އަންނަ މަހުގެ ހަތްވަނަ ދުވަހާ ހަމައަށް ރައްޔިތުންގެ މަޖިލީހުގެ މި ހިނގާ ތިންވަނަ ދައުރު ދަންމާލަން ނިންމައިފިއެވެ.
މިއަދުގެ ޖަލްސާ ފަށްޓަވަމުން މަޖިލީހުގެ ރައީސް މުހައްމަދު އަސްލަމް ވިދާޅުވީ، އަންނަ މަހުގެ ހަތްވަނަ ދުވަހުގެ ނިޔަލަށް ޖަލްސާތައް ކުރިއަށް ދާނެ ކަމަށާއި، ދައުރު ދަންމާލަން ނިންމީ ބަޖެޓު ފާސްކުރުން ހިމެނޭހެން މުހިންމު މަސައްކަތްތަކެއް ހުރުމުން ކަމަށެވެ.
އަސްލަމް ވިދާޅުވީ، ވޯޓު ގަޑީގައި އެކަމަށް އައްސަވާނެ ކަމަށެވެ.
އެމްޑީޕީގެ ފަރާތުން އިހަވަންދޫ ދާއިރާގެ މެންބަރު މުހައްމަދު ޝިފާއު ވެސް ވަނީ 'ދަ ޕްރެސް' އިން އިއްޔެ ސުވާލުކުރުމުން، މަޖިލީހުގެ މި ދައުރު ދަންމާލާނެ ކަމުގެ އިޝާރާތެއްކުރައްވައިފައެވެ. މަޖިލީހުގެ މި ދައުރުގެ މަސައްކަތްތައް ހުއްޓި، އަދިވެސް މުހިންމު މަސައްކަތްތައް ކުރިއަށް އެބަހުރި ކަން ޝިފާއު ފާހަގަކުރެއްވިއެވެ.
މި އަހަރު ރައްޔިތުންގެ މަޖިލީހުގެ ބޮޑު ބައެއް ހޭދަވީ ކޮމިޓީތައް އެކުލަވާލުމުގެ މައްސަލައާއި ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދުގެ މައްޗަށް ހުށަހެޅިފައިވާ އިތުބާރު ނެތް ކަމުގެ މައްސަލަ ކުރިއަށް ނުގެންދެވިއެވެ.
އެހެންވެ ކޮމިޓީތައް ހުއްޓި ބިލުތަކުގެ މަސައްކަތްތައް ނުކުރެވުމުގެ އިތުރުން، ނަޝީދުގެ މައްސަލަ ދިގުލައިގެން ދިއުމުގެ ސަބަބުން ދައުލަތުގެ ބަޖެޓުގެ މަސައްކަތްތައް ވެސް ފެށުނީ ލަހުންނެވެ.
މަޖިލީހުގެ ގަވައިދު ބުނާ ގޮތުން، ތިންވަނަ ދައުރު ހިނގަމުން ދާނީ މި މަހުގެ ނިޔަލަށެވެ.
މީގެ އިތުރުން މިއަދުގެ ޖަލްސާގައި އަސްލަމް ވަނީ މަޖިލީހުގެ ގަވައިދަށް ތިން އިސްލާހެއް ހުށަހަޅުއްވައިފައެވެ. އެއީ:
- ދެވަނަ ދައުރު ޖޫން މަހުން އޮގަސްޓަށް ބަދަލުކޮށް، ތިންވަނަ ދައުރު އޮކްޓޯބަރުން ނޮވެމްބަރަށް ބަދަލުކުރުމަށް
- މަޖިލީހަށް ހުށަހެޅޭ ބިލުތަކުގެ ފުރަތަމަ ކިއުން އިއްވުމުން ތިން ދުވަހުގެ ނޯޓިހެއް ދިނުމަށް ފަހު އިބްތިދާއީ ބަހުސް ފެށޭ ގޮތަށް ހެދުމަށް
- މަޖިލީހަށް ދާއިމީ އާ ކޮމިޓީ އެއް އިތުރުކުރުމަށް
