މިއަދަށް ތާވަލުކުރި މަސައްކަތްތައް ނިމުމުން، މަޖިލީހުގެ މިއަދުގެ ޖަލްސާ އަވަހަށް ނިންމާލައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ އަށް ވަނީ ތިން ކަމެއް އެޖެންޑާކޮށްފައެވެ. އެއީ:
- މާފަންނު މެދު ދާއިރާގެ މެންބަރު އިބްރާހީމް ރަޝީދު ވަޒީރުންނާ ކުރައްވައި، ލިއުމުން ޖަވާބު ހޯއްދެވި 10 ސުވާލު
- ދަނގެތި ދާއިރާގެ މެންބަރު މުހައްމަދު ނާޒިމް، ބައިނަލްއަގުވާމީ ޓެރަރިޒަމްގައި 20 ދިވެއްސަކު ބައިވެރިވާ ކަމަށް އެމެރިކާ އިން ބުނުމުން ދިވެހިންނަށް ކުރާނެ އަސަރު ދެނެގަތުމަށް ގޮވާލާ ހުށަހެޅި ގަރާރުގެ މަސައްކަތް
- މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ގާނޫނުއަސާސީ އަށް އިސްލާހު ގެނައުމަށް ހުށަހެޅި ބިލަށް ބަހުސްކުރުން
މީގެ ތެރެއިން ނާޒިމް ހުށަހެޅުއްވި ގަރާރަށް ބަހުސްކުރެއްވީ އިބްރާހީމް ރަޝީދުގެ އިތުރުން ކާށިދޫ ދާއިރާގެ މެންބަރު އަބްދުﷲ ޖާބިރު އެކަންޏެވެ. އެހެން މެންބަރަކު މި ގަރާރަށް ބަހުސްކުރަން ހުށަހަޅާފައި ނެތުމުން ދެން ހުޅުވާލީ އިމްތިޔާޒް ހުށަހެޅުއްވި ބިލުގެ ބަހުސަށެވެ. އެކަމަކު އެ ބިލަށް ބަހުސްކުރާނެ މެންބަރަކު ނެތުމުން ރިޔާސަތުން ނިންމީ ނާޒިމްގެ ގަރާރަށާއި އިމްތިޔާޒުގެ ބިލަށް ބަހުސްކޮށް ނިމުނީ ކަމަށެވެ.
އެއަށް ފަހު، ހޯރަފުށި ދާއިރާގެ މެންބަރު އަހްމަދު ސަލީމް ކުނި މެނޭޖުކުރުމާ ބެހޭ ގާނޫނަށް ހުށަހެޅުއްވި އިސްލާހު ކަމަށްވާ ޕްލާސްޓިކް ކޮތަޅުން ނަގަމުން އައި ޓެކްސް ދެ ރުފިޔާ އިން 50 ލާރި އަށް ކުޑަކުރުމަށް ހުށަހެޅި އިސްލާހުގެ މަސައްކަތްކުރުމަށްޓަކައި މުޅި މަޖިލިސް ވަނީ އެކުގައި ކޮމިޓީ އަށް ގޮސްފައެވެ. މިއަދުގެ މުޅި މަޖިލިސް ކޮމިޓީގައި ވަނީ ސަލީމް ހުށަހެޅުއްވި އިސްލާހު ދިރާސާކުރުމަށްޓަކައި ހަތް މެންބަރުންގެ މުޅި މަޖިލީހުގެ ސަބް ކޮމިޓީ އެއް އެކުލަވާލައިފައެވެ.
އެ ކޮމިޓީގައި ހިމެނިވަޑައިގަންނަވަނީ:
- އަހްމަދު ސަލީމް (ހޯރަފުށި ދާއިރާގެ މެންބަރު) - ތިމާވެއްޓާ ބެހޭ ކޮމިޓީގެ މުގައްރިރު
- ޔައުގޫބު އަބްދުﷲ (ދާންދޫ ދާއިރާ) - ތިމާވެއްޓާ ބެހޭ ކޮމިޓީ
- ހުސައިން މުހައްމަދު ދީދީ (ފުވައްމުލަކު މެދު ދާއިރާ) - މާލިއްޔަތު ކޮމިޓީ
- އިބްރާހީމް ރަޝީދު (މާފަންނު މެދު ދާއިރާ) - އިޖުތިމާއީ ކޮމިޓީ
- ޔާސިރު އަބްދުއްލަތީފް (ކުޅުދުއްފުށި އުތުރު ދާއިރާ) - މާލިއްޔަތު ކޮމިޓީ
- އިބްރާހީމް ނާޒިލް (ހިތަދޫ ދެކުނު ދާއިރާ) - އިގްތިސޯދީ ކޮމިޓީ
- އަބްދުލްމުހުސިން ހަމީދު (ނިލަންދޫ ދާއިރާ) - އިގްތިސޯދީ ކޮމިޓީ
އެއަށްފަހު ކޮމިޓީގެ ބައްދަލުވުން ނިންމަވާލައްވައި މެންބަރުން ވަނީ ޖަލްސާ އަށް ރުޖޫއަވެވަޑައިގެންފައެވެ.
މިއަދުގެ ޖަލްސާގައި ފުރަތަމަ އޮތީ ވޯޓަށް އަހާ ވަގުތު ނާޒިމް ހުށަހެޅުއްވި ގަރާރަށާއި އިމްތިޔާޒް ހުށަހެޅުއްވި ބިލަށް ވޯޓަށް އަހާ ގޮތަށެވެ. ނަމަވެސް މަޖިލީހުގެ ރައީސް މުހައްމަދު އަސްލަމް ވިދާޅުވީ، މަޖިލީހުގައި ތަމްސީލުކުރާ ސިޔާސީ ޕާޓީތަކާ މަޝްވަރާކުރުމަށް ފަހު ދެން ވޯޓަށް އަހާ ދުވަހުން އެ ގަރާރަށާއި ބިލަށް ވޯޓަށް އަހާނެ ކަމަށެވެ.
އެހެން ވިދާޅުވުމަށް ފަހު އަސްލަމް މިއަދުގެ ޖަލްސާ ކުރުކޮށްލެއްވީއެވެ.
