މާލޭގައި ހިންގަމުން އަންނަ ގޭންގު ކުށްތަކުގެ ތެރެއިން މިދިޔަ މަހުގެ 27 ވަނަ ދުވަހު ކެފޭ ޑި މާލެއަށް ގެއްލުން ދިން މީހުންގެ ތެރޭގައި ހިމެނެނީ 18 އަހަރު ނުފުރޭ ކުޑަކުއްޖަކާއި 18 އަހަރުގެ ޒުވާނެއް ކަމަށް ފުލުހުން ބުނެފިއެވެ.
މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި މި މައްސަލައާ ގުޅިގެން މައުލޫމާތު ހިއްސާ ކުރަމުން ފުލުހުން ބުނީ، އޮކްޓޯބަރު 27 ވަނަ ދުވަހުގެ ހަވީރު 5:53 ހާއިރު، ހެލްމެޓް އަޅައިގެން ދެމިހަކު ގޮސް ކެފޭ ޑި މާލެއަށް ގެއްލުން ދީފައި ވަނީ މަރުތޭލަކުން ކަމަށެވެ. އެގޮތުން އެ ދެ މީހުން އައުމުގެ ކުރިން އެ ކެފޭއަށް އިތުރު މީހަކު އައި ކަމަށާއި އައިސް އެތަނުގެ ވީޑިއޯ ނަގައިގެން އެމީހާ ދިޔަތާ 10 ވަރަކަށް މިނެޓް ވީ ފަހުން ގެއްލުން ދިނުމުގައި އަމަލީ ގޮތުން ބައިވެރިވި ދެމީހުން އައިސްފައިވާ ކަމަށް ފުލުހުން ބުނެއެވެ.
އެ ދެމީހުން ހެލްމެޓް އަޅައިގެން ތިބި އިރު، އެމީހުން ލާފައިވާ އަންނައުނުގެ މަތިން އިތުރު އަންނައުނު ލާފައިވާ ކަމަށާއި، ސާޖިކަލް މާސްކް ވެސް އަޅައިގެން ތިބި ކަމަށް ފުލުހުން ބުނެއެވެ. އެމީހުން މަރުތޭލަކުން އެތަނަށް ގެއްލުން ދީފައިވާއިރު އެތަނުގެ މޭޒަކަށްވެސް ގެއްލުން ދީފައިވެއެވެ. ކޭޝް ކައުންޓަރުގައި ޖަހާފައިވާ ބިއްލޫރިގަނޑު ތަޅާލައި، ހެދިކާ އަޅާފައި ހުރި ޝޯކޭޝްގެ ބިއްޅުރިތައް ތަޅާލައިފައި ވެއެވެ. ކެފޭގައި ހުރި ޕީއޯއެސް މެޝިނާއި، ލޭންޑްލައިން ފޯނަކާއި، ޕްރިންޓަރަކާއި، ފެންއަޅާފައިވާ ބިއްލޫރި ފުޅިތަކަކާއި ބިއްލޫރިތަށިތަކަށް ވެސް ގެއްލުން ދީފައިވާ ކަމަށް ފުލުހުން ބުނެއެވެ.
އެތަނަށް ގެއްލުން ދިން ވަގުތަކީ އެ ކެފޭގައި ކަސްޓަމަރުން ވެސް ތިބި ވަގުތެއް ކަމަށާއި އެއަށްފަހު އެމީހުން އެތަނުން ގޮސް މާލޭގައި ހަދަމުން އަންނަ އިމާރާތެއްގެ ތެރެއަށް ހެލްމެޓާއި މަތިން ލާފައިވާ އަންނައުނު ވަނީ އެއްލާލައިފައި ކަމަށް ފުލުހުން ބުނެއެވެ. އަދި އެތަކެތި ތަހުގީގު ޓީމުން ހޯދާފައިވާ ކަމަށާއި މި މައްސަލައިގައި ދައުވާ ކުރެވޭނެ ވަރަށް ހެއްކާއި ގަރީނާ ހޯދިފައިވާ ކަމަށް ވެސް ފުލުހުން ބުނެއެވެ.
މި މައްސަލައިގައި ހައްޔަރު ކުރީ އަމަލީ ގޮތުން ކެފޭއަށް ގެއްލުން ދިން ދެ މީހުންނާއި، އެމީހުންނާއެކު މި އަމަލު ހިންގާ ރޭވުމުގައި ހަރަކާތްތެރިވި މީހާއެވެ. އެ ގޮތުން ކޯޓު އަމުރެއްގެ ދަށުން އޮކްޓޯބަރު 28 ވަނަ ދުވަހު މި އަމަލު ހިންގުމުގައި އަމަލީ ގޮތުން ހަރަކާތްތެރިވި 18 އަހަރު ނުުވާ ކުއްޖާ ހައްޔަރު ކުރި ކަމަށާއި ޖެހިގެން އައި ދުވަހު ކޯޓު އަމުރެއްގެ ދަށުން 18 އަހަރުގެ މީހާ ހައްޔަރުކޮށްފައިވާ ކަމަށް ފުލުހުން ބުނެއެވެ.
މީގެ އިތުރުން މި އަމަލު ހިންގުމުގައި ރާވައި ވީޑިއޯ ކުރި މީހާ ވަނީ އޮކްޓޯބަރު 29 ވަނަ ދުވަހު ކޯޓު އަމުރެއްގެ ދަށުން ހައްޔަރު ކޮށްފައެވެ. އެއީ އުމުރުން 21 އަހަރުގެ މީހެކެވެ.
ފުލުހުން ބުނީ މި މީހުންނަކީ ޖިނާއީ ކުށްކުރާ ގްރޫޕްތަކާއެކު ހަރަކާތްތެރިވާ މީހުން ކަމަށެވެ. އަދި މިއީ ހުޅުމާލެއާއި މާލޭގައި ގޭންގްތަކުން މަސްތުވާތަކެއްޗާ ގުޅިގެން ހިންގަމުން އަންނަ ސިލްސިލާ ހަމަނުޖެހުންތަކާ ގުޅިގެން ބަދަލު ހިފުމުގެ ރޫހުގައި ހިންގާފައި އަމަލެއް ކަމަށެވެ. މި މައްސަލަ ތަހުގީގު ކޮށް ޕީޖީ އޮފީހަށް ވަރަށް އަވަހަށް ފޮނުވާނެ ކަމަށް ވެސް ފުލުހުން ބުނެއެވެ.
