން ފަށާފައިވެއެވެ. މިދިޔަ ރޯދަމަހަށް ހާއްސަކޮށް ސައުދީން ހަދިޔާކުރި ކަދުރު ބަހާފައި ވަނީ ރަމަޟާން މަސް ނިމުމާ ގާތްވެފައި ވަނިކޮށެވެ.
