ބޮލީވުޑްގެ އެންމެ ޑިމާންޑް ބޮޑު ތަރިންގެ ތެރޭގައި ހިމެނޭ އެކްޓަރު ކާރްތިކް އާރްޔަން ލީޑު ރޯލުން ފެނިގެންދާ ފިލްމު "ބޫލް ބުލައްޔާ" ގެ ތިން ވަނަ ބައި ނެޓްފްލިކްސްގައި ސްޓްރީމްކުރަން ނިންމައިފިއެވެ.
މިފިލްމު ސިނަމާތަކުގައި އަޅުވައިގެން ބޮކްސް އޮފީހުގައި 417 ކުރޯޑުު (50 މިލިއަން ޑޮލަރު)ގެ އާމްދަނީއެއް ލިބިފައެވެ. 150 ކުރޯޑު (18 މިލިއަން ޑޮލަރު)ގެ ބަޖެޓަކުން އުފެއްދި މި ފިލްމަކީ އަނީސް ބަޒްމީ ޑައިރެކްޓްކޮށްފައިވާ ފިލްމެކެވެ. ހޮރޯ ކޮމެޑީ ޖޯންރާ އަށް ބިނާކޮށްފައިވާ މި ފިލްމަކީ 2022 ވަނަ އަހަރު ގެނެސްދިން "ބޫލް ބުލައްޔާ 2" ގެ ފޮލޯއަޕެކެވެ. މި ފަހަރުގެ ފިލްމުގެ ކާސްޓްގައި ކާތިކް އާއެކު ޓްރިޕްތީ ދިމްރީ އާއި މަދޫރީ ޑިކްސިޓާއި ވިދްއާ ބާލަން ވެސް ހިމެނެ އެވެ. މި ފިލްމު މާދަމާ ނެޓްފްލިކްސްގައި ސްޓްރީމްކުރާނެއެވެ.ފިލްމުގެ ފުރަތަމަ ބައި 2007 ވަނަ އަހަރު އަކްޝޭ ކުމާރު އާއެކު ގެނެސްދިން އިރު ފިލްމުގެ ސީކުއަލް ގެނެސްދިނީ 2022 ވަނަ އަހަރު ކާރްތިކް އާއެކުގައެވެ. ފިލްމުގެ ދެވަނަ ބަޔަށް ބޮކްސް އޮފީހުގައި 2.6 ބިލިއަން އިންޑިއަން ރުޕީސްގެ އާމްދަނީއެއް ލިބުނުއިރު މި ފިލްމު ވެފައިވަނީ އެ އަހަރު ރިލީޒްކުރި ފިލްމުތަކުގެ ތެރެއިން އެންމެ ބޮޑު އާމްދަނީ ހޯދި އެއް ފިލްމަށެވެ. ފިލްމުގެ ދެވަނަ ބައިން ފެނިގެންދަނީ ބާވެ ވީރާނާ ވެފައިވާ ގެއެއްގެ ތެރޭގައި ދިރިއުޅެމުން އަންނަ ޖިންނި އެކެވެ. އެ ގޭގެ ކޮޓަރިއެއްގެ ތެރޭގައި 18 އަހަރު ދުވަސްވަންދެން ބަންދުވެފައިވާ އޮތް މި ޖިންނި މިނިވަންވަނީ އެ ކޮޓަރީގެ ދޮރު އޮޅިގެން ހުޅުވުމުންނެވެ. ފިލްމުގައި ގިނަ ޓްވިސްޓުތަކެއް ފެނިގެންދިޔައިރު މި ފިލްމު ނިމިގެންދިޔައީ ބެލުންތެރިން ހައިރާންކޮށްލުމަށްފަހުއެވެ.
