އިދިކޮޅު ޕްރޮގްރެސިވް ކޮންގްރެސް ކޯލިޝަންގެ އިހްތިޖާޖު އިއްޔެ ހަވީރު ކުރިއަށް ދިޔަ ވަގުތު، ސައިކަލެއްގައި ކުޑަކުއްޖެއް ގޮވައިގެން ދިޔަ މީހަކު އިހްތިޖާޖު ހިނގަމުން ދިޔަ ޕީޕީއެމް އޮފީހުގެ ސަރަހައްދުގައި މަޑުކޮށް އެ ތަނުގައި ތިބި ފުލުހުންގެ "ފޮޓޮއެއް ނެގުމުން"، ކުއްޖާގެ ކުރިމަތީގައި އޭނާ ހައްޔަރުކުރި ގޮތުން ފުލުހުންނަށް ފާޑުކިޔަމުން ދަނިކޮށް އޭނާ ހައްޔަރު ކުރީ ފުލުހުންނާ ދިމާއަށް އެއްޗެއް އެއްލުމުން ކަމަަށް ބުނެފިއެވެ. އަދި އެވަގުތު ކުއްޖަކު ނުދެކޭ ކަމަށްވެސް ފުލުހުން ވަނީ ބުނެފައެވެ.
އެކަމާ ގުޅިގެން ނެރުނު ބަޔާނެއްގައި އިދިކޮޅުން ބުނީ:
- އެ ސަރަހައްދަށް ކުޑަކުއްޖަކާ އެކު ސައިކަލުގައި އެ މީހާ މަޑުކުރީ ފޮޓޮއެއް ނަގަން ކަމަށް
- ފުލުހުން އަނިޔާކޮށް އެ މީހާ ހައްޔަރުކުރީ އެ ސަރަހައްދުން އެ މީހާ ދިއުމަށް މަސައްކަތްކުރަނިކޮށް ކަމަށް
- ފުލުހުން އެކަން ކުރީ އެ ފިރިހެން މީހާގެ ސައިކަލުގައި އިން ކުޑަކުއްޖާ އާ ހަވާލުވަނީ ކާކުތޯ ބެލުމެއް ނެތި ކަމަށް
މި ނުކުތާތައް ފާހަގަކޮށް ނެރުނު ބަޔާނުގައި އިދިކޮޅުން ވަނީ މި މައްސަލަ ބެލުމަށް އެޗްއާރުސީއެމަށާއި އިންޓެގްރިޓީ ކޮމިޝަނަށް ގޮވާލައިފައެވެ. ހަމަ އެއާއެކު، މި މައްސަލަ ބަލައި ކަން ހިނގައި ދިޔަ ގޮތް އާންމުންނަށް ހިއްސާކޮށްދިނުމަށާއި އެ މީހާ ދޫކޮށްލުމަށް ކޮމިޝަނަރު މުހައްމަދު ހަމީދަށް ވަނީ ގޮވާލައިފައެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަ ގޮތުގައި، އިހްތިޖާޖު ހިނގަމުން ދިޔަ ސަރަހައްދުގައި ތިބި އެސްއޯ ފުލުހުންގެ ތެރެއިން ދެ ފުލުހަކު އެ މީހާގެ ދެ އަތުގައި ބާރަށް ހިފަހައްޓައެވެ. އެއަށްފަހު އެސްއޯ ފުލުހުން އޭނާ ވަށާލައި، ގެންގޮސް، ފުލުހުންގެ ވެހިކަލަށް އަރުވާ މަންޒަރު ފެނެއެވެ. ފޮޓޯތަކުން ފެންނަ ގޮތުގައި އެ މީހާގެ ފައިގެ ބޮޑުވާ އިނގިލީގައި އޮތީ މަލަން އަޅާފައެވެ.
ފުލުހުންނަށް ފާޑުވިދާޅުވެ މަހިބަދޫ ދާއިރާގެ މެންބަރު އަހްމަދު ތޯރިގު ވިދާޅުވީ، ފުލުހުން އެ މީހާ ހައްޔަރުކޮށްގެން ގެންދިޔަ ގޮތް ތަހްގީގުކޮށް ބަލަން ޖެހޭ ކަމަށެވެ. އަބްދުﷲ ޒިފާން ޒާހިދުގެ ނަމުގައި ޓްވިޓާގައި ހިޔާލު ފާޅުކުރި ޕީޕީއެމްގެ އެކްޓިވިސްޓަކު ބުނީ، ފުލުހުން އެ މީހާ ހައްޔަރުކުރި ގޮތުގެ ސަބަބުން އެ ތަނުގައި ހުރި ކުޑަކުއްޖާ އަށް ނަފްސާނީ ގޮތުން އަސަރުކުރާނެ ކަމަށާއި، އެއީ ކަންބޮޑުވާ ކަމެއް ކަމަށެވެ.
ނަމަވެސް މާ ބޮޑު ތަފްސީލެއް ދިނުމެއް ނެތި ކުރި ޓްވީޓެއްގައި ފުލުހުން ބުނީ، އިދިކޮޅުން އިއްޔެ ކުރިއަށް ގެންދިޔަ އިހްތިޖާޖުގެ ތެރެއިން ފުލުހުން ހައްޔަރުކުރީ، އިހްތިޖާޖު ހިނގަމުން ދިޔަ ސަރަހައްދުގައި ތިބި ފުލުހުންގެ ކުރި މައްޗަށް އަރައި ފުލުހުންނާ ދިމާލަށް އެއްޗެއް އެއްލި މައްސަލައިގައި ކަމަށާއި، އެ މީހާ ހައްޔަރުކުރަން މަސައްކަތްކުރި ވަގުތު ކައިރީގައި ކުޑަކުއްޖެއް ނެތް ކަމަށެވެ.
