މިދިޔަ އަހަރު ނުކުތް ކާމިޔާބު ހޮލީވުޑް "ބާބީ"ގެ ލައިވް އެކްޝަން ފިލްމު ނެޓްފްލިކްސް ގައި ސްޓްރީމްކުރާ ގޮތަށް ނިންމައިފިއެވެ.
މި މަހު 21 ވަނަ ދުވަހު ނެޓްފްލިކްސްގައި ސްޓްރީމްކުރަން ހަމަޖެހިފައިވާ މިފިލްމަކީ މިދިޔަ އަހަރު ނެރުނު އެންމެ ކާމިޔާބު އެއް ފިލްމުވެސް މެއެވެ.
މި ފިލްމު ރިލީޒްކުރިތާ ތިން ދުވަސްވީއިރު މި ފިލްމަށް 155 މިލިއަން ޑޮލަރުގެ އާމްދަނީ އެއް ލިބުނެވެ. މިއާއެކު މި ފިލްމު ތާރީހުގެ ތެރެއަށް ވަނެވެ. އިންޓަނޭޝަނަލް ބޮކްސް އޮފީހުގައި 182 މިލިއަން ޑޮލަރު ލިބި، މި ފިލްމަށް ޖުމްލަކޮށް ތިން ދުވަހުން 337 މިލިއަން ޑޮލަރު ލިބިފައި ވެއެވެ. އެއާއެކު މި ފިލްމު އުފައްދަން ކުރި ހޭދަ އެއްކޮށް ކަވަރ ވީއެވެ. ފިލްމުގެ ބަޖެޓަކީ 145 މިލިއަން ޑޮލަރެވެ.
މި ފިލްމުގައި ބާބީގެ ރޯލުން ފެނިގެން ދަނީ މަޝްހޫރު ބަތަލާ މާގޯ ރޯބީއެވެ. އަދި ކެން ގެ ކެރެކްޓާ ކުޅުނީ ހުނަރުވެރި އެކްޓަރު ރަޔަން ގޯސްލިން އެވެ. މިދެތަރިންގެ އިތުރުން ފިލްމުގެ މުހިއްމު ރޯލުތަކުން ފެނިގެންދާ ތަރިންނަކީ އެމެރިކާ ފެރެރާ، ސިމޫ ލޫ، ޑުއާ ލިޕާ، އެމަރަލްޑް ފެނެލް، އިސާ ރޭ، ކޭޓް މެކިނަން، މައިކަލް ސެރާ އަދި ވިލް ފެރެލް އެވެ.
ފިލްމަށް ލިބުނު ކާމިޔާބީ އަށް ފަހު މި ފިލްމުގެ ސީކުއަލެއް ގެންނަން އުޅޭ ވާހަކަ ވަނީ ދެކެވިފައެވެ. މި ފިލްމަށް ބޮކްސް އޮފީހުގައި ވަނީ 1.4 ބިލިއަން ޑޮލަރުގެ އާމްދަނީއެއް ލިބިފައެވެ.
