ކުށުގެ ވެށިން ހައްޔަރުކުރެވޭ ބިދޭސީން އަނބުރާ އެ މީހުންގެ ގައުމަށް ފޮނުވާލުމަށް ކުރަމުންދާ މަސައްކަތްތަކުގައި އެ މީހުން ނިސްބަތްވާ ގައުމުތަކުގެ އެމްބަސީތަކުން އެކަށީގެންވާ ގޮތެއްގައި އެއްބާރުލުން ނުލިބޭތީ އެ މަސައްކަތްތަކަށް ގޮންޖެހުންތައް ދިމާވާ ކަމަށް، ހޯމް މިނިސްޓަރު އިމްރާން އަބްދުﷲ މިއަދު ވިދާޅުވެއްޖެއެވެ.
ގަވައިދާ ހިލާފަށް ރާއްޖޭގައި ދިރިއުޅެމުންދާ ބިދޭސީންނާ ދެކޮޅަށް އެޅުނު ފިޔަވަޅުތަކަކީ ކޮބައިތޯ މާފަންނު މެދު ދާއިރާގެ މެންބަރު އިބްރާހީމް ރަޝީދު ކުރެއްވި ސުވާލަށް ޖަވާބު ދެއްވަމުން، އިމްރާން ވިދާޅުވީ، ރާއްޖޭގެ އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގައްޔާއި ޖިނާއީ އަމަލުތައް ހުއްޓުވުމަށްޓަކައި ވޭތުވެދިޔަ ތިން އަހަރު ދުވަހު ބިދޭސީންނާއި ދިވެހިންނަށް ގާނޫނީ ފިޔަވަޅު އަޅާފައި ވާނެ ކަމަށެވެ.
އިމްރާން ވިދާޅުވި ގޮތުގައި، ގަވައިދާ ހިލާފަށް ވޯކް ޕާމިޓާއި ވިސާ ނެތި ރާއްޖޭގައި އުޅެމުންދާ ބިދޭސީންގެ މައްސަލައިގައި އެކަށީގެންވާ ހައްލެއް ހޯދުމަށްޓަކައި ކަމާބެހޭ އިދާރާތައް ކަމަށްވާ އިކޮނޮމިކް މިނިސްޓްރީ އާއި އިމިގްރޭޝަނާ މަޝްވަރާކުރެވުނު ނަމަވެސް، އޭނާ ފާހަގަކުރެއްވި ގޮތުގައި ފުލުހުން އިސްނަގައިގެން އެފަދަ ބިދޭސީންނަށް ސީދާ އަމާޒުކޮށް އޮޕަރޭޝަންތަކެއް ކުރިއަށް ގެންގޮސްފައި ނުވެއެވެ.
އެކަމަކު އިމިގްރޭޝަނާ ގުޅިގެން ފުލުހުން ކުރިއަށް ގެންދިޔަ ބައެއް އޮޕަރޭޝަންތަކުގައި ގަވައިދާ ހިލާފަށް އުޅޭ ބިދޭސީންނާއި، ހިއުމަން ޓްރެފިކިން ފަދަ ކުށްތަކުގެ ޝިކާރައަކަށް ވެފައިވާ ބިދޭސީން ދެނެގަނެ، ކުށް ހިންގުމުގެ ކުރިން ހުއްޓުވިފައިވާ ކަމަށް އިމްރާން ވިދާޅުވިއެވެ.
އޭނާ ފާހަގަކުރެއްވި ގޮތުގައި، ބިދޭސީން ކުރިން ޝާމިލްވުން މަދު ކުށްތަކާއި، ހަށިވިއްކުމާއި ޖުވާ ކުޅުން ފަދަ ބޮޑެތި ކުށްތަކުގައި ބިދޭސީންގެ ބައިވެރިވުން އިތުރުވެފައިވެއެވެ. އެހެންވެ، އެފަދަ ކުށްތައް މަދުކޮށް ފިޔަވަޅު އެޅުމަށްޓަކައި ސަރުކާރުން ސިޔާސަތުތައް ކަނޑައެޅުމަށާއި އޮޕަރޭޝަންތައް ހިންގުމަށް އިތުރު ސަމާލުކަމެއް ދެމުން ގެންދާ ކަން ފާހަގަކުރައްވައި އިމްރާން ވިދާޅުވީ، ޖިނާއީ ކުށުގެ އިތުރުން އެހެން ކުށްތައް ބިދޭސީން ކުރަމުންދާކަން ސަމާލުކަމަށް އައިސްފައިވާ ކަމަށެވެ. އެގޮތުން:
- އާންމުންނަށް އުނދަގޫވާ ގޮތަށް މަގުތައް މަތީގައި އުޅަނދުފަހަރު ސާފުކުރުން
- އެކި މީހުންގެ ފަސް ފަހަތުން އުޅުން
- ގަވައިދާ ހިލާފަށް މަގުމަތީގައި މުދާ ބަހައްޓައިގެން ވިޔަފާރިކުރުން
މިފަދަ ކުށްތައް ހުއްޓުވުމަށްޓަކައި ސިޓީ ކައުންސިލާ އެކު މަސައްކަތްކުރަމުންދާ ކަމަށާއި، އެގޮތުން އެފަދަ ބިދޭސީންގެ އިތުރުން، ކުށްތަކުގައި ޝާމިލްވާ ދިވެހިންގެ ނަންތައް ނޯޓުކޮށް، ކައުންސިލާ ހިއްސާކުރެވެމުންދާ ކަމަށް އިމްރާން ވިދާޅުވިއެވެ.
އެފަދަ ބިދޭސީންނާއި ގަވައިދާ ހިލާފަށް ދިރިއުޅޭ ބިދޭސީން އަނބުރާ އެ މީހުންގެ ގައުމަށް ފޮނުވާލަން މަސައްކަތްކުރާއިރު، ބައެއް ކަހަލަ ގޮންޖެހުންތައް އެބަހުރި ކަމަށް އިމްރާން ވިދާޅުވިއެވެ. އޭނާ ފާހަގަކުރެއްވި ގޮތުގައި، ލިޔެކިއުން ނެތް ބިދޭސީން އަނބުރާ ފޮނުވާލުމަށް އެ މީހުންގެ ގައުމުތަކުގެ އެމްބަސީތަކުންނާއި މަލްޓި-އޭޖެންސީތަކުން އަވަސް މިނެއްގައި އެއްބާރުލުން ނުލިބެއެވެ. އަދި ބަންދުކުރެވޭ ފަރާތްތައް އަނބުރާ ފޮނުވާލުމަށް އިމިގްރޭޝަނާ ހަވާލުކުރެވޭއިރު ޖާގައިގެ ދަތިކަން ޑިޓެންޝަން ފެސިލިޓީގައި ހުރިކަން ވެސް ފާހަގަކުރެއްވިއެވެ.
