އިޒްރޭލުން ފަލަސްތީނުގައި ހިންގަމުންދާ ގަތުލުއާންމު ކުށްވެރިކޮށް ބަޔާން ނެރުމުގެ އިތުރުން ސަރުކާރުން ކުރެވެން ހުރި ހުރިހާ ކަމެއް ކުރުމަށް، ރައްޔިތުންގެ މަޖިލީހުގެ މެންބަރުން މިއަދު ގޮވާލައްވައިފިއެވެ.
ފަލަސްތީނުގައި އިޒްރޭލުން ހިންގާ ޖަރީމާތަކާ ގުޅިގެން އިޒްރޭލަށް ދަތިކުރުމަށް ގޮވާލައްވައި، ވިލިނގިލި ދާއިރާގެ މެންބަރު ސައުދު ހުސައިން ހުށަހެޅުއްވި ގަރާރަށް މަޖިލީހުގައި ބަހުސްކުރެއްވި ހުރިހާ މެންބަރުން ވަނީ ތާއީދުކުރައްވައިފައެވެ.
މައިގަނޑު ގޮތެއްގައި ގަރާރަށް ބަހުސްކުރެއްވި ހުރިހާ މެންބަރުން ވަނީ ރާއްޖެ އަށް އިޒްރޭލުގެ ރައްޔިތުންނަށް އެތެރެނުވެވޭ ގޮތް ހެދުމަށާއި، އެ ގައުމުގެ އުފެއްދުންތަކާއި އެ ގައުމުން ބޭރުކުރާ ތަކެތި ރާއްޖެ އަށް އެތެރެކުރުން މަނާކުރުން ފަދަ ކަންކަން ކުރުމަށް ގޮވާލައްވައި ހިޔާލު ފާޅުކުރައްވައިފައެވެ.
މި ގަރާރަށް ވާހަކަ ދެއްކެވި މެންބަރުންގެ ތެރެއިން މާފަންނު މެދު ދާއިރާގެ މެންބަރު އިބްރާހީމް ރަޝީދާއި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވިދާޅުވީ، އިޒްރޭލުން ފަލަސްތީނުގައި ބޮޑު ގަތުލު އާންމެއް ހިންގަމުން ދާއިރު، ޑިމޮކްރެސީ އާއި އިންސާނީ ހައްގުތަކަށް ވަކާލާތުކުރާ ބޮޑެތި ގައުމުތަކާއި ޖަމިއްޔާތަކުން ކަންބޮޑުވުން ފާޅުނުކޮށް ބޮޑެތި ބާރުތަކުން އަޅާނުލާ ތިބޭތީ އަންތަރީސްވާ ކަމަށެވެ. އިޒްރޭލުން ފަލަސްތީނުގައި ޖަރީމާ ހިންގަނީ މުޅި ދުނިޔޭގެ ކުރިމަތީގައިކަން ދެ ބޭފުޅުން ވެސް ފާހަގަކުރެއްވިއެވެ.
އިމްތިޔާޒް ވަނީ އިޒްރޭލުގެ ހައްގުގައި ޑިމޮކްރެސީ އާއި އިންސާނީ ހައްގުތަކަށް ވަކާލާތުކުރާ ބައެއް ގައުމުތަކުގައި މުޒާހަރާކުރާ މީހުންނަށް އެ ގައުމުތަކުން ހިތްވަރުދޭ ކަމާއި، ނަމަވެސް ފަލަސްތީނަށް ހިތްވަރުދީ އެ ގައުމު މިނިވަންކުރުމަށް ގޮވާލާ ޝުއޫރު ފާޅުކުރުމަށް އެ ގައުމުތަކުގައި ބާއްވާ އެއްވުންތަކަށް ގައުމުތަކުގެ ސަރުކާރުން ހުރަސް އަޅާކަން ފާހަގަކުރައްވައިފައެވެ. ހަމަ އެހެންމެ ހުޅަނގުގެ ގިނަ މީޑިއާތަކުން ވަކިކޮޅަކަށް ބުރަވެ، ސޯޝަލް މީޑިއާގެ އެކި ޕްލެޓްފޯމްތަކުން ފަލަސްތީނާ ގުޅުންހުރި ކޮންޓެންޓު ބްލޮކްކުރާ ކަން ވެސް އޭނާ ފާހަގަކުރެއްވިއެވެ.
މީގެ އިތުރުން ފޮނަދޫ ދާއިރާގެ މެންބަރު މޫސާ ސިރާޖާއި ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުއްލަތީފާއި މަކުނުދޫ ދާއިރާގެ މެންބަރު މުހައްމަދު ރާއީ ވަނީ އިޒްރޭލުން ފަލަސްތީނުގައި ހިންގާ ގަތުލުއާންމުތައް ކުށްވެރިކޮށް ބަޔާނެއް އެކަނި ނެރޭތީ އެކަން ފާހަގަކުރައްވައިފައެވެ. ސިރާޖު ވިދާޅުވީ، އިޒްރޭލުން ހިންގާ ލާއިންސާނީ އަމަލުތައް ނުހުއްޓުވައިފިނަމަ ބައިނަލްއަގުވާމީ މުއާހަދާތަކަށް އެހެން ގައުމުތަކުން ވެސް އަމަލުކުރުން ހުއްޓާލާ ބޮޑު ބިރުވެރިކަމަކަށް ދުނިޔެ ދިއުން ގާތް ކަމަށެވެ.
ރާއީ ވިދާޅުވީ، ފަލަސްތީނާ އެކު ދިވެހިން ތިބިކަން ހާމަކޮށް ރައްޔިތުންނަށް ކުރެވެން ހުރި ކަންކަން ކުރަމުންދާ ކަން ފެނިވަޑައިގަންނަވާ ކަމަށާއި އެކަމުގެ ނަތީޖާއެއްގެ ގޮތުން އިޒްރޭލަށް އެނގުންވެ، ރާއްޖެ އަށް ދަތުރުނުކުރުމަށް އިޒްރޭލުގެ ރައްޔިތުންނަށް އެ ގައުމުން އަންގާފައިވާ ކަމަށެވެ.
ދިވެހިން ފަލަސްތީނުގެ ހައްގުގައި އެކި ކަންކަން ކުރަމުން ދާއިރު، ސަރުކާރަށް ވެސް ކުރެވޭނެ ކަންކަން ހުންނާނެ ކަން ރާއީ ފާހަގަކުރެއްވިއެވެ. އެގޮތުން ޓްވިޓާގައި އެއްޗެއް ޖެހުން ނުވަތަ މީޑިއާތަކަށް ބަސްދީގަތުން ދިނުމުގެ އިތުރުން ނޫސްބަޔާންތައް ނެރެ ސިޔާސީ ޕާޓީތަކުން އެއްވުންތައް އިންތިޒާމްކުރެވޭނެ ކަމަށް އޭނާ ވިދާޅުވިއެވެ.
ރާއީ އަށް ފަހު ވާހަކަ ދެއްކެވި ޔާސިރު ވަނީ ސަރުކާރުގެ އެއްވެސް އޮފިޝަލަކު އިޒްރޭލުގެ އެއްވެސް އޮފިޝަލަކާ ރަސްމީ ވާހަކަތައް ދެއްކުމާއި އިޒްރޭލުގެ ސަރުކާރާ ގުޅުން އޮންނަ އެއްވެސް ފަރާތަކާ ރަސްމީ ވާހަކަތައް ދެއްކުން މަނާކަމެއްގެ ގޮތުގައި ކަނޑައެޅުމަށާއި އިޒްރޭލުގެ ބައެއް ވިޔަފާރިތަކާ އެކު މުއާމަލާތްކުރުން މަނާކުރުމަށް ހުށަހަޅުއްވައިފައެވެ. އޭނާ ވިދާޅުވީ ބޭނުމަކީ ގާނޫނެއް ފާސްކޮށްގެން ވިޔަސް އިތުރު ހަރުފަތަކަށް މި ކަން ގެންދިއުން ކަމަށެވެ.
މަތިވެރި ދާއިރާގެ މެންބަރު ހަސަން ޒަރީރު ވަނީ، އިޒްރޭލުން ފަލަސްތީނުގައި ޖަރީމާ ހިންގައި ކުޑަކުދިން މަރަމުން ދާއިރު، އދ އާއި ބޭރުގެ ޖަމިއްޔާތައް ކޮބައިތޯ ސުވާލުކުރައްވައިފައެވެ. އޭނާ ވިދާޅުވީ ވަކި ބަޔަކު ކަމެއް ކުރީމާ ބޮޑެތި ޖަމިއްޔާ ޖަމާއަތްތަކުން ލޯ މަރާލައިގެން ތިބޭތީ ހިތާމަކުރައްވާ ކަމަށާއި، އިޒްރޭލުން ހޮސްޕިޓަލުތައް ފަދަ ތަންތަނަށް ހަމަލާ ދެމުން ދާއިރު އިންސާނީ ހައްގުތަކަށް ވަކާލާތުކުރާ ގައުމުތަކުން މިކަން ނުހުއްޓުވާތީ ހިތާމަކުރައްވާ ކަމަށެވެ.
