ފެނަކައިގެ ހާލަތު ރަނގަޅު ކުރުމަށް ސްޓޭޓް ޓްރޭޑިން އޯގަނައިޒޭޝަން ޕަބްލިކް ލިމިޓެޑް (އެސްޓީއޯ) ގެ ސަބްސިޑަރީ ކުންފުންޏެއްގެ ގޮތުގައި ހަމަޖެއްސުން މަޑުޖައްސާލާ މިކަމަށް އިތުރު ހައްލެއް ހޯދުމަށް ނިންމާފައިވާ ކަމަށް ފިނޭންސް މިނިސްޓްރީ އިން ބުނެފިއެވެ.
އެގޮތުން ފިނޭންސް މިނިސްޓްރީ އިން ބުނީ ފެނަކަ އާއި ސްޓެލްކޯއާ އެއްކޮށްލުން ފަދަ އެހެން ހައްލެއް ހޯދުމަށް މަސައްކަތް ކުރަމުން އަންނަ ކަމަށާއި އަންނަ އަހަރު މިކަމަށް ދާއިމީ ހައްލެއް ހޯދޭނެ ކަމަށެވެ.
ފާހަގަކޮށްލެވޭ ގޮތުގައި ފެނަކައިން ތެޔޮ ގަނެގެން އެސްޓީއޯއަށް 2 ބިލިއަން ރުފިޔާ ދައްކަން އޮތް އިރު، އެސްޓީއޯގެ އިތުރުން އެހެން ފަރާތްތަކަށް ދައްކަން ޖެހޭ ފައިސާއާ އެކު ފެނަކައިގެ ދަރަނި 4.1 ބިލިއަން ރުފިޔާއަށް އަރައެވެ.
7،000 އަށް ވުރެ ގިނަ މުވައްޒަފުން ފެނަކައިގައި މަސައްކަތް ކުރަމުންދާއިރު، އެ މުވައްޒަފުންގެ މުސާރައަށް ލިބޭ އާމްދަނީގެ ބޮޑު އިންސައްތައެއް ދަނީ ހޭދަ ކުރަމުންނެވެ. އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހަމަޖެއްސުމުން ފެނަކައިގެ މުވައްޒަފުންގެ އަދަދު ކަނޑައެޅުމުގެ އިހުތިޔާރު އެސްޓީއޯ އަށް ލިބިގެންދާނެއެވެ.
ފެނަކަ އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި ހެދުމަށް ނިމިދިޔަ އޮގަސްޓު މަހު ވަޒީރުންގެ މަޖިލީހުގެ ލަފާފުޅާއެކު ރައީސް ޑރ. މުހައްމަދު މުއިއްޒު ނިންމަވާފައިވަނީ ޔުޓިލިޓީ ސެކްޓަރު ހަރުދަނާކުރުމަށާއި، ރައްޔިތުންނަށް ފޯރުކޮށްދެވޭ ހިދުމަތް ރަނގަޅު ފެންވަރެއްގައި ފޯރުކޮށް ދިނުމާއެކު ފެނަކައިގެ ހިންގުން ހަރުދަނާކޮށް މާލީގޮތުން ބާރުވެރިކުރުމަށްޓަކައި ކަމަށް ރައީސްއޮފީހުން ވަނީ ބުނެފައެވެ.
