މިއަހަރުގެ ފަހު އިންޓަނޭޝަނަލް ބްރޭކަށް ފަހު އިންގްލިޝް ޕްރިމިއާ ލީގުގެ މެޗުތައް މިރޭ އަލުން ފެށި އިރު ޗެލްސީ، އާސަނަލް އަދި ބްރައިޓަން ވެސް މޮޅުވެއްޖެއެވެ.
މިރޭ ފުރަތަމަ ކުޅުނު މެޗުގައި ޗެލްސީ ވަނީ ލެސްޓާ ސިޓީ 2-1 އިން ބަލިކޮށްފައެވެ. މިމެޗުގައި ފުރަތަމަ ލަނޑެއް ޖަހާ ލީޑު ނެގީ ޗެލްސީންނެވެ. އެންޒޯ ފަނާންޑޭޒްގެ އެސިސްޓަކުން މިލަނޑު އެޓީމަށް ޖަހާ ދިނީ ނިކޮލަސް ޖެކްސަންއެވެ. މެޗުގެ ފުރަތަމަ ހާފް ޗެލްސީ ކުރީގައި އޮވެގެން ނިމުނު އިރު މެޗުގެ 75 ވަނަ މިނެޓްގައި އެޓީމުން ވަނީ އިތުރު ލަނޑެއް ޖަހާފައެވެ. މިލަނޑު އެޓީމަށް ޖަހާ ދިނީ އެންޒޯ ފަނާންޑޭޒްއެވެ.
މެޗު ނިމެން ދަނިކޮށް ލެސްޓާއަށް ލިބުނު ޕެނަލްޓީއަކުން އެޓީމުން ވަނީ ސްކޯގެ ފަރަގު ކުޑަކޮށްފައެވެ. އެހެން ނަމަވެސް މެޗު ނިމުނީ ޗެލްސީ މޮޅުވެގެންނެވެ.
މިރޭ ދެން ކުޅުނު މެޗުތަކަށް ބަލާ އިރު އާސަނަލް މިވަނީ ފަސް ލީގު މެޗަށް ފަހު މޮޅުވެ ތިން ޕޮއިންޓް ހޯދާފައެވެ. މިގޮތުން، އާސަނަލްގެ ދަނޑުގައި އެޓީމުން ވަނީ ނޮޓިންގްހަމް ފޯރަސްޓް 0-3 އިން ބަލިކޮށްފައެވެ.
މިމމެޗުގައި އާސަނަލްގެ ފޯވަޑް ބުކާޔޯ ސަކާގެ ފަރާތުން މޮޅު ކުޅުމެއް ފެނިގެން ދިޔަ އިރު އާސަނަލްގެ ފުރަތަމަ ލަނޑު ޖެހީ ވެސް ސަކާއެވެ. އާސަނަލްގެ ދެވަނަ ލަނޑަކީ ސަކާގެ އެސިސްޓެކެވެ. އެހެން ނަމަވެސް އެލަނޑު އާސަނަލްގެ މިޑްފީލްޑަރު ތޯމަސް ޕާޓޭގެ މިލަނޑަކީ ހިތް ގައިމު ލަނޑެކެވެ.
އާސަނަލްގެ އެންމެ ފަހު ލަނޑު އެޓީމަށް ކާމިޔާބުކޮށް ދިނީ އަރަމުން އަންނަ ތަރިއެއް ކަމަށްވާ އީތަން ވަނޭރީއެވެ.
ލީގުގެ ގަދަ ހަތަރަކަށް ވާދަކުރަމުން އަންނަ ޓީމުތަކުގެ ތެރެއިން ބްރައިޓަން ވެސް ވަނީ އަނެއްކާ ވެސް މުހިއްމު މޮޅެއް ހޯދާފައެވެ. މިގޮތުން، ބޯންމޮތްއާ ކުޅެ ބްރައިޓަން ވަނީ 2-1 އިން މެޗު ކާމިޔާބުކޮށްފައެވެ.
މެޗުގެ 4 ވަނަ މިނެޓްގައި ލަނޑު ޖަހާ ލީޑު ނެގީ ބްރައިޓަންއިންނެވެ. މިލަނޑު އެޓީމަށް ކާމިޔާބުކޮށް ދިނީ ހައޯ ޕެޑްރޯއެވެ. އެއަށް ފަހު މެޗުގެ 49 ވަނަ މިނެޓްގައި މިޓޯމާ ވަނީ ލަނޑެއް ޖަހާ ބްރައިޓަންގެ ލީޑު ފުޅާކޮށްފައެވެ.
އެހެން ނަމަވެސް ދެ ރީނދޫ ކަޑު ހަމަވެ ބްރަައިޓަންގެ ބަލެބާއަށް ރަތް ކާޑެއް ދެއްކި ފަހުން ބޯންމޮތްއަށް ލަނޑެއް ޖަހާނެ ފުރުސަތު ލިބުނެއެވެ. މެޗުގެ 93 ވަނަ މިނެޓްގައި ބޯންމޮތުން ލަނޑެއް ޖެހި ނަމަވެސް މެޗުގެ ނަތީޖާ ހަމަހަމަ ކުރާނެ ވަގުތެއް އެޓީމަށް ނުލިބި މެޗު ނިމުނީ ބްރައިޓަން މޮޅުވެގެންނެވެ.
މިރޭގެ މެޗުތަކަށް ފަހު އާސަނަލް، ޗެލްސީ އަދި ބްރައިޓަން ވެސް އޮތީ 22 ޕޮއިންޓްގައެވެ. އެހެން ނަމަވެސް ގޯލުގެ ތަފާތުން ތާވަލުގެ 3 ވަނައިގައި މިވަގުތު އޮތީ ޗެލްސީއެވެ. އަދި ހަތަރު ވަނައިގައި އާސަނަލް އޮތް އިރު ފަސް ވަނައިގައި އޮތީ ބްރައިޓަންއެވެ.
