ކެނެޑާގެ ހުޅަނގުގައިވާ އެލްބަޓާ ޕުރޮވިންސުގެ ޖަންގަލިތަކުގައި ރޯވެފައިވާ އަލިފާންގަނޑު ކޮންޓްރޯލް ނުކުރެވި އާންމުން ދިރިއުޅޭ ސަރަހައްދު ތަކަށް ފެތުރެމުންދާތީ އެޕުރޮވިންސްގެ ހުރިހާ ސަރަހައްދެއްގައި ކުއްލި ހާލަތު އިއުލާން ކޮށްފިއެވެ.
ކެނެޑާގެ އެންމެ ގިނައިން ތެޔޮ އުފައްދާ ސަރަހައްދު ކަމަށްވާ އެލްބަޓާ ފުރޮވިންސްގައި އަލިފާން ރޯވެފައި މި ވަނީ ވާރޭ ނުވެހި ގިނަ ދުވަސް ވުމުގެ ސަބަބުންނެވެ. އެލްބަޓާގެ ޖަންގަލީގައި 100 އަށްވުރެ ގިނަ އަލިފާންގަނޑު ރޯވެ، މީހުން ދިރިއުޅެމުންދާ ސަރަހައްދަށްވެސް ވަނީ އަލިފާނުގެ އަސަރު ފޯރަން ފަށާފައެވެ.
އަލިފާނުގެ ނުރައްކާ ކުރިމަތިވެފައިވާ ސަރަހައްދު ތަކުގައި ދިރިއުޅޭ 25،000 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައި ވާއިރު އަލިފާން ނިއްވުމަށް 700 އަށް ވުރެ ގިނަ ފަޔާ ފައިޓަރުން ދަނީ ހަރަކާތްތެރި ވަމުންނެވެ. ގަދައަށް ވައިޖެހުމުގެ ސަބަބުން އަލިފާން ކޮންޓްރޯލް ކުރުމަށް ގިނަ ގޮންޖެހުންތަކެއް ކުރިމަތިވެފައި ވާއިރު ކުރިއަށް އޮތް ދުވަސްތަކުގައި އެހެން ސަރަހައްދުތަކުން 1000 ފަޔާ ފައިޓަރުން ގެންދިޔުމުގެ މަސައްކަތް ވެސް ދަނީ ކުރަމުންނެވެ.
އެލްބަޓާ ޕުރޮވިންސުގެ ޕްރިމިޔާ ޑެނިއެލް ސްމިތް ވިދާޅުވީ އަލިފާން ނިއްވުމުގައި އެ ސަރަހައްދުގައި ހާލުގައި ޖެހިފައިވާ މީހުންނަށް އެހީވުމަށް އަދިވެސް ވޮލެންޓިއަރުން ބޭނުންވާ ކަމަށެވެ.
