ބައެއް ގައުމުތަކުގެ ސަފީރުކަމަށާއި ބައެއް ގައުމުތަކަށް އައްޔަނުކުރުމަށްޓަކައި މަޖިލީހަށް ކުރީގެ ރައީސް އިބްރާހީމް މުހައްމަދު ސޯލިހު ފޮނުއްވި ބައެއް ނަންތައް، ރައީސް ޑރ. މުހައްމަދު މުއިއްޒު އަނބުރާ ގެންދަވައިފިއެވެ.
ރައީސް އަނބުރާ ގެންދެވީ އެޗްއާރުސީއެމަށާއި ބްރޯޑްކާސްޓިން ކޮމިޝަނަށް އައްޔަނުކުރުމަށް ފޮނުއްވި މެންބަރުންގެ ނަންތަކާއި، ޗައިނާ އާއި ޔޫއޭއީ އާއި ޕާކިސްތާނާއި ބަންގަލަދޭޝަށް އައްޔަނުކުރުމަށް ފޮނުއްވި ސަފީރުންގެ ނަންތަކެވެ.
އޭގެ ތެރެއިން ބައެއް ނަންތައް މަޖިލީހަށް ފޮނުއްވާފައި ވަނީ މިދިޔަ ފެބްރުއަރީ މަހުގައެވެ. އޭގެ ތެރެއިން ތިން ސަފީރެއްގެ ނަން ފޮނުވާފައި ވަނީ މިދިޔަ އޮކްޓޯބަރު މަހު، ވެރިކަން ބަދަލުވުމުގެ އިންތިގާލީ މަރުހަލާގެ ތެރެއިންނެވެ.
މިގެ އިތުރުން، މިދިޔަ އޭޕްރިލް މަހު ޕީސީބީ އަށް އައްޔަނުކުރައްވާފައިވާ ފާތިމަތު ޝިވްރީނާއި ޖެހިގެން އައި މޭ މަހު އައްޔަނުކުރެއްވި މުހައްމަދު އާޒާދަށް ރުހުން ދިނުމުގެ މައްސަލައެއް ވެސް އޮތެވެ. ނަމަވެސް މަޖިލީހުގެ ރައީސް މުހައްމަދު އަސްލަމް ވިދާޅުވީ، މިދިޔަ ބުދަ ދުވަހު ދެ ބޭފުޅުން އިސްތިއުފާ ދެއްވާފައިވާ ކަމަށެވެ.
