ސަރުކާރުން މިދިޔަ އަހަރު ތަސްދީގުކުރި ކުނި މެނޭޖުކުރުމާ ބެހޭ ގާނޫނަށް ހޯރަފުށި ދާއިރާގެ މެންބަރު އަހްމަދު ސަލީމް ހުށަހެޅުއްވި އިސްލާހަށް ބަހުސްކުރުމަށް އެ ބިލު މުޅި މަޖިލީހުގެ ކޮމިޓީ އަށް މިއަދު ފޮނުވައިފިއެވެ.
ސަލީމް ހުށަހެޅުއްވީ، އެ ގާނޫނުގެ ދަށުން މަތިކޮށްފައިވާ ޕްލާސްޓިކް ކޮތަޅުތަކުން ނަގާ ދެ ރުފިޔާގެ ފީ، ބައި ރުފިޔާ އަކަށް ކުޑަކުރުމަށެވެ. އެ ހައްލު ހިމެނޭހެން، މިދިޔަ އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ސަލީމް ވަނީ ތިން ހައްލެއް ހުށަހަޅުއްވައި ފައެވެ. އެއީ:
- ރޯމަސް އުފުލުމާއި ކުނިވާ ޒާތުގެ ކުނި އުކާލުން ފަދަ ކަންކަމަށް ގަނޑުކޮށް ކޮތަޅު ގަތުމަކީ ފީ ނެގުމުން އިސްތިސްނާ ހާލަތެއްގެ ގޮތުގައި ކަނޑައެޅުމަށް
- ރީޓެއިލް ފިހަރާތަކާއި ސައި ހޮޓާތަކަށް އިދާރީ ގޮތުން ބުރަ ނުވާ ގޮތަކަށް ފީ ނެގުމުގެ ނިޒާމު ބަދަލުކުރުމަށް
އެހެންކަމުން މި ހުށަހެޅުން ދިރާސާކުރުމަށްޓަކައި 40 މެންބަރުންގެ އިއްތިފާގުން މި އިސްލާހު ވަނީ މުޅި މަޖިލީހުގެ ކޮމިޓީ އަށް ފޮނުވައިފައެވެ. މިއަދުގެ ޖަލްސާގެ ރިޔާސަތު ބެލެހެއްޓެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ، މުޅި މަޖިލީހުގެ ކޮމިޓީ އަށް މި ހުށަހެޅުން ދިރާސާކުރުމަށް ފޮނުވީ، ޓެކުހާ ގުޅޭ މާއްދާ އެއް ހިމެނޭތީ ކަމަށެވެ.
ޕްލާސްޓިކް ކޮންމެ ކޮތަޅަކުން ދެ ރުފިޔާ ނަގަން ޖެހޭ ގޮތަށް ކުނި މެނޭޖުކުރުމާ ބެހޭ ބިލު ފާސްކުރީ މިދިޔަ ނޮވެމްބަރު މަހުގެ 28 ގައެވެ. އެ ބިލު ޖެހިގެން އައި ޑިސެމްބަރު މަހުގެ 18 ގައި ގާނޫނަކަށް ވެ، ކޮތަޅުތަކުން ދެ ރުފިޔާގެ ފީ އެއް ނަގަން ފެށީ މިދިޔަ އޭޕްރިލް މަހުގެ 18 ގައެވެ.
މީގެ އިތުރުން މިއަދުގެ މަޖިލީހުގައި ދެ ބިލަކާއި ދެ ގަރާރެއް ފާސްކޮށް، އޭގެ ތެރެއިން އެއް ބިލަކާއި ދެ ގަރާރު ވަނީ ކޮމިޓީގެ މަރުހަލާގައި ދިރާސާކުރުމަށް ފޮނުވައިފައެވެ. އެއީ:
- އިންޑަސްޓްރިއަލް ރިލޭޝަންސްގެ ބިލު: 43 މެންބަރުންގެ ވޯޓާ އެކު އިގްތިސޯދީ ކޮމިޓީ އަށް
- އިންތިހާބުތަކާ ބެހޭ ގާނޫނަށް ގެނައި އިސްލާހު: 43 މެންބަރުންގެ ވޯޓުން (މިހާރު އޮތީ ތަސްދީގުކުރުމުގެ މަރުހަލާގައި)
- ލ. ހިތަދު އާއި ކުނަހަންދޫ ގުޅުވާލުމަށް ހަމަޖެހިފައިވާ ކޯޒްވޭގެ މަސައްކަތް އަވަސްކޮށްދިނުމަށް ގޮވާލާ ހުށަހެޅި ގަރާރު: 39 މެންބަރުންގެ ވޯޓާ އެކު
- ހުއްޓިފައިވާ ލ. ކުނަހަންދޫގެ އިންޖީނުގެ އާއި ނަރުދަމާގެ މަސައްކަތް އަވަސްކުރުމަށް ގޮވާލާ ހުށަހެޅި ގަރާރު: 38 މެންބަރުންގެ ވޯޓާ އެކު
މާވަށު ދާއިރާގެ މެންބަރު މުހައްމަދު ސައީދު ހުށަހެޅުއްވި ދެ ގަރާރު ވެސް ވަނީ މަޖިލީހުގެ ގައުމީ ތަރިކަ އާއި ތަރައްގީގެ ކޮމިޓީ އަށް ފޮނުވައިފައެވެ.
