އައްޑޫ ސިޓީގެ ރައްޔިތުންނަކީ ކަންކަން ވަރަށް ރަނގަޅަށް ދަންނަ، ހޭލުންތެރި ބައެއް ކަމަށާއި އެ ރައްޔިތުން ވާވައްދަން ސަރުކާރުން މަސައްކަތް ކުރާނެ ކަމެއް ނެތް ކަމަށް ކުރީގެ ރައީސުލްޖުމްހޫރިއްޔާ އަބްދުﷲ ޔާމީން ވިދާޅުވެއްޖެއެވެ.
ޕީޕަލްސް ނެޝަނަލް ފްރަންޓް (ޕީއެންއެފް) އިން އައްޑޫ ސިޓީގައި ބޭއްވި ޓައުންހޯލް ބައްދަލުވުމަށް ފަހު ނޫސްވެރިންނަށް މައުލޫމާތު ދެއްވަމުން ރައީސް ޔާމީން ވިދާޅުވީ، މި ސަރުކާރުން ހިންގަމުންދާ އެކި ކަހަލަ ވިޔާނުދާ ކަންކަމުގެ ފުރިހަމަ މައުލޫމާތު އައްޑޫ ރައްޔިތުންނަށް އެނގޭ ކަމަށާއި، އެކަންކަމާ މެދު އައްޑޫގެ ރައްޔިތުން އިންތިހާއަށް ކަންބޮޑުވުން ފާޅުކޮށްފައިވާ ކަމަށެވެ.
ހާއްސަ ގޮތެއްގައި މާލެ ކައިރިން ހިއްކަމުންދާ 'ރަސްމާލެ' މަޝްރޫއަށް އިޝާރާތް ކުރައްވައި އެމަނިކުފާނު ވިދާޅުވީ، އެއީ ރާއްޖޭގެ އެއްވެސް ރައްޔިތަކު ގަބޫލުކުރާ މަޝްރޫއެއް ނޫން ކަމަށާއި، އެ ވާހަކައަކީ އައްޑޫގެ ރައްޔިތުން ވެސް މިއަދު ފާޅުގައި ދައްކަމުންދާ ވާހަކައެއް ކަމަށެވެ. އަދި މި ސަރުކާރުން ގޯސްކޮށް ކުރަމުންދާ ކަންކަމުގެ ހަގީގަތް އެ ރައްޔިތުންނަށް ވަރަށް ސާފުކޮށް އެނގޭ ކަމަށް ވެސް ވިދާޅުވިއެވެ.
ރައީސް ޑރ. މުހައްމަދު މުއިއްޒަށް އަމާޒުކުރައްވައި ރައީސް ޔާމީން އިތުރަށް ވިދާޅުވީ، ދިވެހި ރައްޔިތުންގެ މަސްލަހަތާ ގުޅުންހުރި ކަންކަމުގައި ސަރުކާރުން މިހާރު ހިންގަމުންދާ ނޭދެވޭ ކަންކަމަށް ރައްޔިތުން ކެތްކޮށްގެން ތިބި ކަމަށް ސަރުކާރުން ހީކުރުމަކީ ކުށްހީއެއް ކަމަށެވެ. އަދި މިއަދު ދިވެހި ހުރިހާ ރައްޔިތުން ވެސް އެދިއެދި ތިބީ މި ހާލަތު ބަދަލުވާނެ ދުވަހަކަށް ކަމަށް އެމަނިކުފާނު ފާހަގަކުރެއްވިއެވެ.
މީގެއިތުރުން، އެއްވެސް ވެރިއަކު ނުވަތަ ސަރުކާރަކުން ރައްޔިތުންނަށް ކަންކަމުގެ ސައްހަ މައުލޫމާތު ނުލިބޭނެ ކަމަށް ގަބޫލުކުރެއްވުމަކީ ވަރަށް ބޮޑު ގޯހެއް ކަމަށާއި، ސަރުކާރުން ކުރާ ކަންކަމުގެ ހަގީގަތް ރައްޔިތުންނަށް ސިއްރު ނުކުރެވޭނެ ކަމަށް ވެސް ރައީސް ޔާމީންގެ ވާހަކަފުޅުގައި ވިދާޅުވިއެވެ.
