އިދިކޮޅު ޕީޕީއެމްގެ ކެލާ ދާއިރާގެ ރައީސް އަހުމަދު ގާލިބް، އެ ޕާޓީން ވަކިވެއްޖެއެވެ.
ޣާލިބް ކުރި ޓުވީޓެއްގައި ބުނީ، ޕީޕީއެމްއާ އެކުގައި ކުރިއަށް ދިޔުމަށް އެކަށީގެންވާ ހާލަތެއް ނެތުމުން ޕީޕީއެމް/ޕީއެންސީގެ ކެލާ ދާއިރާގެ ރައީސް ކަމުންނާޢި ޕާޓީގެ ސެނެޓުން މިއަދުން ފެށިގެން އިސްތިއުފާ ދޭން ނިންމަވާފައިވާ ކަމަށެވެ.
މީގެ އިތުރުން ޕީޕީއެމުން ވަކިވުމަށް ސިޓީ ފޮނުވާފައި ވާ ކަމަށް ވެސް ޣާލިބް ބުނެއެވެ.
ޕީޕީއެމްގެ ކެލާ ދާއިރާގެ ރައީސް ކަމަށް ޣާލިބް އިންތިހާބު ކޮށްފައި ވަނީ މިދިޔަ ނޮވެމްބަރު މަހުގެ ތެރޭގައެވެ. ދާއިރާގެ ރައީސަކަށް އޭނާ އިންތިހާބު ވީ ޕީޕީއެމްގެ އާންމު މެމްބަރުންގެ 239 ވޯޓުންނެވެ.
ޣާލިބަކީ ޕީޕީއެމްގެ ނައިބު ރައީސް, މާލޭ ސިޓީ މޭޔަރު ޑރ. މުހައްމަދު މުއިއްޒުގެ ދެބެންގެދެދަރި މީހެކެވެ. އަދި ޖުމްހޫރީޕާޓީގެ ނައިބު ރައީސް އިގްބާލް އާދަމް އާއި ސެކްރެޓަރީ ޖެނެރަލް އަލީ އާރިފްގެ ކޮއްކޮއެވެ.
ރިޔާސީ އިންތިހާބުގައި ޕީޕީއެމްގެ ކެންޑިޑޭޓް ކުރީގެ ރައީސް އަބްދުﷲ ޔާމީނަށް ކުރިމަތި ނުލެވޭ ހާލަތެއްގައި އެހެން ކެންޑިޑޭޓަކު ނެރުމާމެދު ޕާޓީގެ މެންބަރުންގެ ތެރޭގައި ހިޔާލުތަފާތުވުންތައް އުފެދިފައި ވާ އިރު، ދެން ކުރިމަތިލައްވާނެ ކަމަށް ކިޔާ ކެންޑިޑޭޓުންގެ ތެރޭގައި ޑރ. މުއިއްޒުގެ ނަން ކިޔައެވެ.
