އެމްއެމްޕީއާރްސީގެ ބޮޑު ހިޔާނާތާއި ގުޅިގެން ވިލިމާލޭ ދާއިރާގެ ކުރީގެ މެންބަރު، އަދި ޕީޕީއެމްގެ ޕީޖީ ގުރޫޕުގެ ކުރީގެ ލީޑަރު، އަހުމަދު ނިހާން ހުސެއިން މަނިކުގެ މައްޗަށް ކޮށްފައިވާ ދައުވާތައް އަނބުރާ ގެންދަން ޕްރޮސިކިއުޓާ ޖެނެރަލް (ޕީޖީ) އޮފީހުން ނިންމައިފި އެވެ.
ނަމަވެސް ޕީޖީ އޮފީހުން މިދިޔަ ހޯމަ ދުވަހު ނިހާނަށް ފޮނުވި ސިޓީއެއްގައި ވަނީ ނިހާންގެ މައްޗަށް ކޮށްފައިވާ މަނީ ލޯންޑަރިންނާއި ރިޝްވަތުގެ ދައުވާތައް އެ އޮފީހުން މުރާޖައާ ކުރުމަށްފަހު އެ މައްސަލަ އިތުރަށް ކުރިއަށް ނުގެންދަން ނިންމާފައިވާ ކަމަށެވެ. ނަމަވެސް އޭގެ ސަބަބެއް އެ ސިޓީގައި ބަޔާންކޮށްފައެއް ނުވެއެވެ.
އެކަމާ ގުޅިގެން ޕީޖީ އޮފީހުން ބުނީ ނިހާންގެ މައްޗަށް ކުރި ދައުވާތައް އަނބުރާ ގެންދަން ނިންމީ ކުރީގެ ރައީސް އަބްދުﷲ ޔާމީންގެ މައްސަލާގައި 2021 ވަނަ އަހަރު ސުޕްރީމް ކޯޓުން ކުރި ހުކުމަށް ރިއާޔަތްކޮށް ބެލިއިރު، ނިހާންގެ މައްޗަށް އެ ދައުވާ ސާބިތުވާނެ ކަމަށް ނުބެލެވޭތީ ކަމަށެވެ. އަދި ނިހާނަށް ލިޔުމުން ޖަވާބު ދިނީ މި ހަފުތާގައި ކަމަށާއި، ދައުވާތައް އަނބުރާ ގެންދަން ނިންމާފައި ވަނީ މީގެ ދެ މަސް ކުރިން ކަމަށް ޕީޖީ އޮފީހުން ބުނެއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރަކަށް ނިހާން ހުންނެވި އިރު 6 ކުށެއް ކުރެއްވި ކަމަށް ބުނެ ނިހާންގެ މައްޗަށް ދައުލަތުން ފުރަތަމަ ވަނީ 6 ދައުވާއެއް ކޮށްފައެވެ. އޭގެތެރެއިން ރިޝްވަތުގެ ހިފުމުގެ ކުށުގެ އެއް ދައުވާ ދައުލަތުން މީގެ ކުރިން އަނބުރާ ގެންގޮސްފައިވާ އިރު މިހާރު ނިހާންގެ މައްޗަށް ދައުލަތުން ކުރަނީ 5 ދައުވާއެވެ. އެއީ ރިޝްވަތުގެ ހަތަރު ދައުވާއަކާއި މަނީލޯންޑްރިންގެ ދައުވާއެކެވެ.
ނިހާންގެ މައްސަލަތައް ކުރިއަށް ނުގެންދަން ނިންމި އިރު، ރައްޔިތުންގެ މަޖިލީހުގެ އިދާރާގެ ބިއުރޯ ޗީފަކަށް އޭނާ މިހާރު ވަނީ ހަމަޖައްސާފައެވެ. އެ މަގާމަށް ނިހާން އައްޔަންކުރެއްވީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އެވެ.
