އައްޑޫ ސިޓީގެ ދެ ސަރަހައްދަކުން ހިއްކާފައިވާ ތިން ރަށަކަށް ނަންކިޔުމަށް އާއްމުންގެ ހިޔާލު ހޯދުމަށް އައްޑޫ ސިޓީ ކައުންސިލުން ހުޅުވާލައިފިއެވެ.
އައްޑޫ ސިޓީ ކައުންސިލުން ބުނީ އައްޑޫ ސިޓީ ހިތަދޫ ފަޅުތެރޭގައި ހިއްކާފައިވާ 2 ރަށާއި، މީދުއާ އިންވެގެން އޮތް ފަޅުތެރޭގައި ހިއްކާފައިވާ 1 ރަށުގައި ރިސޯޓު ތަރައްޤީކުރަން، ބީލަމަށް ހުޅުވާލުމަށްޓަކައި މި ރަށްތަކަށް ނަންކިޔުމަށް ނިންމާފައިވާކަމަށެވެ.
ކައުންސިލުން ކުރި އިއުލާނުގައި ބުނީ މި ރަށްތަކަށް ނަންކިޔުމުގައި އަމަލުކުރަންޖެހެނީ މޯލްޑިވްސް ލޭންޑް އެންޑް ސާވޭ އޮތޯރިޓީން ތައްޔާރުކޮށް ގެޒެޓުކޮށްފައިވާ "ޖިއޮގުރަފިކް ތަންތަނަށް ނަންކިޔުމުގެ އުސޫލު" އާ އެއްގޮތްވާގޮތުގެ މަތިން ކަމަށެވެ. މި ރަށްތަކަށް ނަން ކިޔާއިރު މި ގަވާއިދުގެ 5 ވަނަ ނަމްބަރުގެ (ހ) އަދި (ށ) ގައިވާ ނުކުތާތަކަށް ރިޢާޔަތްކޮށް ދިނުމަށް ކައުންސިލުން ވަނީ އެދިފައެވެ.
މި ގޮތުން މި އުސޫލުގެ 5 ވަނަ ނަމްބަރުގެ (ހ) ގައި ވަނީ އެ ހުށަހަޅާ ނަމެއް ވާންޖެހޭނީ ދިވެހި ބަހުން ކިޔޭ ނަމަކަށް ވުމާއެކު އާންމު އިޖްތިމާއީ މިންގަނޑުތަކާ އަހްލާގީ މިންގަނޑަށް ފެތޭ ނަމަކަށްވުމެވެ. އަދި އެ ނަމަކީ އެހެން މީހަކަށް ނުވަތަ ތަނަކަށް ކިޔާ ނަމަކަށް ނުވުމާއެކު، ކިޔަން ފަސޭހަ ސާދާ ރިވެތި ނަމަކަށް ވާންޖެހެއެވެ.
މީގެ އިތުރުން އެ އުސޫލުގެ ނަމްބަރު (ށ) ގައި ވާ ގޮތުން އެސަރަހައްދެއްގެ ގުދުރަތީ އުމުރާ ތާރީހާއި ގުޅުވާ އަދި ގުދުރަތީގޮތުން ލިބިފައިވާ ހާއްސަ ސިފަތަކަށް ރިއާޔަތްކުރަންޖެހެއެވެ.
އައްޑޫ ކައުންސިލުން ވަނީ މި ރަށްތަކަށް ކިޔަން ބޭނުންވާ ނަން ގޫގުލް ފޯމް މެދުވެރިކޮށް ހުށަހެޅުމަށް އެދިފައެވެ.
ކީއްކުރަން ތަ ރަށް ކިޔަނީކީ. ޢަވަށޭ ކީމަ ވީނު