މޯލްޑިވްސް ނެޝެނަލް ޕާޓީ (އެމްއެންޕީ)ގެ ސަރުކާރެއްގައި ހއ. ދިއްދޫގައި އެއާޕޯޓެއްގެ އިތުރުން ޓާޝަރީ ހޮސްޕިޓަލެއް އަޅާނެ ކަމަށް އެ ޕާޓީގެ ރައީސް، މުހައްމަދު ނާޒިމް ވިދާޅުވެއްޖެއެވެ.

ރޭ ދިއްދޫގައި ބޭއްވި ރިޔާސީ އިންތިހާބުގެ ކެމްޕެއިން ޖަލްސާއެއްގައި ވާހަކަދައްކަވަމުން ނާޒިމް ވަނީ މިސަރުކާރުން ދިއްދޫއަށް ކޮށްދިން އެއްވެސް ކަމެއް ނެތްކަން ފާހަގަކުރައްވާ މި ސަރުކާރުން ދިއްދޫއަށް އިހުމާލުވެފައިވާ ކަމަށް ވިދާޅުވެފައެވެ.

މިގޮތުން އެރަށުގައި އެއްވެސް ޕްރޮޖެކްޓެއް ހިނގާފައި ނެތްއިރު ސަރުކާރުގެ ފަސް އަހަރު ދުވަހުގެ ތެރޭގައި ދިއްދޫގެ ރައްޔިތުންނަށް ލިބުނު އުފަލެއް ނެތް ކަމަށް ނާޒިމް ފާހަގަކުރެއްވިއެވެ.

ނާޒިމް އިތުރަށް ވިދާޅުވީ، ދިއްދޫގެ ސިއްހީ ހިދުމަތް ދޭ ތަނަކީ ވެސް ވަރަށް ދަށް ފެންވަރެއްގައި ހުރި ތަނެއް ކަމަށެވެ. ރަށުގައި ބޮޑު އިމާރާތެއް ހުރުމަކުން ނުފުދޭ ކަމަށާއި އެއިމާރާތުން އެކަމަށް ބޭނުންވާ ހިދުމަތް ލިބެން ޖެހޭ ކަމަށް ނާޒިމް ވިދާޅުވިއެވެ. މިގޮތުން އަންހެނުންނަށް ހާއްސަ ޑޮކްޓަރުންނާއި ކުޑަކުދިންގެ ޑޮކްޓަރުން ތިބެން އެބަ ޖެހޭ ކަމަށް ނާޒިމް ފާހަގަކުރެއްވިއެވެ.

ނާޒިމް ވިދާޅުވީ، އެމްއެންޕީގެ ސަރުކާރެއްގައި ދިއްދޫގައި ޓާޝަރީ ހޮސްޕިޓަލެއް އަޅައި، މީހުން ހަމަކޮށް ހުރިހާ ވަސީލަތެއް ހަމަ ކުރާނެ ކަމަށެވެ. މީގެ އިތުރުން ދިއްދޫގައި އެއާޕޯޓެއް ވެސް އަޅާނެ ކަމަށް ނާޒިމް ވަނީ ވިދާޅުވެފައެވެ.

ރިޔާސީ އިންތިހާބުގައި އެމްއެންޕީ ތަމްސީލުކުރާނެ ކެންޑިޑޭޓެއް ނެރުމަށްޓަކައި އެ ޕާޓީން ޕްރައިމަރީ އެއް ބާއްވާނެ ކަން އިއުލާނު ކުރީ މިދިޔަ ޑިސެމްބަރު މަހުގެ ފުރަތަމަ ދުވަހުގައެވެ. އެ މަހުގެ 14 ވަނަ ދުވަހުގެ ނިޔަލަށް ހުޅުވާލި ފުރުސަތުގައި ޕްރައިމަރީގައި ވާދަކުރެއްވުމަށް ކުރިމަތިލެއްވީ ނާޒިމް އެކަނި ކަމުން، އެމްއެންޕީގެ ޓިކެޓް އޮޓޮމެޓިކުން ވަނީ ނާޒިމަށް ކަށަވަރު ވެފައެވެ. އަދި މިދިޔަ މަހުގެ 26 ވަނަ ދުވަހު ނާޒިމަށް ވަނީ ރިޔާސީ ޓިކެޓު ހަވާލުކޮށްފައެވެ.

ހަބަރު ކާނަލް ނާޒިމް އެމްއެންޕީ