ރައްޔިތުންގެ މަޖިލީހުގެ ޖުމްލަ މެމްބަރުން ގުނާ ގޮތް ބަދަލު ކުރަން މަޖިލީހުގެ ގަވާއިދުގެ 242 ވަނަ މާއްދާއަށް ގެނައި އިސްލާހު ބާތިލު ކުރަން ހުށަހަޅައިފި އެވެ.

ސަރުކާރު ބަދަލުވުމާ ގުޅިގެން ނައިބު ރައީސް ހިމެނޭ ގޮތަށް ސަރުކާރުގެ އެކި މަގާމުތަކާ ހަވާލުވެވަޑައިގެންނެވުމަށްޓަކައި 7 މެންބަރަކު ވަނީ އިސްތިއުފާދެއްވާފައެވެ. އެއާއެކު މަޖިލީހުގެ އަޣުލަބިއްޔަތު އޮންނަ އެމްޑީޕީން ވަނީ ޖުމުލަ މެންބަރުން ގުނާއިރު އެ ހަތް މެންބަރުން ނުހިމަނާ ގޮތަށް މަޖިލީހުގެ ގަވާއިދު އިސްލާހުކޮށްފައެވެ.

ނަމަވެސް އެ މާއްދާތަކަށް އިސްލާހު ގެނެސްފައި ވަނީ ގާނޫނުއަސާސީއާ ހިލާފަށް ކަމަށް ސުޕްރީމް ކޯޓުން ވަނީ މިދިޔަ މަހުގެ 29 ވަނަ ދުވަހު ހުކުމް ކޮށްފައެވެ. އެ މައްސައިގައި ހުކުމް ކުރުމުގެ ކުރިން އެ މާއްދާތައް ބާތިލު ކޮށްފައިވާތީ، ކޯޓުން އަޅައިދެވޭނެ ފިޔަވަޅެއް ނެތް ކަމަށް ވެސް ސުޕްރީމް ކޯޓުން އިއްވި ހުކުމްގައި ބުނެފައި ވެއެވެ.

މިއަދު ބާތިލް ކުރަން ހުށަހެޅި މާއްދާގައި ބުނަނީ، "މެމްބަރުކަމުން ވަކިވުމުގެ ސަބަބުން މެމްބަރުކަމުގެ ގޮނޑި ހުސްވި ތާރީހުން ފެށިގެން މަޖިލީހުގެ ކުރިއަށް އޮތް އާންމު އިންތިހާބާ ދެމެދު ހަ މަސް ދުވަސް ނުވަތަ އެއަށްވުރެން ކުރު މުއްދަތެއް އޮތުމުން އެ ހުސްވި ގޮނޑިއަކަށް މެމްބަރަކު އިންތިހާބު ކުރެވެން ނެތް ހާލަތުގައި، ޖުމްލަ މެމްބަރުންގެ އަދަދު ގުނުމުގައި އެ ހުސްވި ގޮނޑި ނުހިމެނޭނެ" ކަމަށެވެ.

އެއާއެކު ޖަލްސާ ފައްޓަވަމުން އަސްލަމް ވިދާޅުވީ، ސުޕްރީމް ކޯޓުން ކުރި ހުކުމުން މަޖިލީހުގެ ގަވާއިދަށް ގެނައި ބަދަލު ގާނޫނުއަސާސީއާ ހިލާފު ކަމަށް ކަނޑައަޅާފައިވާތީ، ގަވާއިދަށް ގެނައި އިސްލާހު އުވައިލަން ހުށަހަޅުއްވާ ކަމަށެވެ. ސުޕްރީމް ކޯޓުން އެ މާއްދާ އުވާލާފައި ނުވާކަން ފާހަގަ ކުރައްވަމުން އަސްލަމް ވިދާޅުވީ މަޖިލީހުގެ ގަވާއިދުގައި އެ މާއްދާ އުވާލެވޭނީ މަޖިލީހުން ކަމަށްވާތީ މަޖިލީހުގެ ގަވާއިދުގެ 242 ގެ އެއް ވަނަ މާއްދާ އިތުރުކޮށްފައިވާ މާއްދާއަށް މަޖިލީހުން ގޮތެއް ނިންމަވައި އުވާލަދިނުމުގެ މައްސަލަ މި މަޖިލީހަށް ގެނެސްގެން ކަމަށެވެ.

އެ އިސްލާހު މަޖިލީހުން ގެނެސްފައިވަނީ ރައީސް އަދި ނައިބު ރައީސް މަގާމުން ދުރުކުރުމުގެ މަސައްކަތް ފަށާފައިވަނިކޮށެވެ. ގާނޫނު އަސާސީގައިވާ ގޮތުން ރައީސް އަދި ނައިބު ރައީސް މަގާމުން ދުރުކުރެވޭނީ މަޖިލީހުގެ ޖުމްލަ މެމްބަރުންގެ ތިން ބައިކުޅަ ދެ ބައި މެންބަރުންގެ ވޯޓުންކަމުގައިވާއިރު އެއީ ރައްޔިތުންގެ މަޖިލީހުގެ މި ދައުރަށް އިންތިހާބުކުރި 87 މެންބަރުންގެ ތެރެއިން 58 މެންބަރުންގެ ވޯޓެވެ.

ހަބަރު ރައްޔިތުންގެ މަޖިލިސް މުހައްމަދު އަސްލަމް