ތ. ވޭމަންޑޫ ކައުންސިލްގެ އަންހެނުންނަށް ހާއްސަ ގޮނޑި ޕީޕީއެމްއަށް ލިބިފައިވާ ކަމަށް އެޕާޓީން ބުނެފިއެވެ.
ވޭމަންޑޫ ކައުންސިލްގެ އަންހެނުންނަށް ހާއްސަ ގޮނޑި ހޮވުމަށް ބައި އިލެކްޝަން ބާއްވަން ތާވަލުކުރީ އަންނަ ސެޕްޓެމްބަރު މަހުގެ 23 ވަނަ ދުވަހުއެވެ.
އީސީގެ ނައިބު ރައީސް އިސްމާއީލް ހަބީބު ވިދާޅުވީ، މި އިންތިހާބަށް ނަން ހުށަހެޅުމުގެ ފުރުސަތު ހުޅުވާލައި އެ މުއްދަތު ހަމަވިއިރު ނަން ހުށަހަޅާފައިވަނީ ޕީޕީއެމްގެ ފަރާތުން ތ. ވޭމަންޑޫ، ކެނެރީ ވިލާ ނާއިލާ އަހުމަދެވެ.
ހަބީބު އިތުރަށް ވިދާޅުވީ، މި އިންތިހާގައި ވާދަކުރެއްވުމަށް ނާއިލާގެ އިތުރުން އެމްއެންޕީގެ ކެންޑިޑޭޓެއްވެސް ނަން ހުށަހެޅި ކަމަށެވެ. ނަމަވެސް ސުންގަޑި ހަމަވިއިރު ވެސް ފޯމާއެކު، ހުށަހަޅަންޖެހޭ ތަކެތި ހުށަނާޅާތީ އެ ހުށަހެޅުން ގަބޫލުނުކުރުމަށް އީސީން ނިންމީ ކަމަށް ހަބީބު ވިދާޅުވިއެވެ.
އެހެންކަމުން އިންތިހާބަކާ ނުލައި ނާއިލާ ވަނީ ވޭމަންޑޫ ކައުންސިލްގެ އަންހެން މެމްބަރުންނަށް ހާއްސަ ގޮނޑި ކާމިޔާބު ކުރައްވާފައެވެ.
ނާއިލާ މި އިންތިހާބު ކާމިޔާބުކުރެއްވުމާ ގުޅިގެން ހަބީބު ވަނީ ނާއިލާ އަށް އަދި ޕީޕީއެމަށް ތަހުނިޔާ ދަންނަވާފައެވެ.
