ބެލުންތެރިންގެ މެދުގައި ބޮޑު މަގްބޫލުކަމެއް ހޯދި ސިޓްކޮމް "ފްރެންޑްސް" ނެޓްފްލިކްސް އިން ސްޓްރީމްކުރުން ހުއްޓާލަން ނިންމައިފިއެވެ.
ނެޓްފްލިކްސް އިން ބުނާގޮތުގައި މި ސީރީޒް ނެޓްފްލިކްސް އިން ބެލޭނެ އެންމެ ފަހު މުއްދަތަކީ މި މަހުގެ 31 ވަނަ ދުވަހެވެ. މީގެ ހަތަރު އަހަރެއްހާ ދުވަސްކުރިން ވެސް ޝޯ ދެއްކުމުގެ ލައިސަންސް އެކްސްޕަޔާވެގެން ޝޯ ނެޓްފްލިކްސް އިން ދެއްކުން ހުއްޓާލަން ނިންމުމާ ގުޅިގެން ގިނަ ބަޔަކު ވަނީ ސޯޝަލް މީޑިއާގައި ނުރުހުން ފާޅުކޮށްފައެވެ. އެއާއެކު އަލުން ލައިސަންސް އާކޮށް ފްރެންޑް ޝޯ ވަނީ އޭރު ދައްކާފައެވެ. މިފަަހަރުވެސް ޝޯ ދެއްކުން ހުއްޓާލަން އިއުލާންކުރުމާއެކު އާންމުންގެ ގިނަ ބަޔަކު ނުރުހުން ފާޅުކުރަމުން އައި ނަމަވެސް މިފަހަރު ލައިސަންސް އާ ކުރާނެ ކަމުގެ އިޝާރާތެއް ނެޓްފްލިކްސް އިން ދީފައެއް ނުވެއެވެ.
ފްރެންޑްސް އަކީ ގިނަ މީހުން ކޮންމެ ދުވަހަކު ބަލަމުން އަންނަ ސީރީޒެކެވެ. ފްރެންޑްސް އަކީ ގިނަ ބައެއްގެ މެދުގައި ވަރަށް ބޮޑު މަގުބޫލުކަމެއް ހޯދާފައިވާ ޝޯއެކެވެ. 1994 ވަނަ އަހަރު ދައްކަން ފެށި މި ސިޓްކޮމްގައި ޖުމްލަ 10 ސީޒަނެއް ހިމެނޭއިރު ސީރީޒްގެ ފަހު އެޕިސޯޑު އާންމުންނާ ހަމައަށް ގެނެސްދިނީ 2004 ވަނަ އަހަރުގައެވެ. ޖެނިފާ އެނިސްޓަން، މެތިއު ޕެރީ، ކޯޓްނީ ކޮކްސް، މެކް ލެބަންކް، ލީސާ ކުޑްރޯ އަދި ޑޭވިޑް ޝްވިމާ ހަރަކާތްތެރިވެފައިވާ މި ސިޓްކޮމް އަކީ ހަ އެކުވެރިންގެ ދިރިއުޅުން ދައްކުވައިދޭ ހެއްވާ މަޖާ ކަންތައްތަކެއް ހިނގާ ސީރީޒެކެވެ. މި ޝޯގައި ޗޭންދްލާގެ ރޯލު ކުޅުނު މެތިއު ޕެރީ މިދިޔަ އަހަރު މަރުވެފައިވާއިރު އޭނާ މަރުވިތާ އިއްޔެ އަށް ވަނީ އަހަރެއް ފުރިފައެވެ.
