ވ. އާރަށު މައްސަލައިގައި ދައުލަތާއި ކުރީގެ ރައީސް އަބްދުﷲ ޔާމީންގެ ފަރާތްޕުޅުން އެއް ފަރާތުން އަނެއް ފަރާތުގެ މުހިންމު ގިނަ ހެކިތަކެއް ބަލައިނުގަތުމަށް މިއަދު ކޯޓުގައި އެދިއްޖެއެވެ.
މިއަދު ހެނދުނު 9:40 ގައި ފެށި މި އަޑުއެހުމުގައި ދައުލަތުން ވަނީ ރައީސް ޔާމީންގެ ފަރާތްޕުޅުން ހުށަހަޅާފައިވާ އަހްމަދު ނަރީޝް، މުހައްމަދު އިސްމާއީލް އަދި ޝާހިދުގެ ހެކިބަސް ބަލައިނުގަތުމަށް އެދިފައެވެ. ދައުލަތުގެ ވަކީލު ފާހަގަކުރެއްވި ގޮތުގައި، އެމަނިކުފާނުގެ އެކައުންޓަށް ޖަމާވި ފައިސާއާ ގުޅިގެން ތަހުގީގުގައި ސުވާލުކުރުމުން އިހްތިޔާރު ކުރެއްވީ ހަނުހުރުމުގެ ހައްގެވެ. އަދި ޝަރީއަތުގައި އެއީ ޑޮލަރު މާރުކުރުމުގެ މުއާމަލާތެއް ކަމަށް ވިދާޅުވެ ހެކި ހުށަހެޅުއްވި ނަމަވެސް، ޖިނާއީ އިޖުރާއަތުގެ ގާނޫނުގެ 47 ވަނަ މާއްދާގެ (ބ) އާ ހިލާފަށް ތަހުގީގުގައި ހާމަނުކޮށް ޝަރީއަތަށް ހުށަހަޅާ އާ ހެކިތަކަކީ ޝައްކުގެ ނަޒަރަކުން ބަލަންޖެހޭނެ ހެކިތަކެއް ކަމަށް ސުޕްރީމް ކޯޓުގެ ނިންމުންތަކުން އެނގޭތީ، އެ ހެކިތަކަށް ބުރަދަން ނުދިނުމަށް ދައުލަތުން އެދުނެވެ.
މިކަމަށް ރައްދު ދެއްވަމުން ރައީސް ޔާމީންގެ ދިފާއީ ވަކީލުން ވިދާޅުވީ، ދައުލަތުން ފާހަގަކުރަނީ ހެކީގެ ބުރަދަނާ ގުޅޭ ގާނޫނީ މާއްދާއެއް ނޫން ކަމަށެވެ. އަދި މާކުރީގެ މާލީ މުއާމަލާތްތަކާ ގުޅޭގޮތުން އެކަށީގެންވާ ވަގުތު ނުދީ، ގޮނޑިއެއްގައި ބައިންދައިގެން ގިނަ ވަގުތު ސުވާލުކޮށްގެން ގާނޫނުގެ 47 ވަނަ މާއްދާގެ (ބ) ގެ ނާޖާއިޒު ފައިދާ ނަގަން ދައުލަތުން މަސައްކަތްކުރާ ކަމަށް ދިފާއުން ބުންޏެވެ. އަދި އެއް ކަމަކަށް ދެ ފަހަރު ދައުވާ ކުރުމަށް ދައުލަތުން މައްސަލަ ހުށަހަޅާފައިވާ ކަމަށްވެސް ފާހަގަކުރިއެވެ.
ރައީސް ޔާމީން ވާހަކަފުޅު ދައްކަވަމުން ވިދާޅުވީ، އެމަނިކުފާނު ޝަރީއަތަށް ލިޔުމުން ހެއްކެއް ހުށަހަޅުއްވާފައި ނުވާނެ ކަމަށާއި ހުށަހެޅުއްވީ ޝަފަހީ ހެކި ކަމަށެވެ. އަދި ފުލުހުން ދެއްކި ލިޔުމަކީ ތާރީހާއި ވަގުތު އުނިކޮށް، ފުލުހުން އަމިއްލައަށް "ފެބްރިކޭޓް" ކޮށްފައިވާ ސައްހަ ނޫން ލިޔުމެއް ކަމަށް ތުހުމަތު ކުރެއްވިއެވެ. މީގެއިތުރުން، އިކޮނޮމިކް ޔޫތު ކައުންސިލްގެ ނިންމުންތަކުގައި ރައީސުލްޖުމްހޫރިއްޔާ ސޮއިނުކުރައްވާނެ ކަމަށާއި، ތަހުގީގު ފުރިހަމަނުކޮށް ކުރާ ދައުވާތަކުގެ ސަބަބުން ޖަލު ހުކުމް ތަންފީޒުކުރަން ޖެހި ބަދަލު ނުލިބޭ ގޮތަށް ކޯޓުގެ ވަގުތު ބޭކާރުވަމުންދާ ކަމަށް ވިދާޅުވިއެވެ.
ރައީސް ޔާމީންގެ އިސް ވަކީލު ޑރ. މުހައްމަދު ޖަމީލް އަހްމަދު ފާހަގަކުރެއްވި ގޮތުގައި، އެމްއެމްޕީއާރުސީގެ މައްސަލައިގައި ދައުވާ ލިބުނު އެހެން މީހުންގެ މައްސަލަތައް އަނބުރާ ގެންގޮސް، ރައީސް ޔާމީނާ މެދު އަމަލުކުރަނީ ވަކި ހާއްސަ ގޮތަކަށެވެ. އަދި އަހްމަދު އަދީބާއި އަބްދުﷲ ޒިޔަތަކީ ރައީސް ޔާމީނާ މެދު އަދާވާތްތެރިކަން އޮތް ބައެއްކަން ސުޕްރީމް ކޯޓުގެ ހުކުމުން އެނގެން އޮތުމުން، އެ ދެމީހުންގެ ހެކިބަހާއި، އެމީހުންނާއެކު ދައުލަތުން ވެފައިވާ ގާނޫނާ ހިލާފު އެއްބަސްވުންތައް ބަލައިނުގަތުމަށް އެދިވަޑައިގެންނެވިއެވެ.
މީގެއިތުރުން، ފުލުހުންގެ ތަހުލީލީ ރިޕޯޓްތަކާއި، އައްލާމް ލަތީފް، މުހައްމަދު ހުސައިން، ފަސީހު ޒާހިރު އަދި އަހްމަދު ނާޒިމް ފަދަ ބޭފުޅުންގެ ހެކިބަސްތަކަކީ މި މައްސަލައާ ސީދާ ގުޅުމެއް ނެތް ހެކިތަކެއް ކަމަށް ދިފާއީ ވަކީލު ހަމްޒާ ލަތީފް ވިދާޅުވިއެވެ. އަދި އަޑު ކަށަވަރު ނުކޮށް ދައުލަތުން ހުށަހެޅި އޯޑިއޯތަކަކީ މައްސަލަ ވަކި ގޮތަކަށް އަނބުރާލަން ހުށަހެޅި އެއްޗެއް ކަމަށްވެސް ފާހަގަކުރެއްވިއެވެ.
މި އަޑުއެހުމުގައި ގާޒީ ވަނީ، އައްލާމް ލަތީފްގެ ބަޔާނުގައިވާ ކަންކަމާ ގުޅޭގޮތުން އަދީބާ ސުވާލުކުރަން އަދީބު ހެކީގެ ގޮތުގައި ހުށަނޭޅި ސަބަބާއި، އީވައިސީގެ ސޮއިނުކުރާ ލިޔުމެއް ދައުލަތުން ހުށަހެޅި ސަބަބާ މެދު ސުވާލު ކުރައްވާފައެވެ. ދައުލަތުން ބުނީ އަދީބާއި ޒިޔަތުގެ ވާހަކަތަކަށް ބާރުދޭ އިތުރު ހެކި އެބަހުރި ކަމަށާއި، ހެކިތައް ސީދާ ގުޅެން ނުޖެހޭ ކަމަށެވެ.
ޝަރީއަތް އަވަސްކޮށް ދިނުމަށާއި، ކޮންމެހެން ހާޒިރުވާން ނުޖެހޭނަމަ އޮންލައިންކޮށް ބާއްވައިދިނުމަށް ރައީސް ޔާމީން އެދިވަޑައިގެންނެވި ނަމަވެސް، ގާޒީ ވިދާޅުވީ މައްސަލަ މި އަހަރު ތެރޭ ނިންމާލުމަށް މަސައްކަތް ކުރައްވާނެ ކަމަށާއި އަޑުއެހުންތައް ކުރިއަށްދާނީ ކޯޓަށް ހާޒިރުކޮށްގެން ކަމަށެވެ.
މިއަދުގެ އަޑުއެހުން ނިންމަވާލައްވަމުން ގާޒީ ވަނީ، އަންނަ މަހުގެ 12 ވަނަ ދުވަހު އޮންނަ ފުއްގިރި މައްސަލައިގެ އަޑުއެހުމަށް ފަހު، އާރަށު މައްސަލައިގެ އިތުރު އަޑުއެހުމެއް ބާއްވާނެ ކަމަށް ވިދާޅުވެފައެވެ.
ވ. އާރަށް މައްސަލައިގެ އަޑުއެހުންތައް އަހަރު ދުވަހުގެ މެދުކެނޑުމަކަށްފަހު މިއަދު ފަށާފައިވާ އިރު، މި މައްސަލައިގެ އަޑުއެހުންތައް ކްރިމިނަލް ކޯޓުގައި ހުއްޓިފައި ހުރީ، ދައުލަތުން ހުށަހެޅި އާ ހެކިތަކެއް ބަލައިނުގަތުމަށް ހައި ކޯޓުން ކުރި ހުކުމުގެ ބައެއް، ދައުލަތުން ސުޕްރީމް ކޯޓުގައި އިސްތިއުނާފް ކުރުމާ ގުޅިގެންނެވެ. ސުޕްރީމް ކޯޓުން މިދިޔަ ޖުލައި މަހު ހުކުމްކުރީ ހައި ކޯޓުން ކަނޑައެޅި ގޮތަށް، އެ ހެކިތައް ބަލައިނުގަނެވޭނެ ކަމަށެވެ.
ވ. އާރަށް ކުއްޔަށް ދިނުމުގައި ޔާމީން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރައްވައި، ފައިސާ ލޯންޑާ ކުރެއްވި ކަމަށް ބުނާ ދައުވާގައި، ޔާމީންގެ ދިފާއީ ހެކިންގެ ހެކިބަހުގައިވާ ގޮތުން، ޔާމީންގެ އެކައުންޓަށް ޖަމާވި ފައިސާ ނިސްބަތްވަނީ ފެލިދޫ ދާއިރާގެ ކުރީގެ މަޖިލިސް މެންބަރު ޔޫސުފް ނައީމްގެ އަތުން ޑޮލަރު ގަތުމަށް ހިންގި މުއާމަލާތަކަށް ކަމަށެވެ. ނަމަވެސް، ކްރިމިނަލް ކޯޓުން އާންމުކުރި ހުކުމްގައި ވާ ގޮތުން، ޔާމީންގެ ދިފާއުގައި ހެކިބަސް ދިން ހެކިންނަކީ ޖިނާއީ އަދުލުގެ ނިޒާމް ނަހަމަ ގޮތުގައި ބޭނުންކޮށްގެން ހުށަހަޅާފައިވާ ހެކިން ކަމަށް ބެލެވެއެވެ. ހެކިންގެ ހެކިބަހުގައި ހުރި ފުށޫއެރުންތަކާއި ދެކޮޅު ނުޖެހޭ ވާހަކަތަކުން، ހެކިން ކޯޓަށް އޮޅުވާލައި ދޮގު މައުލޫމާތު ދީފައިވާކަން ހާމަވެފައިވާ ކަމަށް ވެސް ހުކުމްގައި ފާހަގަކޮށްފައިވެއެވެ.
