ރައީސް އިބްރާހީމް މުހައްމަދު ސޯލިހުގެ މި ސަރުކާރުން ނޫސްވެރިންނަށް އިންތިހާއަށް ނުފޫޒު ފޯރުވުމަށް މަސައްކަތް ކުރާ ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަޙްމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ، މަޖިލިހަށް ހުށަހަޅާފައިވާ އިންތިހާބުތަކާ ބެހޭ އާންމު ގާނޫނަށް އިސްލާހު ގެނައުމަށް ބިލަށް ބަހުސް ކުރައްވަމުންނެވެ.
ޝިޔާމް ވިދާޅުވީ، މީޑީއާތަކާ ގުޅޭގޮތުން ގާނޫނުގައި ހުށަހަޅާފައިވާ އިސްލާހަކީ ނުފޫޒު ފޯރުވުމަށް ހުށަހަޅާފައިވާ އިސްލާހެއް ކަމަށާއި ނޫސްވެރިންނަށް އިންތިހާއަށް ނުފޫޒުފޯރުވުމަށް ސަރުކާރުން މަސައްކަތްކުރާ ކަަމަށެވެ.
ޝިޔާމް ވިދާޅުވީ، މީޑީއާތަކާ ގުޅޭގޮތުން ގާނޫނުގައި ހުށަހަޅާފައިވާ އިސްލާހުތަކާ އެކު އިންތިހާއަށް ނުފޫޒުފޯރުވުމަށް ސަރުކާރުން މަސައްކަތްކުރާ ކަަމަށެވެ. އަދި ފެންނަނީ މުޅި ނިޒާމުގެ ތެރޭގައި ސަރުކާރުގެ ނުފޫޒު އޮތްތަން ކަމަށް ވެސް ޝިޔާމް ވިދާޅުވިއެވެ.
މީގެ އިތުރުން ރާއްޖޭގައި ބާއްވާ އިންތިހާބުތަކަށް މިހާބޮޑަށް ނުފޫޒު ފޯރުވާ ވެރިއެއް ނުދެކޭ ކަމަށާއި، ސަރުކާރުން އިންތިހާބުތަކަށް އެކި ގޮތްގޮތަށް ނުފޫޒު ފޯރުވަމުންދާ ކަމަށް ޝިޔާމް ފާހަގަ ކުރެއްވިއެވެ. އެގޮތުން ވަޒީފާ ދީގެންނާއި ޕްރޮޖެކްޓްތައް ދީގެން ނުފޫޒު ފޯރުވާ ކަން ޝިޔާމް ވަނީ ވިދާޅުވެފައެވެ.
ޝިޔާމް ވިދާޅުވީ، ރާއްޖޭގައި ރައީސް އިބްރާހީމަށް އިތުބާރުކުރާ ބަޔަކު ނެތް ކަމަށާއި، އަމިއްލަ ޕާޓީންވެސް އެމަނިކުފާނަށް އިތުބާރުނުކުރާ ކަމަށެވެ.
އަދި އެމްޑީޕީގެ ރައީސް، ރައީސް މުހައްމަދު ނަޝީދަށް ވެސް ރައީސް ސޯލިހު ދެއްވީ ދޯކާ ކަމަށް ފާހަގަ ކުރައްވާ ޝިޔާމް ވިދަޅުވީ، ޖުމްހޫރީ ޕާޓީގެ ލީޑަރު ގާސިމް އިބްރާހީމް އަދި އެމްއާރުއެމްގެ ލީޑަރު ރައީސް މައުމޫން އަބްދުލްގައްޔޫމުވެސް ކޯލިޝަން ހައްދަވަން ފަސްޖެހިވަޑައި ގަންނަވަނީ އެ ބޭފުޅުންނަށް ރައީސް ދޯކާދެއްވާފައި ވާތީ ކަމަށެވެ.
