ސަރުކާރުގެ އޮފީސްތައް ހިންގަމުން އަންނަ ވެލާނާގެ ސަރަހައްދުގައި ޕާކު ކުރާނެ ޖާގަ ނެތްކަމަށް ބުނެ، ބައެއް މުވައްޒަފުން މިއަދު އިހުތިޖާޖަށް ނުކުމެއްޖެއެވެ.
އިހުތިޖާޖުގެ ބައިވެރިން ދަނީ އެ ސަރަހައްދުގައި ޝުއޫރު ލިޔެފައިވާ ޕޯސްޓަރުތައް ހިފައިގެން ހިމޭން އިހުތިޖާޖެއް ކުރަމުންނެވެ. މިގޮތުން ބައިވެރިންގެ އަތުގައި އޮތް ޕޯސްޓަރުތަކުގައި "ވެރިންނަށް ވެލާނާގެ ތިރިން ޕާކު ކުރާނެ ތަން ލިބޭ"، "ސަރުކާރުގެ އެންމެ ގިނަ އޮފީސް ހިސާބުގައި ޕާކު ކުރެވޭނެ ޖާގައެއް ނެތް" އަދި "ކޮންތާކުތޯ ޕާކު ކުރާނީ" ވަނީ ލިޔެފައެވެ.
މުވައްޒަފުންގެ ކަންބޮޑުވުމަކީ ވެލާނާގެ ބިލްޑިންގާއި ދަރުމަވަންތަ ސްކޫލް ކައިރީގައި ވަރަށް ކުރިއްސުރެ ހަދާފައިވާ ޕާކިން ޒޯނުގައި ޕާކް ކުރުން ކުއްލި ގޮތަކަށް މަނާކުރުމެވެ. މިގޮތުން މުވައްޒަފުން މިއަދު އޮފީހަށް ދިޔައިރު އެ ތަނުގައި ހުރީ ސަތަރި ދަމައި ޕާކް ނުކުރެވޭ ގޮތަށް ހަދާފައި ކަމަށް މައުލޫމާތު ވަނީ ލިބިފައެވެ.
އިހުތިޖާޖު ކުރާ މުވައްޒަފުން ރައްޔިތުންގެ މަޖިލިހުގެ އިދާރާ ކައިރިއަށް ވެސް ޖަމާވެ ވަނީ އަޑު އުފުލާފައެވެ. މިކަމާ ގުޅިގެން ފުލުހުންގެ ބަހެއް އަދި ނުލިބެއެވެ.
މީގެ ކުރިން ސަރުކާރު ރަސްމީ ގަޑީގައި ވެލާނާ ބިލްޑިން ކުރިމަތީގައި އާންމުކޮށް ސައިކަލުތައް ޕާކުކުރި ނަމަވެސް ދާދި ފަހުން ފުލުހުން ވަނީ އެ އިމާރާތް ކުރިމަތީގައި ގަވާއިދާ ހިލާފަށް ޕާކް ކޮށްފައި ހުރި ހުރިހާ ސައިކަލެއްގައި ސްޓިކާ ޖަހާފައެވެ. އޭގެ ފަހުން އެ ތަނުގައި ސައިކަލް ޕާކް ކުރުން ވަނީ ހުއްޓާލާފައެވެ.
