ހުޅުމާލޭގެ ދެވަނަ ފިޔަވަހީގައި ހުންނަ ހިޔާ ފްލެޓްތަކުގައި އަލަށް ހަރުކުރާ 32 ލިފްޓަށް ޖުމްލަ 18.3 މިލިއަން ޑޮލަރު ހަރަދުވާކަން އެޗްޑީސީން މިއަދު ހާމަކޮށްފިއެވެ.
15.42 ގެ ރޭޓުން ބަލަންޏާ 18.3 މިލިއަން ޑޮލަރަކީ 282.19 މިލިއަން ރުފިޔާއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު ވިދާޅުވީ، ހިޔާގެ ކޮންމެ ޓަވަރެއްގައި ދެ ލިފްޓު ހަރުކުރަން ޖެހޭ ކަމަށެވެ.
އޭނާ ވިދާޅުވީ ލިފްޓް ހަރުކުރުމުގެ މަޝްރޫއުގެ ހުރިހާ ކަމެއް ބަލަހައްޓަނީ އެޗްޑީސީން ކަމަށާއި، އަގާއި މަޝްރޫއުގެ މުޅި ކޮމްޕޯނެންޓް ނިންމީ އިކޮނޮމިކް ކައުންސިލުން ކަމަށެވެ.
282.19 މިލިއަން ރުފިޔާ މުޅި މަޝްރޫއަށް ހަރަދުވަންޏާ ކޮންމެ ލިފްޓެއްގެ އަގު އުޅޭނީ 8.82 މިލިއަން ރުފިޔާއަށެވެ. އޭރުން ކޮންމެ ލިފްޓަކަށް 571،984.43 އެމެރިކާ ޑޮލަރު ޖެހޭނެއެވެ.
އެޗްޑީސީން ހިޔާ ފްލެޓްތަކުގައި ލިފްޓް ހަރުކުރުމުގެ މަޝްރޫއު ހަވާލުކުރީ ޗައިނާގެ ޝެންޔެން ޔުއަންޑާ އިންޓެލެކްޗުއަލް އިންޑަސްޓްރީ ގްރޫޕާ މިދިޔަ ފެބްރުއަރީ މަހުގައެވެ. މި މަޝްރޫއުގެ ދަށުން ހަރުކުރާ 32 ލިފްޓުގެ ތެރެއިން 16 ލިފްޓަކީ 14 މީހުންގެ ޖާގައިގެ ލިފްޓުތަކެވެ. ބާކީ ލިފްޓުތަކަކީ ސްޓްރެޗަރު އެރުވޭ ވަރުގެ ބޮޑެތި ލިފްތުތަކެވެ.
