ކުރީގެ ސަރުކާރުތަކުން ދިން އަނިޔާތަކުގެ ހަނދާންތަކުގެ ވާހަކަ ދައްކަވަމުން ޖޭޕީގެ ލީޑަރު ގާސިމް އިބްރާހިމަށް ރޮވިއްޖެއެވެ.
ޖޭޕީގެ ގައުމީ ކޮންފަރެންސް ހުޅުވައިދެއްވާ ވާހަކަ ދައްކަވަމުން ގާސިމް ވިދާޅުވީ، ވޭތުވެދިޔަ ދުވަސްތަކުގައި ސިޔާސީ މަޝްރަހުގައި އެކިއެކި ބޭފުޅުންގެ ފަރާތުން އަނިޔާވެރިކަން ކުރިމަތިވި ކަމަށެވެ. މިގޮތުން ކުރީގެ ރައީސް އަބްދުﷲ ޔާމީންގެ ވެރިކަމުގައި ގިނަ ސިޔާސީ ބޭފުޅުންތަކެއް ތިއްބެވީ ޖަލުގައި ނުވަތަ އަމިއްލަ އަށް އަރުވާލެވިގެން ރާއްޖެ އިން ބޭރުގައި ކަމަށް ގާސިމް ވިދާޅުވިއެވެ.
ގާސިމް ވިދާޅުވީ، ސިޔާސީ މައްސަލައެއްގެ ތަހުގީގަށް ކަމަށް ބުނެ ގާސިމަށް ވެސް ހުންނަވަން ޖެހުނީ އެތައް ފަހަރެއްގެ މަތީން ދޫނިދޫ ޖަލުގައި ކަމަށެވެ. އޭގެ ތެރެއިން ލިބުނު އަނިޔާއެއްގައި ފަރުވާ ދެނިކޮށް، އިއްވި "ގައިރު ގާނޫނީ ހުކުމެއްގެ" ސަބަބުން ބޭސްފަރުވާއަށް ރާއްޖެއިން ބޭރަށް ފުރަން ޖެހުނު ކަމަށް ގާސިމް ވިދާޅުވިއެވެ.
ސިންގަޕޫރުގައި ތިން މަހެއްހާ ދުވަހަށް ހާއްސަ ހުއްދައެއްގެ ދަށުން ހުރެވުނީ ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ އެހީތެރިކަމުގެ ސަބަބުން ކަމަށާއި އަދި ޖަރުމަނަށް ދަތުރުކުރުމުގައި ވެސް ނަޝީދުގެ އެހީތެރިކަން ލިބިވަޑައިގެންނެވި ކަމަށް ގާސިމް ވިދާޅުވިއެވެ.
ގާސިމް ވިދާޅުވީ ރައީސް ނަޝީދާއި އެމަނިކުފާނަކީ ގައުމަށްޓަކައި ވަރަށް ގިނަ ބުރަމަސައްްކަތްތަކެއް ކުރެއްވި ދެބޭފުޅުން ކަމަށާއި، އެމަސައްކަތުގެ ތެރެއިން ލިބުނު އަނިޔާ އާއި ވޭނުގެ ވާހަކަތަކަކީ ވަރަށް ފުން ޖަޒުބާތުތަކެއް ކަމަށެވެ.
ޖޭޕީގެ ހަތަރުވަނަ ގައުމީ ކޮންފަރެންސް މިއަދު ފަށާފައި ވާއިރު މި ކޮންފަރެންސްގައި އެޕާޓީގެ އެތެރޭގެ އިންތިހާބުތަކުގެ އިތުރުން، 2023 ވަނަ އަހަރުގެ ރިޔާސީ އިންތިހާބާ ގުޅޭ ނިމުންތައް ނިންމާނެއެވެ.
މިގޮތުން އެ ޕާޓީގެ ލީޑަރު، ޕާޓީގެ ޑެޕިއުޓީ ލީޑަރުން، ޒުވާނުންގެ ލީގުގެ ރައީސް، ޒުވާނުންގެ ލީގުގެ ނައިބު ރައީސް، ޒުވާނުންގެ ލީގުގެ ސެކްރެޓަރީ، ޒުވާނުންގެ ލީގުގެ މެންބަރުން، އަންހެނުންގެ ލީގުގެ ރައީސް، އަންހެނުންގެ ލީގުގެ ނައިބު ރައީސް، އަންހެނުންގެ ލީގުގެ ސެކްރެޓަރީގެ އިތުރުން އަންހެނުންގެ ލީގުގެ މެންބަރުން، އަދި ގައުމީ ކޮންފަރެންސްއިން އިންތިހާބުކުރާ 25 މެންބަރުން އިންތިހާބު ކުރުމަށް ވަނީ ހަމަޖެހިފައެވެ.
މީގެ އިތުރުން، އަސާސީ ގަވާއިދަށް ގެންނަން ޕާޓީގެ ކައުންސިލުން އެންޑޯޒްކޮށްފައިވާ އިސްލާހުތަކަށް ބަހުސްކޮށް ގޮތެއް ނިންމުންވެސް މި ކޮންފަރެސްގައި އޮންނާނެއެވެ. އަދި އަސާސީ ގަވާއިދުގެ ދަށުން ޕާޓީގެ ލީޑަރު އައްޔަން ކުރައްވަން ޖެހޭ މަގާމުތަކަށް ބޭފުޅުން އައްޔަން ކުރުން ވެސް އޮންނާނެއެވެ.
މިވަރުގެ މީހަކު ހޮވަންވީ ވެރިކަމަށް ނުވާނެ ނުވެސް ލާނަން ވޯޓެއް މީނައަކަށް.