ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޗެއާމަންގެ މަގާމުން އަހްމަދު ޒުހޫރު މިއަދު ވަކިކޮށްފިއެވެ.
އަހުމަދު ޒުހޫރަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި، ކޮމިޝަނާ ޖެނެރަލް އޮފް ކަސްޓަމްސްގެ މަގާމާއި ސްޓެލްކޯގެ މެނޭޖިން ޑިރެކްޓަރު ކަމުގެ މަގާމު ފުރުއްވާފައިވާ ބޭފުޅެކެވެ. އޭނާ އެޗްޑީސީގެ ޗެއާމަންގެ މަގާމަށް ޕްރައިވަޓައިޒޭޝަން އެންޑް ކޯޕްރަޓައިޒޭޝަން ބޯޑުން އައްޔަންކުރީ މިދިޔަ ފެބުރުއަރީ މަހުގެ ތެރޭގައެވެ.
އަހުމަދު ޒުހޫރު މަގާމުން ވަކިކޮށްފައިވާއިރު، މިއަދު ވަނީ މިދިޔަ ޑިސެމްބަރު މަހުގެ 17 ވަނަ ދުވަހު އެމްއެމްޕީއާރުސީގެ މެނޭޖިން ޑިރެކްޓަރު ކަމަށް އައްޔަންކުރެއްވި ފާތިމަތު ތައުފީގުވެސް އެ މަގާމުން ވަކިކޮށްފައެވެ.
ފާތިމަތު ތައުފީގު އެމްއެމްޕީއާރުސީގެ މެނޭޖިން ޑިރެކްޓަރުކަމުން ވަކިކޮށްފައިވަނީ އެ ކޯޕަރޭޝަންގެ ޗެއާޕާސަންގެ މަގާމުގައި ހުންނެވި އައިޝާ ނޫރައިން ޖަނާހު، އެ މަގާމުން ރޭ އިސްތިއުފާދެއްވާފައި ވަނިކޮށެވެ.
އެމްއެމްޕީއާރްސީގެ ޗެއާޕާސަންގެ މަގާމަށް ނޫރައިން އައްޔަން ކުރީ ޑިސެމްބަރު 27، 2023 ގައެވެ. އޭނާ އަކީ އެ ކޯޕަރޭޝަންގެ ޗެއާޕާސަންގެ މަގާމަށް އައްޔަން ކުރި ފުރަތަމަ ފަރާތް ވެސް މެއެވެ.
ނޫރައިން އާންމުންގެ ތެރޭގައި މި ފަހުން މަގްބޫލުވެގެން ދިޔަައީ ދުބާއީގައި އޮތް ވޯލްޑް ޓްރެވަލް އެވޯޑްސް ހަފްލާގައި މީޑިއާ އަށް އިނގިރޭސި ބަހުން ދެއްވި އިންޓަވިއުއެއްގައި އެ ބަހަށް ފަރިތަކަން ދެއްކެވުމާ ގުޅިގެންނެވެ. އެ އިންޓަވިއުއާ ގުޅިގެން ގިނަ ބަޔަކު ވަނީ އޭނާ އަށް ތައުރީފް ކޮށްފައެވެ.
ހަޔާތުގެ ގިނަ އަހަރުތަކެއް ނިއުޒިލޭންޑްގައި ހޭދަކުރައްވާފައިވާ ނޫރައިން ވަނީ އެ ގައުމުގައި ވެސް އިސް މަގާމުތައް ފުރުއްވައިފައެވެ.
