އެމްއެމްޕީއާރުސީގެ އެމްޑީ ކަމުން ފާތިމަތު ތައުފީގު ވަކިކޮށްފި

އެމްއެމްޕީއާރުސީގެ އެމްޑީ ކަމުން ފާތިމަތު ތައުފީގު ވަކިކޮށްފިއެވެ.

މިދިޔަ ޑިސެމްބަރު މަހުގެ 17 ވަނަ ދުވަހު އެމްއެމްޕީއާރުސީގެ މެނޭޖިން ޑިރެކްޓަރު ކަމަށް އައްޔަންކުރެއްވި ފާތިމަތު ތައުފީގު، އެ މަގާމުން މިއަދު އޭނާ ވަކިކުރިކަން 'ދަ ޕްރެސް' އަށް ވަނީ އެނގިފައެވެ.

އެކަމަކު މިކަމާ ގުޅިގެން ޕީސީބީގެ ސެކްރެޓަރީ ޖެނެރަލް އަހްމަދު ޔާމީން އާ ސުވާލުކުރުމުން 'ދަ ޕްރެސް' އަށް އޭނާ ވިދާޅުވީ، އެމްއެމްޕީއާރުސީގެ މެނޭޖިިން ޑިރެކްޓަރުކަމުން ފާތިމަތު ތައުފީގް ވަކިކުރުމަށް ރަސްމީކޮށް އަދި ނިންމާފައިނުވާ ކަމަށެވެ.

ފާތިމަތު ތައުފީގު އެމްއެމްޕީއާރުސީގެ މެނޭޖިން ޑިރެކްޓަރުކަމުން ވަކިކޮށްފައިވަނީ އެ ކޯޕަރޭޝަންގެ ޗެއާޕާސަންގެ މަގާމުގައި ހުންނެވި އައިޝާ ނޫރައިން ޖަނާހު، އެ މަގާމުން ރޭ އިސްތިއުފާދެއްވާފައި ވަނިކޮށެވެ.

އެމްއެމްޕީއާރްސީގެ ޗެއާޕާސަންގެ މަގާމަށް ނޫރައިން އައްޔަން ކުރީ ޑިސެމްބަރު 27، 2023 ގައެވެ. އޭނާ އަކީ އެ ކޯޕަރޭޝަންގެ ޗެއާޕާސަންގެ މަގާމަށް އައްޔަން ކުރި ފުރަތަމަ ފަރާތް ވެސް މެއެވެ.

ނޫރައިން އާންމުންގެ ތެރޭގައި މި ފަހުން މަގްބޫލުވެގެން ދިޔަައީ ދުބާއީގައި އޮތް ވޯލްޑް ޓްރެވަލް އެވޯޑްސް ހަފްލާގައި މީޑިއާ އަށް އިނގިރޭސި ބަހުން ދެއްވި އިންޓަވިއުއެއްގައި އެ ބަހަށް ފަރިތަކަން ދެއްކެވުމާ ގުޅިގެންނެވެ. އެ އިންޓަވިއުއާ ގުޅިގެން ގިނަ ބަޔަކު ވަނީ އޭނާ އަށް ތައުރީފް ކޮށްފައެވެ.

ހަޔާތުގެ ގިނަ އަހަރުތަކެއް ނިއުޒިލޭންޑްގައި ހޭދަކުރައްވާފައިވާ ނޫރައިން ވަނީ އެ ގައުމުގައި ވެސް އިސް މަގާމުތައް ފުރުއްވައިފައެވެ.

އަދި އޭނާ އަކީ 10 އަހަރު ދުވަހުގެ މެނޭޖްމަންޓް ތަޖުރިބާ ހުންނެވި ޗާޓާޑް އެކައުންޓެންޓެކެވެ. އޭނާ އެކައުންޓިން ދާއިރާއިން މާސްޓާސް ޑިގްރީ ހާސިލް ކުރެއްވީ އޯކްލޭންޑް ޔުނިވާސިޓީ އޮފް ޓެކްނޮލޮޖީންނެވެ.

ނޫރައިން ވަނީ 2015 ވަނަ އަހަރު "ވެެއިޓްމަޓާ ލޯކަލް ބޯޑް ގޫޑް ސިޓިޒެން އެވޯޑް" ވެސް ހޯއްދަވައިފައެވެ. އަދި އޭނާ އަކީ އަންހެނުންނަށް ހިތްވަރުދީ އަންހެނުން ބާރުވެރި ކުރުމަށް އެކި އެކި މަސައްކަތް ކުރައްވަމުން ގެންދެވި ބޭފުޅެކެވެ. އެގޮތުން "އޮތެންޓިސިޓީ އެން ޒެޑް" ގެ ނަމުގައި ޖަމިއްޔާއެއް އުފައްދަވައި ވަޒީފާގެ ތަމްރީން ބޭނުންވާ އަންހެނުންނަށް ނޫރައިން ވަނީ އެހީތެރިކަން ފޯރުކޮށްދެއްވާފައެވެ.

މީގެ އިތުރުން ވެސް އޭނާ ވަނީ ނިއުޒިލޭންޑުގެ ފަގީރުންނަށް އެހީވާ ފަންޑް ނޯތް ޓްރަސްޓީސްގެ ފަރާތުން އާއްމުން ތަމްސީލް ކުރާ މެންބަރުކަން ކުރައްވައިފައެވެ.