އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ވެސް މަގާމުން ސަސްޕެންޑުކޮށްފިއެވެ.
ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ، ފަޒީލް ރަޝީދު އެމްޑަބްލިޔުއެސްސީގެ ބޯޑުން ސަސްޕެންޑުކޮށްފައިވާކަން ހާމަކޮށް އެ ކުންފުނިން ބުނީ އެޗްޑީސީ އާއި ގުޅޭގޮތުން މޯލްޑިވްސް ޕޮލިސް ސާވިސަސް އިން ކުރިޔަށް ގެންދާ ތަހުގީގަށް ފުރިހަމައަށް އެހީތެރިވުމުގެ ގޮތުން އެކުންފުނީގެ ޑީއެމްޑީ ފަޒީލް ރަޝީދު މިއަދުން ފެށިގެން ހުރިހާ ޒިންމާ ތަކަކުން ވަކިކޮށް އޮފީހަށް ނުނިކުމެވޭ ގޮތަށް ސަސްޕެންޑް ކޮށްފައިވާކަމަށެވެ.
ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް، ވެރިފައި ކުރުމެއް ނެތި ގޯތި ދޫކޮށްފައިވާކަމަށް ތުހުމަތު ކުރެވޭ މައްސަލަ ފެންމަތިވުމައި ގުޅިގެން ޕީސީބީން ވަނީ ފަޒުލް އާއި އެޗްޑީސީގެ އެންމެ ބޯޑު މެންބަރަކު ފިޔަވައި ހުރިހާ ޑިރެކްޓަރުން ސަސްޕެންޑުކޮށްފައެވެ.
އެޗްޑީސީގެ ލިޔެކިޔުންތަކެއް ފޯޖުކޮށް ބިންވެރިޔާ ސްކީމުގެ ދަށުން ގޯއްޗަށް ޝަރުތު ހަމަނުވާ ބަޔަކަށް ހުޅުމާލެ އިން ގޯތިތަކެއް ދިން މައްސަލައިގެ ޖިނާއީ ތަހުގީގެއް ފުލުހުން ފަށާފައިވާއިރު، ފުލުހުން ބުނީ އެ މުއްއްސަސާއިން ބަލަމުން ދަނީ ޑޮކިއުމެންޓުތަކެއް ފޯޖުކޮށްފައިވާ މައްސަލަ ކަމަށެވެ.
