ކުރީގެ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓްގައި ހުރި މުދާތަކެއް ގެއްލުނު މައްސަލައެއް ފުލުހުން ބަލަން ފަށައިފިއެވެ.
ފުލުހުންގެ މީޑިއާ އޮފިޝަލު ވިދާޅުވީ، އެ މިނިސްޓްރީގެ މުދާތަކެއް ގެއްލިފައިވާ މައްސަލަ މިދިޔަ ބުދަ ދުވަހު ފުލުހަށް ރިޕޯޓުކޮށްފައިވާ ކަމަށެވެ. މައްސަލަ އާ ގުޅޭ އިތުރު މައުލޫމާތެއް ފުލުހުން ހިއްސާ ކޮށްފައި ނުވެއެވެ. ނަމަވެސް އެ މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުނެއެވެ.
މި ސަރުކާރުން ވަނީ ޔޫތު އެންޑް ސްޕޯޓްސް މިނިސްޓްރީ ދެ މިނިސްޓްރީއެއްގެ ގޮތުގައި ކަނޑައަޅާފައެވެ. އެގޮތުން ޔޫތު މިނިސްޓްރީގެ ނަން ޔޫތު އެމްޕަވަމަންޓް، އިންފޮމޭޝަން އެންޑް އާޓްސް މިނިސްޓްރީގެ ނަމަށް ބަދަލު ކޮށްފައިވާއިރު ސްޕޯޓްސް މިނިސްޓްރީ ބަދަލުކުރީ ސްޕޯޓްސް، ފިޓްނަސް އެންޑް ރެކްރިއޭޝަންގެ ނަމަށެވެ.
"ދަ ޕްރެސް" އަށް އެނގިފައިވާ ގޮތުގައި މުދާތައް ގެއްލިފައި ވަނީ ޔޫތު އެންޑް ސްޕޯޓްސް މިނިސްޓްރީ ދެ މިނިސްޓްރީއެއްގެ ގޮތުގައި ކަނޑައެޅުމާ ގުޅިގެން މުދާތައް ބަދަލުކުރި އިރުއެވެ.
މުދާ ތަކާ ގުޅޭ އިތުރު ތަފްސީލެއް ފުލުހުންވެސް ހާމަކޮށްފައި ނުވެއެވެ. ނަމަވެސް މައުލޫމާތު ލިބިފައިވާ ގޮތުގައި ގެއްލިގެން ރިޕޯޓު ކޮށްފައިވަނީ މޮނިޓަރު ތަކަކާއި ސީޕީޔޫ ތަކެއްގެ އިތުރުން 65 އިންޗީގެ ޓީވީއެކެވެ.
ސްޕޯޓްސް މިނިސްޓްރީ ވެލާނާގޭ ބިލްޑިންގްގެ ތިންވަނަ ފްލޯގައި ހިންގަމުންދާއިރު ޔޫތު މިނިސްޓްރީ ބަދަލުކުރީ އެ އިމާރާތުގެ ހަތަރުވަނަ ފްލޯ އަށެވެ.
