ޑައިރެކްޓަރު ސަންޖޭ ބަންސާލީ ތައްޔާރުކޮށް ގެނެސްދޭ ވެބް ސީރީޒް "ހީރާމަންޑީ: ދަ ޑައިމަންޑް ބާޒާރު" އަށް ބޮޑު ތަރުހީބެއް ލިބެން ފަށައިފިއެވެ.
ނެޓްފްލިކްސްގައި ސްޓްރީމްކޮށްގެން ގެނެސްދޭ އަށް އެޕިސޯޑުގެ މި ސީރީޒަކީ ބޮލީވުޑްގެ ބަތަލާ ސޮނާކްޝީ ޑަބަލް ރޯލުން ފެނިގެންދާ ސީރީޒެކެވެ. ސީރީޒްގެ ލަވަތައް ޓިކްޓޮކްގައި ވައިރަލްވެފައިވާއިރު މި ސީރީޒަށް ކްރިޓީކުންގެ ތައުރީފާއެކު ފާޑުކިޔުންތައްވެސް އަމާޒުވިއެވެ. އިންޑިއާ އަށް މިނިވަންކަން ލިބުމުގެ ކުރިން ލާހޯރްގެ ރެޑް ލައިޓް އޭރިއާގައި އުޅުނު ޝާހީ ޖާރިޔާއިންގެ ވާހަކަ ކިޔައިދޭ މި ވެބް ސީރީޒުގައި ހަރަކާތްތެރިވާ ތަރިންނަކީ މަނީޝާ ކޮއިރަލާ، ސޮނާކްޝީ ސިންހާ، ރިޗާ ޗައްޑާ، އަދިތީ ރާއޯ ހައިދަރީ، ޝަރުމިން ސޭގަލް އަދި ސަންޖީދާ ޝެއިހް އެވެ. ނެޓްފްލިކްސްގައި މި ޑްރާމާ ސްޓްރީމްކުރުމާއެކު ދުނިޔޭގެ އެކި ކަންކޮޅުތަކުގައި ވަނީ މި ޑްރާމާއަށް ބޮޑު ތަރުހީބެއް ލިބިފައެވެ.
2010 ވަނަ އަހަރު ނުކުތް ފިލްމު "ދަބަންގް" އިން ބޮލީވުޑަށް ތައާރަފްވި ސޮނާކްޝީ ވަނީ މަޝްހޫރު ގިނަ ފިލްމުތަކެއް އާންމުންނާ ހަމައަށް ގެނެސްދީފައެވެ. އޭގެ ތެރޭގައި "އިއްތިފާގު"، "އަކީރާ" އަދި "ކަލަންކް" ހިމެނެއެވެ. ބޮލީވުޑްގެ ކުޅަދާނަ ޑައިރެކްޓަރު ބަންސާލީ އެންމެ ފަހުން ގެނެސްދިން ފީޗަރ ފިލްމަކީ އާލިއާ ބަޓް އާއެކު "ގަންގޫބާއި ކަތިއަވާޅީ" އެވެ. އެ ފިލްމަށް ކްރިޓީކުންގެ އިތުރުން އާންމުންގެ ބޮޑު ތަރުހީބެއް ލިބިގެން ދިޔައެވެ.
