ރައީސް ކަމަށް ކުރިމަތިލައްވަނީ ގައުމު ސަލާމަތްކޮށް ގެއްލިގެންދާ މިނިވަންކަން ހިމާޔަތްކުރުމަށް ކަމަށް ވިދާޅުވެ، ކުރިއަށް އޮތް ރިޔާސީ އިންތިހާބުގައި ވާދަކުރައްވަން ނިންމަވައި، ކުރީގެ ބަންޑާރަނައިބު ޑރ. މުހައްމަދު މުނައްވަރުގެ ހަރަކާތްތައް ފަށްޓަވައިފިއެވެ.
ރިޔާސީ އިންތިހާބުގައި ވާދަކުރައްވާނެ ކަން މިއަދު ސޯޝަލްމީޑިއާގައި މުނައްވަރު ހާމަކުރައްވާފައި ވަނީ، ދޮންދީނި އެއް ހިމެނޭ "2023 ޑރ. މުނައްވަރު" ލޯގޯ ހިއްސާކުރެއްވުމަށް ފަހުގައެވެ. އަންނަ އިންތިހާބަށް ކެމްޕެއިން ކުރެއްވުމުގެ މަސައްކަތް ފެއްޓެވުމުގެ ގޮތުން މިއަދު ހެނދުނުގެ ވަގުތެއްގައި މުނައްވަރުގެ ކެމްޕެއިން މަރުކަޒެއް ވަނީ ހުޅުވައިފައެވެ.
މިކަމާ ގުޅިގެން "ދަ ޕްރެސް" އިން ސުވާލުކުރުމުން މުނައްވަރު ވިދާޅުވީ، ސަރުކާރުން ރައްޔިތުންގެ ކަންބޮޑުވުންތަކަށް ހައްލެއް ގެނެސްދެވިފައި ނުވާ ކަމަށެވެ. އޭގެ ތެރެއިން އެއް ކަމަކަށް މުނައްވަރު ފާހަގަކުރެއްވީ ގައުމުގެ މިނިވަން ކަން ގެއްލިގެންދާ ކަމަށް ބުނެ، އާންމުން ކަންބޮޑުވުން ފާޅުކުރަމުން ދިއުމެވެ. އޭނާ ވިދާޅުވާ ގޮތުގައި، ސަރުކާރުން އާންމުންނަށް މިފަދަ ކަންކަން ސާފުކޮށްދީީފައެއް ނެތެވެ.
ސަރުކާރުގެ ސިޔާސަތުތަކަށް ފާޑުވިދާޅުވަމުން ގެންދަވާ މުނައްވަރު ވިދާޅުވީ، ދައުލަތުގެ ދަރަނި އިތުރުވަމުން ގޮޮސް އަތް ނުފޯރާ ފަށަށް ހިނގައްޖެ ކަމަށެވެ. އޭނާ ވަނީ، ސަރުކާރުން އެކި ކަހަލަ މަޝްރޫއުތައް ހިންގާއިރު ދަރަންޏަށް ވަނީ ކިހިނެއްތޯ ސުވާލު ކުރައްވާފައެވެ. އަދި ދިވެހި ރުފިޔާގެ ވަރަށް ބޮޑަށް ވެއްޓުމުގެ ބިރު އެބައޮތް ކަމަށް ވިދާޅުވިއެވެ.
މުނައްވަރު ވިދާޅުވީ، ސަރުކާރުން އެތެރެ އެތެރެއިން ޑީލް ހައްދަވައިގެން، ސަރުކާރު ބައި އަޅާ ބަހާއިރު، ރައްޔިތުންގެ މަތިން ވެރިން ހަނދާނެއް ނުހުންނަ ކަމަށެވެ.
"އެހެންވީމާ ދިވެހި ރައްޔިތުންގެ ފަރާތުން އެއްޗެކޭ ބުނެ، މި އެއްޗެހި ހިމާޔަތްކޮށް މި ގައުމު ސަލާމަތްކުރަން ޖެހޭ، އެއީ ނިކުންނަން ޖެހުނު ސަބަބަކީ،" އޭނާ ވިދާޅުވިއެވެ.
ރިޔާސީ އިންތިހާބުގައި ވާދަކުރައްވާނީ މުނައްވަރު ވިދާޅުވާ ގޮތުގައި، އަމިއްލަ ގޮތުންނެވެ.
މުނައްވަރުގެ އިތުރުން، އިންތިހާބުގައި ވާދަކުރައްވާނެ ކަމަށް އިއުލާނުކުރައްވާފައި ވަނީ ރައީސް އިބްރާހީމް މުހައްމަދު ސޯލިހާއި އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީންގެ އިތުރުން، ޔާމީން ސަރުކާރުގެ ކުރީގެ ހޯމް މިނިސްޓަރު އުމަރު ނަސީރާއި، އެމްއެންޕީގެ ރައީސް މުހައްމަދު ނާޒިމެވެ.
ޑރ. ވަހީދުގެ ފަސްޕަސެންޓްގެ ރެކޯޑް މުގުރާލާނެ މީހަކު ވެރިކަމަށް ނިކުތުމަކީ ހަމަގައިމުވެސް ޑރ. ވަހީދު ވަރަށް އުފާކުރާނެކަމެއް. ރިޔާސީ އިންތިހާބުތަކަށް ޖާނޭ،، ވިންޓަރ ޝަރީފުފަދަ ބޭފުޅުންވެސް މީގެކުރިން ކުރިމަތިލާފައިވޭ. އެކަމަކު ޑރ. މުނައްވަރުކަހަލަ ހޭޖެހޭ މީހަކު މިވަރުގެކަމަށް ކުރިމަތިމިލަނީ ކީއްކުރަންބާވައޭ ހިތައްއަރާ.